រដ្ឋាភិបាល បានសម្រេចអនុញ្ញាតឲ្យបើកដំណើរការរោងកុន និងរោងសម្តែងសិល្បៈឡើងវិញ ក្រោយពេលរដ្ឋប្រកាសផ្អាកជាបណ្តោះអាសន្នដើម្បីបង្ការការរីករាលដាលជំងឺកូវីដ១៩ កាលពីខែមិនា។
សេចក្តីជូនដំណឹងរបស់ក្រសួងវប្បធម៌នៅថ្ងៃ៦ខែសីហា បានឲ្យដឹងថា ការបើកឱ្យដំណើរការឡើងនូវរោងកុន ឬរោងភាពយន្ត និងរោង សម្តែងសិល្បះនេះ គឺដើម្បីជួយសម្រាលការលំបាកផ្នែកសេដ្ឋកិច្ចក្នុងស្ថានភាពកូវីដ១៩នេះ។បន្ថែមពីនេះ ជាការលើកទឹកចិត្តដល់កិច្ចខិតខំប្រឹងប្រែងរបស់សិល្បករ សិល្បការិនី ព្រមទាំងផលិតករ អាជីវករ ម្ចាស់រោងភាពយន្ត និងរោងសម្ដែងសិល្បៈ ក្នុងបុព្វហេតុអភិរក្ស និងលើកស្ទួយវិស័យសិល្បៈវប្បធម៌ជាតិ រដ្ឋាភិបាលបានអនុញ្ញាតជាគោលការណ៍ ឱ្យបើកដំណើរការឡើងវិញនូវ រោងភាពយន្ត និងរោងសម្ដែងសិល្បៈ។ជាមួយគ្នានេះ ក្រសួងតម្រូវឱ្យគោរពតាមគោលការណ៍ស្តង់ដាប្រតិបត្តិ ដែលរៀបចំឡើង ដោយក្រសួងសុខាភិបាល និងក្រសួងវប្បធម៌ និងវិចិត្រសិល្បៈ និងលក្ខខណ្ឌតម្រូវសុវត្ថិភាពនានា ដូចជារោងភាពយន្ត និងរោងសម្ដែងសិល្បៈ ដែលមានបំណងបើកដំណើរការសកម្មភាពរបស់ខ្លួនឡើងវិញ ត្រូវដាក់ពាក្យស្នើសុំ និងចុះអនុស្សរណៈនៃការយោគយល់គ្នា ជាមួយក្រសួងវប្បធម៌និងវិចិត្រសិល្បៈ ដើម្បីធានាការអនុវត្តនូវគោលការណ៍ស្តង់ដារ ប្រតិបត្តិឱ្យបានត្រឹមត្រូវជាដើម។កាលពីថ្ងៃទី១៧ ខែមីនា រដ្ឋាភិបាលបានប្រកាសឱ្យបិទខារ៉ាអូខេ ក្លឹបកម្សាន្ត និងរោងភាពយន្តនៅទូទាំងប្រទេស ក្រោមហេតុផលនៃការទប់ស្កាត់ការរីករាលដាល ពីជំងឺកូវីដ-១៩។
ក្រុមសហជីពដែលធ្វើការងារលើវិស័យនេះ បានអះអាងថា វិធានការរបស់រដ្ឋាភិបាលពេលនោះ ធ្វើឱ្យមនុស្សជាង ៨ម៉ឺននាក់ធ្វើការនៅក្នុងវិស័យនេះ ដែលថាភាគច្រើនជាស្ត្រីបានបាត់បង់ការងារ និងប្រាក់ចំណូល។ទាំងកម្មករ និងក្រុមថ្នាក់ដឹកនាំសហជីពក្នុងវិស័យនេះ បង្ហាញការព្រួយបារម្ភថា បើរដ្ឋាភិបាលមិនបញ្ចេញកញ្ចប់ថវិកា ឬស្បៀងអាហារ ដើម្បីសង្គ្រោះបន្ទាន់ដល់ពួកគេទេ អ្នកងាយរងគ្រោះទាំងនោះនឹងដាច់ពោះស្លាប់ ប៉ុន្តែមកទល់ពេលនេះរដ្ឋាភិបាលនៅតែគ្មានវិធានការជួយដល់កម្មករ បុគ្គលិកក្នុងវិស័យនោះឱ្យបានគ្រប់គ្រាន់នៅឡើយ ។បញ្ហានេះ ធ្វើឱ្យកម្មករ ឬបុគ្គលិកខ្លះ ប្រឈមការបណ្តេញចេញពីផ្ទះជួល ខ្លះទៅរស់នៅក្រោមស្ពាន ខ្លះបន្ថយការចំណាយលើរបបអាហារ ខ្លះទៀតត្រូវប្រឈមការរឹបអូសទ្រព្យសម្បត្តិដោយសសារគ្មានប្រាក់សង់បំណុលគេជាដើម៕