35 C
Phnom Penh

ក្រសួងមហាផ្ទៃ​សម្រេច​ផ្អាក​ការងារ​ស្នងការ​ខេត្តកំពង់ធំ ក្រោយ​មានរឿង​អាស្រូវ​ផ្លូវភេទ​

ដោយ ឌឹ ខេមបូឌា ដេលី

បទវិភាគ

ក្រសួងមហាផ្ទៃ​សម្រេច ផ្អាក​ការងារ​ស្នងការ​នគរបាល​ខេត្តកំពង់ធំ លោក អ៊ុ​ក កុសល ជា​បណ្ដោះអាសន្ន​ពាក់ព័ន្ធ​រឿងអាស្រូវ​បៀតបៀន​ផ្លូវភេទ​ជាមួយ​កូនចៅ​ជា​ស្ត្រី​ដែល​ជាម​ន្ត្រី​ក្រោមបង្គាប់​របស់​ខ្លួន ។សេចក្តី​ប្រកាស​របស់ក្រ​សួង​មហាផ្ទៃ​កាលពី​ថ្ងៃទី១២ខែសីហា បានសម្រេច​ផ្អាក​ការងារ​ជា​បណ្តោះអាសន្ន ចំពោះ​លោក​ឧត្តមសេនីយ៍​ទោ អ៊ុ​ក កុសល ដែល​ជា​ស្នងការ​នៃ​ស្នងការ​ដ្ឋាន​នគរបាល​ខេត្តកំពង់ធំ។

ក្នុង​លិខិត​ដដែល​បន្ត​ថា ក្រៅពី​សម្រេច​ផ្អាក​ការងារ ជាម​ន្ត្រី​ផ្កាយ​មាស​ពីរ រូប​នេះ គឺ​ត្រូវ​ទៅ​បង្ហាញខ្លួន​នៅ​នាយកដ្ឋាន​បុគ្គលិក​រៀងរាល់​ម៉ោង ធ្វើការ ដើម្បី​រង់ចាំ​ការសម្រេច​ជាថ្មី​ទៀត។ការសម្រេច​នេះ ក្រោយ​មា​នប​ណ្តឹង​មួយ​កាលពី​ថ្ងៃទី៣០ ខែកក្កដា ដែល​អះអាង​ថា​ជាម​ន្ត្រី​ប៉ូល​ិ​សស្រី​ក្នុង​ខេត្តកំពង់ធំ បាន​ផ្ញើ​ទៅ​រដ្ឋមន្ត្រី​ក្រសួងមហាផ្ទៃ លោក ស ខេង ឱ្យ​ជួយ​រក​យុត្តិធម៌​ជុំវិញ​រឿងអាស្រូវ​ដែល​លោក អ៊ុ​ក កុសល បាន​បំពាន​កេរ​ភេទ លើ​ពួក​គាត់។ក្នុង​បណ្តឹ​ងនោះ​បាន​រៀបរាប់​ពី​ដំណើររឿង ដោយ​ចោទ​ស្នងការ​នគរបាល​ខេត្តកំពង់ធំ លោក អ៊ុ​ក កុសល ថា​បាន​បំពាន​កេរ​ភេទ​ទៅលើ​មន្ត្រី​នគរបាល​ជា​ស្ត្រី​នៅ​ខេត្តកំពង់ធំ ជាច្រើន​នាក់​ដោយ​លួង​ថា​នឹង​តម្កើង​តំណែង​ឬស័ក្កិ និង​ប្រើអំណាច​មិន​ឱ្យ​មន្ត្រី​នគរបាល​ទាំងនោះ​បញ្ចេញ​ព័ត៌មាន​អាស្រូវ​ផ្លូវភេទ​របស់​ខ្លួន​ទៅក្រៅ​ទៀតផង។

ប្រភព​ដដែល​បន្ត​ថា ពួក​គាត់​ខ្លះ​មាន​ប្តី ហើយ​ត្រូវ​បែកបាក់​គ្រួសារ​ដោយសារ​ស្នងការ​ខេត្ត​រូប​នេះ បំពាន​លើ​ពួក​គាត់​ម្តង​ហើយ​ម្តង​ទៀត បើ​ទោះបីជា​ពួក​គាត់​ធ្លាប់​បាន​ដាក់ពាក្យ​ប្តឹង​នៅក្នុង​ខេត្ត ប៉ុន្តែ​គ្មាន​លទ្ធផល​ឡើយ។ ក្រៅពី​មិន​អាច​ដោះស្រាយ​បាន ស្ត្រីជា​នគរបាល​ទាំងនោះ អះអាង​ថា ពួក​គាត់​ថែមទាំង​ត្រូវ​រង​ការ​គំរាមកំហែង និង​ធ្វើបាប ពី​ស្នងការ​ខេត្ត លោក អ៊ុ​ក កុសល ថែមទៀត។

