រដ្ឋមន្រ្តីក្រសួងមហាផ្ទៃលោក ស ខេង អះអាងថាលោកនឹងពិនិត្យមើលលើបណ្តឹងករណីស្នងការនគបាលខេត្តកំពង់ធំដែលជាប់ពាក់ព័ន្ធនឹងការបៀតបៀនកេរខ្មាសរបស់នគរបាលនារីចំនួនបួននាក់។ ការអះអាងរបស់លោក ស ខេង ធ្វើឡើងនៅក្រោយពិធីប្រកាសចូលកាន់តំណែងសមាជិកគណៈកម្មាធិការជាតិប្រឆាំងទារុណកម្ម កាលពីព្រឹកថ្ងៃអង្គារទី១១ ខែសីហានេះ។ ជាងនេះទៅទៀតលោកបានបញ្ជាឲ្យលោក នេត សាវឿន អគ្គស្នងការនគរបាលជាតិ លោក ចាន់ អ៊ាន រដ្ឋលេខាធិការក្រសួងមហាផ្ទៃ និងអភិបាលខេត្តកំពង់ធំ ពិនិត្យលើករណីមន្ត្រីនគរបាលជានារីចំនួន ៤នាក់ ដែលបានប្តឹងលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ ពាក់ព័ន្ធការបៀតបៀនកេរខ្មាស។
ពាក្យបណ្តឹងចុះថ្ងៃទី៣០ ខែកក្កដា ឆ្នាំ២០២០ របស់នគរបាលនារីឱ្យដឹងថា នៅអំឡុងឆ្នាំ២០១៨-២០១៩ ស្ត្រីជាជនរងគ្រោះត្រូវបានលោក អ៊ុក កុសល ដែលជាស្នងការបានហៅពួកគាត់ឲ្យទៅជួបនៅក្នុងបន្ទប់ធ្វើការរបស់លោក ដើម្បីសួរនាំកិច្ចការងារមួយចំនួន។ពេលចូលដល់ក្នុងបន្ទប់តែពីរនាក់ លោកស្នងការ ក៏បានសួរថាតើនាង “ពាក់ស័ក្តិប៉ុន្មាន? ហើយមុខតំណែងជាអ្វីសព្វថ្ងៃ? ហើយចង់បានមុខតំណែងឬឡើងស័ក្តិដែរទេ? បើចង់បានចាំគាត់ជួយព្រោះគាត់ជាស្នងការ ជាប្រធានអង្គភាពចង់ធ្វើអ្វីក៏បានដែរ ឱ្យតែនារីជាជនរងគ្រោះព្រមស្រឡាញ់គាត់។
លិខិតដដែលបន្តថា លោក អ៊ុក កុសល បានចាប់បង្ខំស្ទាបអង្អែលកេរខ្មាសដោយមិនញញើតដៃ ទោះបីពេលខ្លះពួកនាងខំរើបម្រះឬចង់ស្រែកប្រាប់គេឯងក៏មិនហ៊ាន ព្រោះខ្លាចអំណាចគាត់ជាស្នងការ ម្យ៉ាងទៀតគាត់បានគំរាមមិនឲ្យប្រាប់រឿងដែលគាត់បានប្រព្រឹត្តនោះឲ្យអ្នកណាដឹងទេ បើហ៊ានគឺមានបញ្ហាហើយ។
ក្រុមនគរបាលនារីរងគ្រោះឲ្យដឹងថា នគរបាលជានារី ដែលចូលទៅជួបគាត់មួយចំនួនគឺជួបនឹងរឿងបែបនេះ ហើយក៏មាននគរបាលជានារីខ្លះ ជួបរឿងឈឺចាប់ត្រូវបែកបាក់ក្រុមគ្រួសារដោយសារតែការប្រព្រឹត្តអំពើ ដ៏ថោកទាបរបស់បុគ្គល អ៊ុក កុសល មកលើមន្ត្រីនគរបាលជានារី។ជាងនេះទៅទៀត នារីរងគ្រោះទាំងនេះបានបន្តថា លោក អ៊ុក កុសល បានដឹកនាំបង្កើតបក្ខពួក ខ្សែស្រឡាយពុករលួយ និងអុចអាលឲ្យមានការបែកបាក់សាមគ្គីផ្ទៃក្នុងទាំងថ្នាក់ដឹកនាំស្នងការក៏ដូចជាមន្ត្រីក្រោមឱវាទ ដែលមិនអាចស្តារកិត្តិយសបានឡើយ។
រហូតមកទល់ពេលនេះសាព័ត៌មាន The Cambodia Daily នៅមិនទាន់អាចសុំការបំភ្លឺពីលោក អ៊ុក កុសល ស្នងការដ្ឋាននគរបាលខេត្តកំពង់ធំ អំពីករណីការចោទប្រកាន់ពាក់ព័ន្ធនឹងការបៀតបៀនកេរខ្មាសរបស់នគរបាលស្រ្តីចំនួនបួននាក់នេះនៅឡើយទេ។រដ្ឋមន្រ្តីក្រសួងមហាផ្ទៃលោក ស ខេង បញ្ជាក់ថា ករណីនេះមិនមែនជារឿងថ្មីនោះ ហើយបញ្ហានេះវាកើតឡើងជាយូរមកហើយ។ លោកបន្តថាលោកនៅមិនទាន់សម្រេចដោះស្រាយយ៉ាងម៉េចនៅឡើយទេ ដោយរង់ចាំក្រុមការងាររបស់ក្រសួងមហាផ្ទៃចុះត្រួតពិនិត្យជាមុនសិន៕