ប្រមុខរដ្ឋាភិបាលលោកហ៊ុន សែន អះអាងថា លោកនឹងមិនអត់អោនឱ្យជនទាំងឡាយណាដែលរិះគន់បញ្ហាព្រំដែនជាមួយប្រទេសជិតខាង ដោយថាពួកគេនឹងប្រឈមមុខការចាប់ខ្លួនបន្តទៀត។ថ្លែងក្នុងពិធីសម្ពោធសួនទឹកហ្គាឌិនស៊ិធី ស្ថិតនៅខណ្ឌជ្រោយចង្វារ រាជធានីភ្នំពេញ កាលពីថ្ងៃទី១៦ ខែសីហា លោកហ៊ុន សែន អះអាងថា រដ្ឋាភិបាលរបស់លោកតែងយកចិត្តទុកដាក់ដោះស្រាយបញ្ហាព្រំដែន ជាមួយប្រទេសជិតខាង ប៉ុន្តែនៅតែមានអ្នករិះគន់លើបញ្ហានេះ រួមទាំងចោទរដ្ឋាភិបាលក្បត់ជាតិទៅវិញ ដែលជាការប្រមាថធ្ងន់ធ្ងរដល់ព្រះមហាក្សត្រដល់រដ្ឋសភា និងដល់រដ្ឋាភិបាលរបស់លោកតែម្តង។
បញ្ហានេះ លោក ហ៊ុន សែន ប្រកាសបន្តចាប់ខ្លួនអ្នករិះគន់រឿងព្រំដែននេះថែមទៀត ដោយថាចេញរិះគន់មួយ នឹងត្រូវចាប់មួយ ហើយចេញច្រើនប៉ុណ្ណា គឺចាប់ប៉ុណ្ណឹង។ការអះអាងនេះ ក្រោយពេលមនុស្សពីរនាក់ រួមមាន ប្រធានសហភាពសជីពកម្ពុជា លោក រ៉ុង ឈុន និងប្រធានគណបក្សខ្មែរឈ្នះ លោក សួង សុភ័ណ្ឌ ត្រូវបានសមត្ថកិច្ចចាប់ខ្លួនជាបន្តបន្ទាប់ ក្រោយពេលពួកគេចុះពិនិត្យបញ្ហាព្រំដែនកម្ពុជា-វៀតណាម ក្នុងខេត្តត្បូងឃ្មុំ។ ក្រោយការចាប់ខ្លួនលោក រ៉ុង ឈុន សកម្មភាពតវ៉ាទាមទារឱ្យតុលាការទម្លាក់បទចោទ និងដោះលែងលោកឱ្យមានសេរីភាពឡើងវិញ ពីសំណាក់ក្រុមយុវជន ពលរដ្ឋ និងសាច់ញាតិរបស់លោកើតមានជាហូរហែ។
យ៉ាងនេះក្តី អាជ្ញាធរតែងធ្វើទុក្ខម្នេញទៅក្រុមអ្នកទាមទារ ឱ្យដោះលែងលោក រ៉ុង ឈុន រហូតឈានទៅចាប់ខ្លួនយុវជនខ្មែរថាវរៈពីរនាក់ គឺលោក ហ៊ុន វណ្ណៈ និងកញ្ញា ឈឿន ដាវ៉ាវី ព្រមទាំងអតីតសកម្មជនគណបក្សសង្រ្គោះជាតិ២នាក់ផ្សេងទៀត។ លោក ហ៊ុន សែន អះអាងថា ការចាប់ខ្លួនលោក រ៉ុង ឈុន និងលោក សួង សុភ័ណ្ឌ គឺលោកជាអ្នកបញ្ជាផ្ទាល់ផងដែរ ដោយសារលោកមិនអនុញ្ញាតឱ្យមានការតវ៉ាទាំងនោះ ឈានទៅមានសង្គ្រាមជាមួយប្រទេសជិតខាងឡើយ។
