សមត្ថកិច្ចកម្ពុជា បានសហការជាមួយអង្គភាពគយចិន និងអង្គការUNODC ប្រចាំប្រទេសថៃ ដោយបង្ក្រាបគ្រឿងញៀនជិត២រយគីឡូក្រាម ដែលបម្រុងនាំចេញទៅក្រៅប្រទេស។តាមគេហទំព័រអគ្គស្នងការនគបាលជាតិកាលពីថ្ងៃច័ន្ទ បានអះអាងថា សមត្ថកិច្ចក៏បានចុះឆែកដល់ទីតាំងនៅខណ្ឌកំបូល រាជធានីភ្នំពេញ ដោយរកឃើញសារធាតុសម្រាប់ផលិតគ្រឿងញៀន ជាង៣តោន(៣១០០)ផ្សេងទៀត។
ប្រភពដដែលបន្តថា ក្នុងប្រតិ្តបតិការនេះសមត្ថកិច្ចបានឃាត់ខ្លួនជនសង្ស័យជនជាតិចិនម្នាក់ និងខ្មែរ ដែលជាមុខសញ្ញាកែច្នៃគ្រឿងញៀន ក្នុងបន្ទប់ខុនដូរមួយកន្លែងក្នុងក្រុងភ្នំពេញ។ប្រភពដដែលបញ្ជាក់ថា ករណីជួញដូរគ្រឿងញៀននេះ គឺជាករណីឧក្រិដ្ឋកម្មឆ្លងដែន ដែលមានអង្គការចាត់តាំងច្បាស់លាស់ និងមានមេខ្លោងនៅបរទេស ហើយមានបំណងនាំចេញទៅកោះតៃវ៉ាន់។
បច្ចុប្បន្នសមត្ថកិច្ចជំនាញ នៃអគ្គស្នងការដ្ឋាននគរបាលជាតិ កំពុងបន្តស្រាវជ្រាវមុខសញ្ញាមេខ្លោងនៅបរទេស និងមុខសញ្ញាពាក់ព័ន្ធ ដើម្បីនាំខ្លួនមកផ្តន្ទាទោសតាមផ្លូវច្បាប់៕