លោក ហ៊ុន សែន អះអាងថា លោកនឹងមិនមានការស្នើសុំពន្យាពេលការវិលត្រឡប់របស់កងទ័ពមួកខៀវកម្ពុជា និងការបញ្ជូនកងទ័ពមួកខៀវទៅជំនួសនោះឡើយ ទោះបីជាពិភពលោកកំពុងជួបគ្រោះអាសន្នពីវិបត្តិកូវីដ១៩ យ៉ាងណាក្តី ។
លោកអះអាងនៅលើគណនីហ្វេសប៊ុករបស់លោកនៅថ្ងៃច័ន្ទនេះ ថា ការរៀបចំពេលវេលារបស់អង្គការសហប្រជាជាតិបានផ្តល់ឱ្យកម្ពុជារៀបចំការធ្វើចត្តាឡីស័កបានងាយស្រួលដើម្បីទប់ស្កាត់ការនាំចូល កូវីដ១៩មកក្នុងប្រទេសនោះ ដោយកងកម្លាំងទ័ពមួកខៀវកម្ពុជានឹង ត្រឡប់មកពីប្រទេសម៉ាលី ខែកញ្ញា ២០២០ ត្រឡប់មកពីប្រទេស ស៊ូដង់ខាងត្បូង ក្នុងខែតុលា២០២០។
ដោយឡែក ត្រឡប់មកពីប្រទេសអាហ្រ្វិកកណ្តាល នៅខែវិច្ឆិកា ឆ្នាំ២០២០ និងត្រឡប់ពីប្រទេសលីបង់ ក្នុងខែមករា២០២១។លោកបន្តថា បញ្ហានេះ សូមនាយទាហាននាយទាហានរងនិងពលទាហានដែលកំពុងស្ថិតនៅប្រទេសទាំង៤ខាងលើរៀបចំខ្លួនដើម្បីវិលត្រឡប់ និងសូមនាយទាហាន នាយទាហានរង និងពលទាហានដែលនឹងត្រូវទៅជំនួសរៀបចំខ្លួនចេញដំណើរតាមការចាត់ចែងរបស់ក្រសួងការពារជាតិ និងអង្គការសហប្រជាជាតិ។
យ៉ាងនេះក្តីការត្រឡប់មកកម្ពុជាវិញ នូវកម្លាំងមួកខៀវកម្ពុជាពីក្រៅប្រទេស កន្លងមក ក៏មានកងទ័ពមួយចំនួនត្រូវបានក្រសួងសុខាភិបាលរកឃើញថាមានឆ្លងជំងឺកូវីដ១៩ផងដែរ។លោកហ៊ុន សែន អួតថា បើទោះបីកម្ពុជាជាប្រទេសក្រីក្រ និងកំពុងប្រឈមជាមួយជំងឺកូវីដ១៩បន្ថែមទៀត ហើយកងទ័ពមួកខៀវកម្ពុជា កំពុងមានការវាយលុកដោយកូវីដ១៩ក៏ដោយ ក៏រដ្ឋាភិបាលរបស់លោក និងកងទ័ពរបស់ខ្លួនមិនបោះបង់ចោលភារកិច្ចក្នុងការចូលរួមថែរក្សាសន្តិភាពនៅតាមប្រទេសនានាក្រោមឆ័ត្ររបស់អង្គការសហប្រជាជាតិនោះឡើយ។
លោកថា កម្ពុជាចូលរួមដោយស្ម័គ្រចិត្ត និងការទទួលខុសត្រូវក្នុងឋាន:ជាសមាជិកអង្គការសហប្រជាជាតិ។ អ្នកនាំពាក្យក្រសួងការពារជាតិ លោក ឈុំ សុជាត ធ្លាប់បញ្ជាក់ថា បច្ចុប្បន្នកម្ពុជា មានកងកម្លាំងរក្សាសន្តិភាពសរុបជិត៧០០នាក់ កំពុងបំពេញបេសកកម្មមនុស្សធម៌ក្រោមឆ័ត្ររបស់អង្គការសហប្រជាជាតិ នៅប្រទេសចំនួន៤ រួមមានប្រទេសម៉ាលី ស៊ូដង់ខាងត្បូង អាហ្វ្រិកកណ្ដាល និងលីបង់ជាដើម៕