ប្រភពព័ត៌មានពីក្រុមឈ្មួញ និងក្រុមហ៊ុនដឹកជញ្ជូនទំនិញតាមរថយន្ត តាមផ្លូវជាតិលេខ៤ បានអះអាងថា ស្ថានីយជញ្ជីងថ្លឹងទម្ងន់សំរាប់ រថយន្តស្ទឹងច្រាល និងស្ថានីយអូរចំណារ មានទីតាំងនៅតាមផ្លូវជាតិលេខ៤ ខេត្តព្រះសីហនុ បានប្រព្រឹត្តអំពើពុករលួយដុះស្លែរាប់ឆ្នាំមកហើយ ហើយបានប្រែក្លាយជាជញ្ជីងថ្លឹងលុយជំនួសវិញ រហូតមកទល់សព្វថ្ងៃនេះ។
ប្រភពដដែលបន្តថា ជាបន្តបន្ទាប់មកនេះ សម្រាប់មន្ត្រីប្រចាំការនៅតាមស្ថានីយជញ្ជីងថ្លឹងរថយន្តស្ទឹងច្រាល និងស្ថានីយអូរចំណារ ផ្លូវជាតិលេខ៤ គឺពួកគេ មិនខ្វល់ថា រថយន្តបើកឆ្លងកាត់ផ្លូវជាតិលេខ៤ ផ្ទុកទំនិញគ្រប់ទំងន់ ឬលើសទំងន់នោះទេ គឺឲ្យតែមានលុយបង់គ្រប់ចំនួនតាមការទាមទារ របស់ពួកគេចង់បានជាការស្រេច ដោយរថយន្តដឹកទំនិញទាំងនោះ មិនបាច់បើកឡើងលើជញ្ជីងថ្លឹងនោះទេ។
ប្រភពដដែលបញ្ជាក់ថា រថយន្តដែលតែងដឹកលើសទម្ងន់ពីច្បាប់កំណត់នោះរួមមាន៖ រថយន្តធុនធំដឹកថ្ម ដឹកខ្សាច់ ដឹកដែក និងដឹកស៊ីម៉ងត៍ជាដើម។
ក្រុមឈ្មួញ និងអាជីវករមួយចំនួន ដែលមិនពេញចិត្ត ចំពោះសកម្មភាព របស់មន្ត្រីប្រចាំស្ថានីយជញ្ជីងថ្លឹងរថយន្តស្ទឹងច្រាល និងអូរចំណារ បានរិះចោទថា ជញ្ជីងថ្លឹងទម្ងន់រថយន្តនៅស្ថានីយទាំងពីរខាងលើ បានប្រែក្លាយទៅជាជញ្ជីងថ្លឹងលុយយ៉ាងក្រអឺតក្រទមអស់ទៅហើយ។
ពួកគេនិយាយថា ភាពមិនប្រក្រតី ឬអំពើពុករលួយ ដែលអាចធ្វើសកម្មភាពដោយរលូន នៅស្ថានីយជញ្ជីងថ្លឹងរថយន្តស្ទឹងច្រាល និងអូរចំណារ ក៏ដោយសារតែមានការឃុបឃិត បើកដៃពីសំណាក់ លោក បូរី វង្សសានិត្យ ប្រធានមន្ទីរសាធារណការ និងដឹកជញ្ជូនខេត្តព្រះសីហនុតែម្តង។
ក្រុមប្រជាពលរដ្ឋនិយាយថា កន្លងមក ស្ថានីយថ្លឹងរថយន្តទាំងពីរខាងលើនេះ ទោះបីឈ្មួញ និងអាជីវករដឹកទំនិញតាមរថយន្តផ្ទុកលើសទម្ងន់ ឬមិនលើសទម្ងន់បែបណាក្តី ក៏ត្រូវតែបង់លុយតាមការកំណត់ របស់ប្រធានស្ថានីយជញ្ជីងថ្លឹងរថយន្តស្ទឹងច្រាល និងអូរចំណារដូចគ្នាដែរ គ្រាន់តែបង់តិចឬច្រើនតែប៉ុណ្ណោះ។
ក្រុមអ្នកដឹកទំនិញតាមរថយន្តឆ្លងកាត់ផ្លូវជាតិលេខ៤ បានស្នើដល់ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក៏ដូចជា លោក សេង ឈួន ប្រធានដឹកនាំជញ្ជីងថ្លឹងរថយន្តទូទាំងប្រទេស ឲ្យជួយពិនិត្យទៅលើសកម្មភាព របស់ក្រុមមន្ត្រីប្រចាំស្ថានីយជញ្ជីងថ្លឹងរថយន្តស្ទឹងច្រាល និងអូរចំណារឲ្យអនុវត្តការងារត្រឹមត្រូវតាមច្បាប់ឡើងវិញ។
