30 C
Phnom Penh

រដ្ឋាភិបាល​សម្រេច​ផ្អាក​ពិធីបុណ្យ​អុំទូក ក្រោម​ហេតុផល​កូ​វីដ១៩​

ដោយ ឌឹ ខេមបូឌា ដេលី

បទវិភាគ

រដ្ឋាភិបាល​សម្រេច​ផ្អាក​ពិធីបុណ្យ​អុំទូក ក្រោម​ហេតុផល​កូ​វីដ១៩​រដ្ឋាភិបាល​លោក ហ៊ុន សែន បានសម្រេច​ផ្អាក​ការ​ប្រារព្ធ​ព្រះរាជ​ពិធី បុណ្យអុំទូក អកអំបុក និង​សំពះព្រះខែ ដែល​ជាពិធី​ប្រពៃណី​ខ្មែរ​នៅ​ឆ្នាំ២០២០នេះ ក្រោម​ហេតុផល​ដើម្បី​ទប់ស្កាត់​ការ​រីក​រាលដាល​ជំងឺ​កូ​វីដ១៩។

នៅ​ថ្ងៃទី១៣ ខែសីហា​នេះ ទី​ស្តី​ការ​គណៈរដ្ឋ​មន្ត្រី​បាន​ចេញ​លិខិត​មួយ​ដោយ​បញ្ជាក់​ថា រដ្ឋាភិបាល​បានសម្រេច​ផ្អាក​ប្រារព្ធ​ព្រះរាជ​ពិធីបុណ្យ​អុំទូក បណ្តែត​ប្រទីប អកអំបុក និង​សំពះព្រះខែ ឆ្នាំ២០២០នេះ។ការសម្រេច​នេះ ទី​ស្តី​ការ​គណៈរដ្ឋ​មន្ត្រី​ថា​ធ្វើឡើង តាម​សំណើ​របស់​ឧបនាយក​រដ្ឋមន្ត្រី រដ្ឋមន្ត្រី​ក្រសួង​ព្រះបរមរាជវាំង និង​ជា​ប្រធាន គណៈកម្មាធិការ​ជាតិ​រៀបចំ​បុណ្យជាតិ និង​អន្តរជាតិ លោក គង់ សំ​អុល។

សារព័ត៌មាន​សំឡេង​ប្រជាធិបតេយ្យ​វី​អូ​ឌី បាន​ដកស្រង់​សម្តី​ប្រធាន អចិន្ត្រៃយ៍​នៃ​គណៈកម្មាធិការ​ជាតិ​រៀបចំ​បុណ្យជាតិ និង​អន្តរជាតិ លោក ប៊ូ ជុំ​សេរី ចុះផ្សាយ​ថា មូលហេតុ​ដែល​នាំ​ឱ្យ​រដ្ឋាភិបាល​ផ្អាក​ប្រារព្ធ​ព្រះរាជ​ពិធីបុណ្យ​អុំទូក​នៅ​ឆ្នាំនេះ ដោយសារតែ​រដ្ឋាភិបាល​មានការ​បារម្ភ​ចំពោះ​ការ​ឆ្លង​រាលដាល​នៃ​ជំងឺ​កូ​វីដ១៩ ព្រោះតែ​ព្រះរាជ​ពិធីបុណ្យ​នេះ នឹង​មាន​មនុស្ស​ប្រមូល​ផ្តុំគ្នា​ច្រើន​នៅ​រាជធានី​ភ្នំពេញ ដែល​អាច​មាន​ហានិភ័យ​ខ្ពស់​ក្នុង​ការ​ឆ្លង​រីក​រាលដាល​ជំងឺ​ឡើង។

ការសម្រេច​ផ្អាក​ប្រារព្ធ​ពិធី បុណ្យអុំទូក មិនមែន​ទើបតែ​កើតឡើង​ម្តង​ទេ នៅ​កម្ពុជា ដោយសារ​កន្លងមក​ធ្វើមាន​ការ​ផ្អាក​ម្តង​ជា​ពីរ​ដង ក្រោម​ហេតុ​ផល​ផ្សេង​ៗ ដូចជា​ហេតុផល​នៃ​ការ សោយ​ទី​វង្គ​ត់​របស់​អតីត​ព្រះមហាក្សត្រ ព្រះបាទ នរោត្តម សីហនុ បញ្ហា​ទឹក​នៅ​ខាង​ព្រះ​បរម​រាជ​រាំង​តិច​ពេក មិន​អាច​អុំ​កើត និង​បញ្ហា​ទឹកជំនន់ នៅ​កម្ពុជា​ជាដើម ប៉ុន្តែ​ការ​ផ្អាក​ខ្លះ​ក្រុម​អ្នកឃ្លាំមើល​យល់ថា​មាន​ពាក់ព័ន្ធ​រឿង​នយោបាយ​ផង​ដែរ។តាម​ការកំណត់​ទុក​របស់​រដ្ឋាភិបាល ការ​ប្រារព្ធ​ព្រះរាជ​ពិធីបុណ្យ​អុំទូក បណ្តែត​ប្រទីប និង​សំពះព្រះខែ​អកអំបុក គ្រោង​នឹង​ធ្វើឡើង​រយៈពេល៣ថ្ងៃ គឺ​ចាប់ពី​ថ្ងៃទី៣០និង៣១ ខែតុលា ព្រមទាំង​ថ្ងៃទី១ ខែវិច្ឆិកា ឆ្នាំ២០២០​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស