តំណាងពលរដ្ឋ ៣៦គ្រួសារ មកពីស្រុកស្ទោង និងស្រុកកំពង់ស្វាយ ខេត្តកំពង់ធំ បានស្នើជាថ្មីទៀតទៅលោក ហ៊ុន សែន ឱ្យជួយអន្តរាគមន៍ដោះស្រាយវិវាទដីធ្លីរបស់ពួកគេ។ ពលរដ្ឋប្រមាណ១០នាក់ ដែលអះអាងថាជាតំណាងពលរដ្ឋ៣៦គ្រួសារមកពីខេត្តកំពង់ធំ បានដាក់ញត្តិដាក់ទៅខុទ្ទកាល័យនាយករដ្ឋមន្ត្រីនៅព្រឹកថ្ងៃចន្ទនេះបានប្រាប់ក្រុមអ្នកសារព័ត៌មានថា ការស្វែងរកកិច្ចអន្តរាគមន៍ពីលោកហ៊ុន សែន ដោយសារពួកគាត់អស់សង្ឃឹមក្នុងការដោះស្រាយបញ្ហាដីធ្លីពីសំណាក់អាជ្ញាធរខេត្ត។
តំណាងពលរដ្ឋទាំងនោះ ថែមទាំងចោទអាជ្ញាធរមូលដ្ឋានថា បានឃុបឃិតជាមួយឈ្មួញ ដើម្បីក្លែងបន្លំឯកសារយកដីរបស់ពួកគាត់ធ្វើកម្មសិទ្ធិផ្ទាល់ខ្លួន។អាជ្ញាធរមូលដ្ឋានដែលតំណាងពលរដ្ឋចោទប្រកាន់ទាំងនោះ រួមមានអតីតមេឃុំដំរីស្លាប់លោក ភិន សំអុល អភិបាលរងស្រុកកំពង់ស្វាយ លោក គី សាវុថា និងលោក សៀន ឆេងកូ ជាឈ្មួញដី បានឃុបឃិតគ្នាក្លែងបន្លំឯកសារយកដីធ្លីអ្នកភូមិជាបន្តបន្ទាប់តាំងពីឆ្នាំ២០១៥ ក្នុងទំហំដីសរុបជិត១រយហិកតា។
ខ្លឹមសារញត្តិដែលដាក់ជូនលោក ហ៊ុន សែន បញ្ជាក់ថា ដីដែលមានជម្លោះនោះជាប្រភេទដីស្រែដែលអ្នកភូមិបានចូលទៅអាស្រ័យផលតាំងពីឆ្នាំ១៩៧៩ និងមានលិខិតបញ្ជាក់ការកាន់កាប់ពីអាជ្ញាធរមូលដ្ឋានត្រឹមត្រូវ ប៉ុន្តែត្រូវបានក្រុមអាជ្ញាធរ និងឈ្មួញដីក្លែងបន្លំឯកសារយកដីពួកគាត់ និងបង្ខំឱ្យអ្នកភូមិទទួលយកសំណងបន្តិចបន្តួចប៉ុណ្ណោះ។ លើសពីនេះ ពួកគេថែមទាំងគំរាមកំហែងអ្នកភូមិ ដែលហ៊ានចេញមុខតវ៉ាទៀតផង។តំណាងពលរដ្ឋទាំងនោះ បញ្ជាក់ថា ការបាត់បង់ដីធ្លីនេះ ធ្វើឱ្យអ្នកភូមិជួបបញ្ហាប្រឈមក្នុងជីវភាពគ្រួសារ ដោយសារតែគ្មានដីបង្កបង្កើនផលចិញ្ចឹមជីវិត។
យ៉ាងនេះក្តី មន្ត្រីខុទ្ទកាល័យនាយករដ្ឋមន្ត្រី គឺលោក គង់ ចំរើន បានទទួលញត្តិពីតំណាងប្រជាពលរដ្ឋនិងបានចារលិខិតមួយទៀតឱ្យតំណាងពលរដ្ឋយកទៅដាក់នៅសាលាខេត្តកំពង់ធំវិញ។ សារព័ត៌មានសំឡេងប្រជាធិបតេយ្យវីអូឌី បានស្រង់ប្រសាសន៍របស់អភិបាលខេត្តកំពង់ធំ លោក សុខ លូ នៅថ្ងៃនេះថា អាជ្ញាធរខេត្តបានទទួលបណ្តឹងពីក្រុមប្រជាពលរដ្ឋហើយ ហើយលោកនឹងចាត់មន្ត្រីចុះស្រាវជ្រាវឱ្យបានច្បាស់លាស់ ដើម្បីដោះស្រាយបញ្ចប់វិវាទក្នុងពេលឆាប់ៗខាងមុខនេះ។
អភិបាលខេត្តរូបនេះបញ្ជាក់ថា ក្នុងសម័យតេជោទៅហើយ គ្មាននរណាទៅយកដីពលរដ្ឋនោះឡើយ។ទោះបីជាយ៉ាងណាក៏ដោយ ក្រុមតំណាងពលរដ្ឋព្រមានថា ប្រសិនបើអាជ្ញាធរខេត្តមិនព្រមដោះស្រាយបញ្ហាដីធ្លីជូនពួកគាត់ តំណាងអ្នកភូមិនឹងឡើងមកភ្នំពេញដើម្បីរកកិច្ចអន្តរាគមន៍ពីប្រមុខដឹកនាំជាថ្មីទៀត៕