ប្រភពពីក្រុមឈ្មួញ និងក្រុមអាជីវករដឹកជញ្ជូនទំនិញឆ្លងកាត់ផ្លូវជាតិលេខ៤ បានអះអាងថា ក្នុងមួយថ្ងៃៗអាចមានរថយន្តដឹកទំនិញ ឆ្លងកាត់មុខស្ថានីយជញ្ជីងថ្លឹងរថយន្តស្ទឹងច្រាល និងអូរចំណារ ចន្លោះចាប់ពីជាង ២០០ ទៅ៣០០គ្រឿង បានធ្វើដំណើរតាមផ្លូវជាតិលេខ៤។
ហើយក្នុងនោះ រថយន្តដឹកថ្ម ខ្សាច់ ដែក និងស៊ីម៉ងត៍ជាដើម ស្ទើរទាំងអស់ដែលបើកចេញពីភ្នំពេញ ឬពីខេត្តកំពង់ស្ពឺ ឆ្ពោះទៅខេត្តព្រះសីហនុ គឺភាគច្រើនដឹកលើសចំណុះ ឬលើសទម្ងន់។ ហើយថា ប្រធានស្ថានីយជញ្ជីងថ្លឹងរថយន្តទាំងពីរ អាចប្រមូលលុយពុករលួយ បានរាប់លានរៀលក្នុងមួយថ្ងៃៗ ដើម្បីដាក់ហោប៉ៅផ្ទាល់ខ្លួន។
ក្រុមមន្ត្រីរាជការថ្នាក់ទាប បានឲ្យដឹងដែរថា ការដែលប្រធានស្ថានីយជញ្ជីងថ្លឹងរថយន្តស្ទឹងច្រាល និងប្រធានស្ថានីយជញ្ជីងថ្លឹងរថយន្តអូរចំណារ តាមផ្លូវជាតិលេខ៤ អាចធ្វើសកម្មភាពតាមអំពើចិត្ត វាជាប្រភពចំណូល របស់ លោក បូរី វង្សសានិត្យ ប្រធានមន្ទីរសាធារណការ និងដឹកជញ្ជូនខេត្តព្រះសីហនុ។
យ៉ាងនេះក្តី លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា ចំពោះភាពមិនប្រក្រតី ដែលអាចកើតមាននៅតាមស្ដានីយថ្លឹងរថយន្តនីមួយៗ នៅកម្ពុជា នឹងមិនអាចធ្វើខុសច្បាប់បានទៀតទេ។ លោកបន្តថា ក្រសួង បានតម្លើងដាក់ឲ្យដំណើរការ នូវប្រព័ន្ធគ្រប់គ្រងការដឹកជញ្ជូនលើសទម្ងន់កំណត់ ដោយប្រើប្រាស់បច្ចេកវិទ្យាកាមេរ៉ាឆ្លាតវៃ និងជញ្ជីងស្វ័យប្រវត្តិ (AI Camera and Weight in Motion Sensor) ចំនួនពីរស្ថានីយសាកល្បងជំហានដំបូងសិន ដើម្បីត្រួតពិនិត្យយានយន្តដឹកទំនិញលើសទម្ងន់ និងការគ្រោងបិទយានដ្ឋានកែច្នៃខុសលក្ខណៈបច្ចេកទេស ឱ្យបានអស់ជាស្ថាពរ។
លោក ស៊ុន ចាន់ថុល ក៏បានអំពាវនាវដល់ក្រុមហ៊ុនដឹកជញ្ជូនទំនិញទាំងអស់ ត្រូវគោរពច្បាប់ចរាចរណ៍ឱ្យបានត្រឹមត្រូវ ដោយមិនត្រូវដឹកទំនិញលើសទម្ងន់ច្បាប់កំណត់ ដែលនាំឱ្យផ្លូវឆាប់ខូច បង្កគ្រោះថ្នាក់ចរាចរណ៍ បង្កភាពយឺតយ៉ាវ។
លេខាធិការដ្ឋាន របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បង្ហាញថា ក្នុងខែមិថុនាក្លងទៅនេះ សមត្ថកិច្ចចាប់បានរថយន្តដឹកទំនិញលើសទម្ងន់កម្រិតកំណត់ចំនួន ២២៨គ្រឿង និងពិន័យបានថវិកាសរុបចំនួនជាង ៤រយលាន រៀល (៤០៤ ៨៤០ ០០០)។ តាមរបាយការណ៍ ចំនួនរថយន្តដែលចាប់បានមានការថយចុះចំនួន ៤៨គ្រឿង បើប្រៀបធៀបទៅនឹងតួលេខ ខែមេសា ឆ្នាំ២០២០ ដែលមានចំនួន ២៧៦គ្រឿង៕