បញ្ហា​ទាំងនេះ ដែល​ជំរុញ ឱ្យ​ពួក​គាត់​សម្រេច​ស្វែងរក​កិច្ច​អន្តរាគមន៍​ពីរ​ដ្ឋ​មន្ត្រី​ក្រសួងមហាផ្ទៃ តែម្តង។កាលពី​ថ្ងៃទី១១ ខែសីហា ឧបនាយក​រដ្ឋមន្ត្រី និង​ជារ​ដ្ឋ​មន្ត្រី​ក្រសួងមហាផ្ទៃ លោ​កស ខេង បាន​បញ្ជាក់​ថា លោក​បាន​បញ្ជា​ទៅ​អគ្គស្នងការ​នគរបាល​ជាតិ លោក នេត សាវឿ​ន និង​អភិបាលខេត្ត​កំពង់ធំ លោក សុខ លូ ឱ្យ​ពិនិត្យមើល​លើ​បណ្ដឹង​រឿងអាស្រូវ​របស់​ស្នងការ ខេត្ត​រូប​នេះ។

សេចក្តី​ប្រកាស​របស់ក្រ​សួង​មហាផ្ទៃ ចំនួន​ពីរ​ទៀត របស់ក្រ​សួង ក៏បាន​សម្រេច​ប្រគល់​ភារកិច្ច​ឱ្យ លោក​ឧត្តមសេនីយ៍​ត្រី អ៊ិ​ត គឹ​មស៊្រន ដែល​ជា​ស្នងការ​រង​ទៅជា​ស្នងការ​ស្តីទី​នៃ​ស្នងការ​ដ្ឋាន​នគរបាល​ខេត្តកំពង់ធំ និង​បាន​ផ្ទេរ​ភារកិច្ច​លោក​ឧត្តមសេនីយ៍​ត្រី អ៊ឹម សុ​គឿន ពី​ស្នងការ​រង​ទទួលបន្ទុក​ផែនការ​ងារ​ធនធានមនុស្ស​នៃ​ស្នងការ​ដ្ឋាន​នគរបាល ខេត្តកំពង់ធំ ឱ្យទៅ​បម្រើការ​ងារ​នៅ​នាយកដ្ឋាន​បុគ្គលិក វិញ។

កាលពី​ខែ​មិនា រដ្ឋមន្ត្រី​ក្រសួងមហាផ្ទៃ​ធ្លាប់​ដាក់​ពិន័យ​រដ្ឋបាល លោក អ៊ុ​ក កុសល ម្ដង​រួចហើយ ក្រោម​មូលហេតុ​ខ្វះ​ការ​យកចិត្ត​ទុកដាក់​លើ​ការគ្រប់គ្រង និង​ដឹកនាំ។លោក អ៊ុ​ក កុសល បាន​ឡើង​កាន់​តំណែង​ជា​ស្នងការ​នគរបាល​ខេត្តកំពង់ធំ បន្ទាប់ពី​លោក ជូ សំ​អាន អតីត​ស្នងការ​ខេត្តកំពង់ធំ ពេលនោះ​មានរឿង​អាស្រូវ​ពាក់ព័ន្ធ​នឹង​អំពើពុករលួយ បក្ខ​ពួក​និយម ក្នុង​ការដឹកនាំ​របស់​ខ្លួន មុន​ពេល​ក្រសួងមហាផ្ទៃ​សម្រេច​ដក​លោក​ចេញពី​តំណែង។

ទាក់ទិន​នឹង​បញ្ហា​នេះ មន្ត្រី​សង្គម​ស៊ីវិល​ដែល​ធ្វើការងារ​ពាក់ព័ន្ធ​នឹង សិទ្ធិ​ស្ត្រី បាន​ស្វាគមន៍​ជា​ខ្លាំង​ចំពោះ​ចំណាត់ការ​ដ៏​ក្តៅ​គកុក​ភ្លាម​ៗ របស់ លោក ស ខេង រដ្ឋមន្ត្រី​ក្រសួងមហាផ្ទៃ ទៅលើ​អតីត​ស្នងការ​នគរបាល​ខេត្តកំពង់ធំ ឈ្មោះ អ៊ុ​ក កុសល ដែល​ធ្វើសកម្មភាព​អមនុស្សធម៌​មក​លើ​ស្ត្រី ដែល​ជា​នគរបាល​នារី ស្ថិត​ក្រោម​ឱវាទ​របស់​ខ្លួន។

បន្ថែម​លើ​នេះ ក្រុម​អង្គការ​សង្គម​ស៊ីវិល ដែល​ធ្វើការងារ​ពាក់ព័ន្ធ​ការគោរព​សិទ្ធិមនុស្ស​រួមមាន​អង្គការ​លី​កាដ​ូ (Licaho​) និង​សមាគម​ន៍​អាដ​ហុក​(Adhoc​) ជាដើម ក៏បាន​ស្នើ​ដល់​លោក ស ខេង ត្រូវ​បញ្ចូន​សំណុំរឿង​បៀតបៀន​កេរ្តិ៍ខ្មាស ដែល​អតីត​ស្នងការ​នគរបាល​ខេត្តកំពង់ធំ បាន​ប្រព្រឹត្តទៅ​កាន់​សាលាដំបូង​ខេត្តកំពង់ធំ ដើម្បី​បន្ត​នីតិវិធី​ជា​បន្ត​ទៀត ប្រយោជន៍​ដើម្បី​រក្សា​កិត្តិយស និង​សេចក្តី​ថ្លៃថ្នូរ របស់​កងកម្លាំង​នគរបាល​ជាតិ​ផង និង​ដើម្បី​ផ្តល់​យុត្តិធម៌​ជូន​ស្ត្រី​រងគ្រោះ​ផង​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស