សមាជិកក្រុមយុវជនខ្មែរថាវរៈយ៉ាងហោចណាស់ចំនួនចំនួន៦នាក់ រួមមាន កញ្ញា ឈឿន ដារ៉ាវី និងលោក ហ៊ុន វណ្ណៈ, សំណាង, ឡាវី, សៀង ហៃ និងកញ្ញា ជា គន្ធីន ត្រូវបានសមត្ថកិច្ចទីក្រុងភ្នំពេញចាប់ខ្លួននៅរសៀលថ្ងៃទី១៣ ខែសីហានេះ នៅកន្លងែងផ្សេងគ្នា។
ការចាប់ខ្លួននេះ ធ្វើឡើងបន្ទាប់ពីសមាជិកក្រុមយុវជនខ្មែរថាវរៈរូបនេះ តែងធ្វើសកម្មភាពសកម្ម ក្នុងការតវ៉ាទាមទារឱ្យដោះលែងប្រធាន សហភាពសហជីពកម្ពុជា លោក រ៉ុង ឈុន និងតែងផ្សាយផ្ទាល់ ឬ បង្ហោះព័ត៌មាននាំការតវ៉ា ព្រមទាំងបញ្ហាអយុត្តិធម៌ក្នុងសង្គមជាច្រើនទៀត។ នៅមុនការចាប់ខ្លួន គណនីហ្វេសប៊ុក សមាជិកក្រុមខ្មែរយុវជនថាវរៈ គឺ លោក ហ៊ុន វណ្ណៈ បានបង្ហោះជាវីដេអូ ដោយរៀបរាប់ថា សមត្ថកិច្ចបានចាប់ខ្លួន កញ្ញា ឈឿន ដារ៉ាវី នៅរសៀលថ្ងៃព្រហស្បតិ៍នេះ ខណៈដែល កញ្ញា និងយុវជនជាង១០នាក់ទៀត ប្រមូលផ្តុំគ្នាមុខសាលាដំបូងរាជធានីភ្នំពេញ។
ប្រភពដដែលបន្តថា សមត្ថកិច្ចបានចាប់ខ្លួន កញ្ញា ឈឿន ដារ៉ាវី ហើយថែមទាំងបានដាក់កម្លាំងព័ទ្ធផ្ទះរបស់ក្រុមយុវជនខ្មែរថាវរៈដែលជួលនៅថែមទៀតផង។នៅព្រឹកនេះ មានការប្រមូលផ្តុំគ្នាតវ៉ា នៅមុខសាលាដំបូងរាជធានីភ្នំពេញ ដើម្បីទាមទារឱ្យដោះលែងលោក រ៉ុង ឈុន ឱ្យមានសេរីភាពវិញ និងទម្លាក់ចោលការចោទប្រកាន់លើរូបលោក។
ក្នុងការតវ៉ានោះ មានការប៉ះទង្គិចគ្នាមួយប្រាវ ហើយកញ្ញា ឈឿន ដារ៉ាវី បានប្រាប់អ្នកសារព័ត៌មាននៅព្រឹកនេះថា អំឡុងពេលប៉ះទង្គិចគ្នានោះ ក្រុមសន្តិសុខខណ្ឌ បានទាញយកកាបូបរបស់គាត់ទៅបាត់ ដោយក្នុងកាបូបនោះមានលុយនិងសម្ភារមួយចំនួន។ ដោយសារបញ្ហានេះ ទើបកញ្ញា និងយុវជនផ្សេងទៀត បន្តរង់ចាំនៅមុខសាលាដំបូងរាជធានីភ្នំពេញ ដើម្បីទាមទារយកកាបូបនោះមកវិញ។
The Cambodia Daily នៅមិនទាន់អាចទាក់ទងស្នងការនគរបាលក្រុងភ្នំពេញលោក ស ថេត និងអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បាននៅឡើយទេ។យ៉ាងនេះក្តី ទាំងអាជ្ញាធរក្រុងភ្នំពេញ និងអ្នកនាំពាក្យក្រសួងយុត្តិធម៌តាមលិខិតរបស់ខ្លួន បានព្រមានចាត់វិធានការច្បាប់រួចទៅហើយ ទៅលើក្រុមអ្នកគាំទ្រទាមទារឱ្យដោះលែងលោក រ៉ុង ឈុន ដោយថាជាសកម្មភាពខុសច្បាប់។
សាព័ត៌មានសម្លេងប្រជាធិបតេយ្យវីអូឌី បានដកស្រង់សម្តីរបស់ស្នងការនគរបាលរាជធានីភ្នំពេញ លោក ស ថេត ចុះផ្សាយថា សមត្ថកិច្ចពិតជាបានចាប់ខ្លួនមនុស្សទាំង ៦នាក់នោះពិតមែន ក្នុងនោះ មានម្នាក់ត្រូវបានចាប់ខ្លួនតាមដីការបស់តុលាការ និង៥នាក់ទៀត ជាបទល្មើសជាក់ស្តែង។ទោះជាយ៉ាងណាក៏ដោយចលនានិស្សិតដើម្បីលទ្ធិប្រជាធិបតេយ្យ ដែលមានមូលដ្ឋានក្នុងសហរដ្ឋអាមេរិក បានចេញសេចក្តីថ្លែងការណ៍ថ្កោលទោស ការចាប់ឃាត់ខ្លួនយុវជន៦នាក់ របស់អាជ្ញាធររាជធានីភ្នំពេញ និងថ្កោលទោសការប្រើអំពើហិង្សារបស់កងសន្តិសុខខ័ណ្ឌ៧មករា មកលើពលរដ្ឋដែលបានប្រើសិទ្ធិស្របច្បាប់របស់ខ្លួនក្នុងការតវ៉ាទាមទារ ឱ្យដោះលែងលោក រ៉ុង ឈុន ។
ក្រុមនេះ ព្រមានថាការចាប់ឃាត់ខ្លួន និងការប្រើអំពើហឹង្សារបស់អាជ្ញាធររាជធានីភ្នំពេញនិងកងសន្តិសុខខ័ណ្ឌ៧មករា មកលើពលរដ្ឋ នេះ គឺជាការរំលោភសិទ្ធិស្របច្បាប់របស់ប្រជាពលរដ្ឋយ៉ាងធ្ងន់ធ្ងរ ហើយទាមទារឲ្យមានការដោះលែងយុវជនទាំង៦នាក់ជាបន្ទាន់ និងដោយឥតលក្ខខណ្ឌ។
ការបន្តចាប់ខ្លួនយុវជន សកម្មជនគណបក្សសង្រ្គោះជាតិ និងអ្នករិះគន់បញ្ហាសង្គមជាបន្តបន្ទាប់នេះ ស្របពេលដែលសហភាពអឺរ៉ុបបានសម្រេចនីតិវិធីដកប្រព័ន្ធអនុគ្រោះពន្ធ EBA ២០% ពីកម្ពុជាជាផ្លូវការកាលពីថ្ងៃម្សិលមិញ។យ៉ាងនេះក្តីអឺរ៉ុប បង្ហើបថា ប្រសិនបើសហគមន៍អន្តរជាតិមួយនេះ មើលឃើញថាស្ថានភាពលទ្ធិប្រជាធិបតេយ្យ ការគោរពសិទ្ធិមនុស្ស សិទ្ធិការងារកម្ពុជាបានប្រសើរ អឺរ៉ុបនឹងផ្តល់ប្រព័ន្ធអនុគ្រោះពន្ធមួយនេះ ពេញលេញដល់កម្ពុជាឡើងវិញ៕