មានសេចក្ដីរាយការណ៍មកថា ចិនតែងតែបញ្ជាអោយបើកយន្តហោះចម្បាំង និងយន្តហោះស៊ើបយកការណ៍ដោយហោះរំលោភលើលំរអាកាសរបស់តៃវ៉ាន់ ទោះជាតៃវ៉ាន់ បានព្រមាន និងបញ្ជាអោយយន្តហោះចម្បាំងរបស់ខ្លួនជាច្រើនគ្រឿង បើកទៅគៀងបណ្ដេញយន្តហោះ ចិនអោយចេញពីដែនអាកាសរបស់តៃវ៉ានក៏ដោយ។មិនមានតែយន្តហោះនោះទេ ដែលក្រុងប៉េកាំងបានបញ្ជាអោយហោះរំលោភដែនអាកាសតៃវ៉ាន់ គឺសូម្បីនាវាចម្បាំចិនក៏បានបញ្ជាអោយបើកចូលដែនទឹកតៃវ៉ាន់ដែរ។
ក្រៅពីនេះ មហាយក្សចិន បានគាំរាមលើកទ័ពចូលលុកដែនកោះតៃវ៉ាន់នៅថ្ងៃណាមួយដែលក្រុងប៉េកាំង យល់ថា តៃវ៉ាន់ត្រៀមប្រកាសដាក់ដែនកោះនេះ ជារដ្ឋឯករាជ្យ។ ក្រុមអ្នកវិភាគឯករាជ្យមួយក្រុមនៃជនជាតិចិនព្រមានថាមុននឹងចិនលើកទ័ពចូលដែនដីតៃវ៉ាន់គឺចិន ត្រូវយកអោយបានសិននូវកោះតូចៗរបស់តៃវ៉ាន់ នៅក្នុងសមុទ្រចិនខាងត្បូង។ ទំនងមើលឃើញ ដូចនេះហើយ ដែលជំរុញទឹកចិត្តរបស់សមាជិកសភាអាមេរិករៀបចំសេចក្ដីស្នើច្បាប់ពិសេស ដើម្បីការពារដែនដីតៃពីការលុកលុយពីសំណាក់ប្រទេសចិន។
សេចក្ដីរាយការណ៍របស់ Taiwan Times បានចុះ ក្នុងថ្ងៃទី២៩ ខែកក្កដានេះថាសមាជិកសភាសហរដ្ឋអាមេរិកបានដាក់សំណើបីលក្ខខណ្ឌដើម្បីតាក់តែច្បាប់ការពារតៃវ៉ាន់ករណីមានការលុកលុយពីចិន។ប្រភពដដែលនេះបាន ឱ្យដឹងថា សមាជិកសភាអាមេរិក និងជាសមាជិកនៃអនុគណៈកម្មការកិច្ចការបរទេសសម្រាប់អាស៊ី និងប៉ាស៊ីហ្វិក លោក Ted Yoho បានកំពុងរៀបចាប់តាក់តែងច្បាប់ថ្មីសំដៅការពារដែនកោះតៃវ៉ាន់ ដោយច្បាប់នេះបើកភ្លើងខៀវ ឱ្យកងទ័ព អាមេរិកចូលទៅទប់ទល់នឹងកម្លាំងទ័ពចិនដែលប៉ុនប៉ងលេបយកកោះតៃវ៉ាន់នោះ។ ចំពោះសំណើបីលក្ខខណ្ឌដែលការពារដែនកោះតៃវ៉ាន់នោះ គឺករណីចិនប្រើកងទ័ពគំរាមដែនដីតៃវ៉ាន់។ ការពារអាយុជីវិតពលរដ្ឋតៃវ៉ាន់ដែល រងការគម្រាមកំហែងនិងប្រឆាំងការលុកលុយរឹបអូសដែនដីកោះតៃវ៉ាន់។
នៅក្នុងបទសម្ភាសន៍ជាមួយនឹងសារព័ត៌មានអាមេរិក Business Fox លោក Ted Yoho និយាយថា អាមេរិកមិនទាន់គ្រប់គ្រាន់ទេត្រឹមតែ គាំទ្រសេរីភាពនៃដែនដីតៃវ៉ាន់។ លោកថា គោលនយោបាយសហប្រតិបត្តិការអាមេរិក-តៃវ៉ាន់នៅតែមានភាពមិនច្បាស់លាស់ និងរឹងមាំឡើយ។លោកបានបញ្ជាក់ថាតៃវ៉ាន់មិនមែនជាផ្នែកមួយរបស់សាធារណរដ្ឋប្រជាមានិតចិន ហើយតៃវ៉ាន់ក៏មិនចង់ក្លាយជាខេត្តមួយរបស់ចិនដែរ។ត្បិតតៃវ៉ាន់និងសហរដ្ឋអាមេរិកមិនបានចុះកិច្ចព្រមព្រៀងទទួលស្គាល់គ្នាក្នុងទំនាក់ទំនងការទូតផ្លូវការណាមួយក៏ដោយ តែសម្ព័ន្ធភាពចំពោះមុខអន្ដរជាតិរបស់សហរដ្ឋអាមេរិកមានទៅលើតៃវ៉ាន់គឺមានហើយ ។
លោកបញ្ជាក់ទៀតថា ការមានច្បាប់មួយនេះគឺជាការប្រកាស
ប្រឆាំងចិនមិនឱ្យលុកលុយ លើដែនដីតៃវ៉ាន់រួចទៅហើយ។