ទាំងលោក រ៉ុង ឈុន និងលោក សួង សោភ័ណ្ឌ កំពុងជាប់ឃុំនៅពន្ធនាគារព្រៃស ក្រោមបទចោទញុះញង់ឱ្យប្រព្រឹត្តអំពើបង្កភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៩៤ និងតាម៤៩៥ នៃក្រមព្រហ្មទណ្ឌ។លោក ហ៊ុន សែន បន្តថា រាល់ការចាប់ខ្លួនអ្នករិះគន់បញ្ហាព្រំដែនទាំងអស់ គឺក្រោមបទល្មើសជាក់ស្ដែង ដែលត្រូវចាប់ខ្លួនភ្លាមៗនៅហ្នឹងកន្លែង។
ជាងនេះទៅទៀត លោកក៏បានរំឭកត្រួសៗអំពីការចាប់ខ្លួនអតីតមន្ត្រីគណបក្សសង្គ្រោះជាតិ ពាក់ព័ន្ធនឹងការរិះគន់រឿងព្រំដែនកន្លងមក ថាការចាប់ខ្លួន ហុង សុខហួរ អតីតសមាជិកព្រឹទ្ធសភា និង អ៊ុំ សំអាន អតីតសមាជិករដ្ឋសភា គឺចាប់ក្នុងបទល្មើសជាក់ស្ដែងដូចគ្នាដែរ។
ទោះបីជាយ៉ាងនេះក្តី ក្រោយការចាប់ខ្លួនក្រុមអ្នករិះគន់រឿងព្រំដែន និងការចាប់ខ្លួនអ្នកតវ៉ាឱ្យដោះលែងអ្នករិះគន់ទាំងនោះ ក្រុមអង្គការជាតិនិងអង្គការអន្តរជាតិនានា បានចេញសេចក្តីថ្លែងការណ៍ជាបន្តបន្ទាប់ ដោយទាមទារឱ្យទម្លាក់បទចោទ និងដោះលែងបអ្នករិះគន់រឿងព្រំដែនដែរ ត្បិតការលើកឡើងរបស់ពួកគេជាសិទ្ធិសេរីភាពក្នុងការបញ្ចេញមតិត ស្របតាមច្បាប់ជាតិ និងអន្តរជាតិ ហើយក៏ជាការព្រួយបារម្ភក្នុងនាមពលរដ្ឋជុំវិញបញ្ហាជាតិតែប៉ុណ្ណោះ។
លោកបណ្ឌិត ឡៅ ម៉ុងហៃ បានលើកឡើងនៅគណនីហ្វេសប៊ុក ដោយចោទជាសំណួរឡើង ដោយស្រង់យកឃ្លាកំណាព្យទូន្មានព្រានប្រដៅរបស់អ្នកប្រាជ្ញក្រមង៉ុយខ្មែរពីបុរាណថា តើសង្គមខ្មែរយើងឥឡូវ ទៅជាសង្គម “យកខុសជាត្រូវ យកឆ្កួតធ្វើជា … អាងមាសអាងប្រាក់ អាងព្រើលអាងប្រាជ្ញ អាងកោងអាងកាច អាងកាប់អាងចាក់ អាងជើងអាងដៃ អាងវាយអាងធាក់ អាងគុកអាងច្រវាក់ អាងម៉ាស៊ីនកាត់ក” ទៅហើយឬ? លោកបន្តថា បើដូច្នេះមែន វាខុសស្រឡះពីឆន្ទ:របស់ប្រជាពលរដ្ឋខ្មែរដែលចង់កសាងសង្គមប្រជាធិបតេយ្យសេរីពហុបក្ស ធានាសិទ្ធិមនុស្ស គោរពច្បាប់ បដិបត្តធម៌ព្រះពុទ្ធ ដូចមានចែងក្នុងរដ្ឋធម្មនុញ្ញឆ្នាំ១៩៩៣ ។ លោក ជំរុញឱ្យរដ្ឋាភិបាល គួរនាំគ្នាគោរពឆន្ទ:ប្រជាជាតិខ្មែរ និងកសាងសង្គមតាមឆន្ទ:រាស្ត្រឡើងវិញ៕