តំណាងប្រជាពលរដ្ឋរាប់រយគ្រួសារ រស់នៅឃុំនារាយណ៍ ស្រុកឈូក ខេត្តកំពត បានសំណូមពរដល់ លោក ហ៊ុន សែន ឲ្យជួយអន្តរាគមន៍ និងមានចំណាត់ការផ្លូវច្បាប់ទៅលើសក្មភាព របស់លោកមេបញ្ជាការ នៃទីបញ្ជាការកងពលតូចអន្តរាគមន៍លេខ១១ និងបក្ខពួក ដែលបានប្រើកម្លាំងកងទ័ពប្រដាប់ដោយអាវុធ មកហ៊ុំមព័ទ្ធរបងបន្លាលួស រំលោភយកដីបង្កបង្កើនផលរបស់ពួកគាត់ និងរំលោភដីសម្រាប់ធ្វើរោងបុណ្យមុខបរិវេណវត្តអារាម ហើយថែមទាំងបានគម្រាមប្រើអាវុធ ដើម្បីផ្តាច់ជីវិតពលរដ្ឋ ដែលហ៊ានងើបមុខតវ៉ា។
ពលរដ្ឋបន្តថា ទីបញ្ជាការកងពលតូចអន្តរាគមន៍លេខ១១ ខាងលើនេះ គឺមានទីតាំងឈរជើងប្រចាំការនៅចន្លោះព្រំប្រទល់ខេត្តតាកែវ-កំពត តាមបណ្តោយផ្លូវជាតិលេខ៣ ត្រង់ចំណុចសាកលវិទ្យាល័យភូមិន្ទ កាលពីសម័យសង្គមរាស្ត្រនិយម។ ប្រភពដដែលបន្តថា ទីតាំងត្រូវកងកម្លាំងយោធាខាងលើ ប៉ុនប៉ងរំលោភយកនេះ គឺប្រជាពលរដ្ឋមួយចំនួន ធ្លាប់បានធ្វើស្រែបង្កបង្កើនផល និងរស់អាស្រ័យផលលើដីនោះរាប់សិបឆ្នាំមកហើយ។
ក្រុមប្រជាពលរដ្ឋរស់នៅឃុំនារាយណ៍ ស្រុកឈូក ខេត្តកំពត អះអាងថាមេបញ្ជាការកងពលតូចអន្តរាគមន៍លេខ១១ ឈរជើងប្រចាំការនៅជាប់ផ្លូវជាតិលេខ៣ ត្រង់ចំណុចព្រំប្រទល់ខេត្តតាកែវ-កំពត ដែលគំរាមប្រើកម្លាំងកងទ័ពបាញ់សម្លាប់ប្រជាពលរដ្ឋពួកគាត់ ដែលហ៊ានចេញមុខតវ៉ាយកដីទីធ្លាសម្រាប់ធ្វើបុណ្យមុខផ្លូវចូលវត្ត, ស្រះទឹក និងដីកសិកម្មពលរដ្ឋដែលពលរដ្ឋធ្លាប់កាន់កាប់។
រហូតមកទល់ពេលនេះគេនៅមិនទាន់ឃើញអាជ្ញាធរមូលដ្ឋាន ភូមិឃុំ អភិបាលស្រុកឈូក និងលោក ជាវ តាយ អភិបាលខេត្តកំពត មានចំណាត់របែបណា ជូនប្រជាពលរដ្ឋនៅឡើយទេ គិតត្រឹមល្ងាចថ្ងៃទី៣០ ខែកក្កដា ឆ្នាំ២០២០នេះ។ បន្ថែមលើនេះ The Cambodia Daily ក៏មិនទាន់អាចមានប្រភពទាក់ទង លោកមេបញ្ជាការកងពលតូចអន្តរាគមន៍លេខ១១ ដែលបានបញ្ជាកម្លាំងយោធាក្រោមឱវាទ ទៅហ៊ុំព័ទ្ធរបងរំលោភយកដីធ្លី របស់ប្រជាពលរដ្ឋ បានទេនៅល្ងាចថ្ងៃទី៣០ ខែកក្កដា ឆ្នាំ២០២០នេះ។ ដោយឡែក លោក ជាវ តាយ អភិបាលខេត្តកំពត ក៏មិនទាន់អាចទាក់ទង ដើម្បីស្នើការបំភ្លឺបាននៅឡើយដែរ។
យ៉ាងនេះក្តី តំណាងប្រជាពលរដ្ឋរាប់រយគ្រួសារ រស់នៅឃុំនារាយណ៍ ស្រុកឈូក និងឃុំជ្រេស ស្រុកជុំគិរី ខេត្តកំពត បានអះអាងថា នឹងធ្វើការប្រមូលផ្តុំគ្នាតវ៉ាទ្រង់ទ្រាយធំ នៅព្រឹកថ្ងៃទី៣១ ខែកក្កដា ស្អែកនេះបន្ថែមទៀត ដើម្បីទាមទារដីកសិកម្ម របស់ប្រជាពលរដ្ឋ, ទាមទារទីធ្លារមុខបរិវេណវត្តអារាម និងស្រះទឹក ដែលជាកេរ្តិ៍តំណែលសល់ពីសង្គមរាស្ត្រនិយម ទុកជាសម្បត្តិសាធារណៈ របស់រដ្ឋ ដែលអាចបើកឲ្យប្រជាពលរដ្ឋប្រើប្រាស់ដោយសេរីដូចពេលមុនវិញ៕