សារព័ត៌មាន អាមេរិក National interest ខណៈដែល បានចុះផ្សាយការស្ទង់របស់ពលរដ្ឋតៃវ៉ាន់ ដោយបានបង្ហាញថាជាង៧០% គាំទ្រអាជ្ញាធរតៃវ៉ាន់ត្រៀមកងទ័ពដើម្បីប្រឆាំងការ លុកលុយបំពារបំពានទឹកដីពីសំណាក់ប្រទេសចិន។
តៃវ៉ាន់បច្ចុប្បន្នមានប្រជាជនជិត២៤លាននាក់ ដែលរស់នៅលើទឹកដី ៣ម៉ឺន ៦ពាន់ ១៩៣គីឡូម៉ែត្រការ៉េ។ តែកងទ័ពតៃវ៉ាន់មានការហ្វឹកហាត់ច្រើន ដើម្បីត្រៀមប្រយុទ្ធដោយមានកងទ័ពអាមេរិក ជួយហ្វឹកហ្វឺន។ គ្រឿងសព្វាវុធរបស់តៃវ៉ាន់គឺសុទ្ធ តែផលិតនៅសហរដ្ឋអាមេរិក។យ៉ាងណាគេបានឃើញជំហររបស់អ្នកស្រី សាយអ៊ឹងវិន យ៉ាងច្បាស់ក្នុងរយៈពេល៤ខែមកនេះ គឺអ្នកស្រីបានបញ្ជាឱ្យមានការពង្រឹង សមត្ថភាពកងទ័ពជាខ្លាំងជាពិសេស គឺទ័ពជើងអាកាស មានការលេងល្បែងសមយុទ្ធជារឿយៗឆ្លើយតបនឹងការវាយប្រហារណាមួយពីកងទ័ពចិន។
យ៉ាងនេះក្ដី នៅក្នុងវេទិកាមួយរបសក្រុមអ្នកវិភាគឯករាជ្យក្រោមប្រធានបទគ្រោះថ្នាក់ឈូងសមុទ្រ និងលទ្ធភាពជម្លោះយោធានៅឈូងសមុទ្រតៃវ៉ាន់រវាងអាមេរិកនិងចិន។ក្នុងវេទិកានេះមានការជជែកពិភាក្សាគ្នាដ៏ក្ដៅគគុកអំពីផែនការនៅខែសីហាដែលចិននឹងបើកល្បែងសង្គ្រាមដ៏ធំ គំរាមតៃវ៉ាន់ និងធ្វើដំណើរទៅរឹបអូសកោះតូចៗរបស់តៃវ៉ាន់នៅសមុទ្រចិនខាងត្បូង។បណ្ដាញផ្សាយព័ត៌មានChannel News Asia CNA ឱ្យដឹងថាមេបញ្ជាការចូលនិវត្តន៍របស់កងកម្លាំងដែនអាកាសចិនលោក Chang Yen-ting វាយតម្លៃថានៅអនាគលទ្ធភាពកាន់តែខ្ពស់នៃជម្លោះតំបន់ហើយជម្លោះអាចកើតមាននៅលើកោះតូចៗរបស់តៃវ៉ាន់គឺនៅ Dongsha, Taiping និង Wuqiu ព្រោះថា កូនកោះទាំងអស់នោះចិនស្រួលវាយតែ តៃវ៉ាន់ពិបាកការពារ។
លោក Chen Ching-pu ដែលជាសាស្រ្ដាចារ្យគោលនយោបាយសង្គមនៅសកលវិទ្យាល័យYuan Ze University យល់ថាបើចិន និងតៃវ៉ាន់ នៅតែគំរាមគ្នា បំភ័យគ្នាទៀត គឺជម្លោះនោះនឹងផ្ទុះ ហើយនឹងក្លាយជាការប្រយុទ្ធគ្នា ដើម្បីរកឈ្នះចាញ់តែម្ដង។ មានន័យថា អ្នកឈ្នះក្នុងសង្រ្គាមនោះពិតប្រាកដ គឺប្រទេសចិន ពីព្រោះចិនអះអាងថាខ្លួនរីករាយក្នុងការធ្វើសង្គ្រាម ជាមួយដែនដីដ៏តូចមួយនេះ។ ទំនងដូចនេះហើយមើលទៅដែលសមាជិសភាអាមេរិក Ted Yoho នឹងតាក់តែងច្បាប់ដើម្បីស្នើសុំអោយមានវិធានការការពារដែនដី តៃវាន់ ដែលលោកដាក់ឈ្មោះថា Taiwan Invasion Prevention Act ។
តាមលោក Ted Yoho អះអាងថា បើចិនលើកទ័ពចូលកាន់កាប់កោះតៃវ៉ាន់ គឺប្រធានាធិោបតីអាមេរិកនឹងយកច្បាប់នេះមកអនុវត្តភ្លាមដោយលើកទ័ពអាមេរិកទៅកោះតៃវ៉ាន់ ហើយជួយការពារដៃនដីមួយនេះ ភ្លាម។ លោកព្រមានថាចិននឹងជួបផលវិបាកបើសម្រេច លើកទ័ពលុកលុយតៃវ៉ាន់ព្រោះតែវ៉ាន់មិនមែនជាដែនដីហុងកុងនោះទេ៕