34.8 C
Phnom Penh

លោក ហ៊ុន សែន អំពាវនាវ​ឱ្យ​ពល​ដ្ឋ​ចូលរួម​ទប់ស្កាត់​ការ​ឆ្លង​ជំងឺ​កូ​វីដ១៩ អំឡុង​ពេលឈប់សម្រាក៥ថ្ងៃ​

ដោយ ឌឹ ខេមបូឌា ដេលី

បទវិភាគ

លោកនាយក​រដ្ឋមន្ត្រី​ហ៊ុន សែន បាន​អំពាវនាវ​បន្ថែម​ទៀត សូម​ថែរក្សា​សុវត្ថិភាព​សុខភាព​ចៀសវាង​ការ​ឆ្លង​ជំងឺ​កូ​វីដ១៩ អំឡុង​ពេល​នៃ​ការ​ឈប់សម្រាក​ពី​ថ្ងៃទី១៧ខែសីហា ដល់​ថ្ងៃទី ២១ ខែសីហា។ លើកឡើង​នៅ​ថ្ងៃច័ន្ទ​នេះ លោក​ហ៊ុន សែន បាន​ប្រាប់​ពលរដ្ឋ​ពី​វិធីការ​ពារ​មួយចំនួន ដូចជា​សម្អាត​រថយន្ត​ជាប្រចាំ ពាក់​ម៉ាស់​ជាប់​ជានិច្ច លាងដៃ​ឱ្យ​បាន​ញឹកញាប់ រក្សា​គម្លាត​សុវត្ថិភាព​ចៀសវាង​ធ្វើដំណើរ​ជាមួយ​អ្នកមាន​អាការៈ​ក្តៅ​ខ្លួន និង​មាន​បញ្ហា​ផ្លូវដង្ហើម ព្រមទាំង​ស្តាប់​តាម​ការណែនាំ​របស់ក្រ​សួង​សុខាភិបាល​ជាដើម។

ក្រៅពី​សុវត្ថិភាព​សុខភាព លោកនាយក​រដ្ឋមន្ត្រី ក៏​ស្នើ​ឱ្យ​អ្នកបើកបរ​មានការ​ប្រុងប្រយ័ត្ន យោគយល់​អោយ​គ្នា​ទៅវិញទៅមក ហើយ​គោរពច្បាប់​ចរាចរ​ទាំងអស់គ្នា ចៀសវាង​កុំ​អោយ​មានការ​សោក​ស្តាយ​នៅក្នុង​ថ្ងៃឈប់​សម្រាក ដោយសារ​បញ្ហា​គ្រោះថ្នាក់​ចរាចរណ៍។ជាមួយគ្នា​នេះ លោក​ក៏​ជំរុញ​ឱ្យ​អាជ្ញាធរ​មានសមត្ថកិច្ច​ទាំងអស់ ត្រូវ​យកចិត្ត​ទុកដាក់​ការពារ​សុខ​សុវត្ថិភាព​ជូន​បងប្អូន​ប្រជាពលរដ្ឋ និង​ភ្ញៀវ​ទេសចរ​អោយ​បាន​ល្អ​នៅក្នុង​ថ្ងៃឈប់​សម្រាក​ចាប់ពី​ថ្ងៃទី ១៧ ដល់ ២១ សីហា ២០២០ ដែល​ជា​ថ្ងៃ​រដ្ឋាភិបាល​អនុញ្ញាត​ឱ្យ​ពលរដ្ឋ​ឈប់​សង​ថ្ងៃសម្រាក​អំឡុង​ពេល​បុណ្យចូលឆ្នាំ​ថ្មី​ប្រពៃណី​ជាតិខ្មែរ ដែល​ត្រូវ​បាន​ខកខាន​ឈប់សម្រាក​ដោយសារ​វិធានការ​ទប់ស្កាត់​ការ​ឆ្លង​រីក​រាលដាល​ជំងឺ​កូ​វីដ១៩នោះ។

សេចក្តី​ប្រកាស​ព័ត៌មាន​របស់ក្រ​សួង​សុខាភិបាល​នៅ​ថ្ងៃ​ចន្ទ​ទី១៧ខែសីហា​នេះ បញ្ជាក់​ថា មិន​មាន​ករណី​ឆ្លង​ថ្មី​នៃ​មេរោគ​កូ​វីដ១៩ ហើយក៏​មិន​មាន​ករណី​ព្យាបាល​ជាសះស្បើយ​ដែរ។ក្រសួងសុខាភិបាល​បញ្ជាក់​ថា អ្នក​ឆ្លង​ជំងឺ​កូ​វីដ១៩ សរុប​មាន​ចំនួន២៧៣នាក់ និង​ព្យាបាល​ជាសះស្បើយ​មាន​ចំនួន២៣៨នាក់ ឬស្មើនឹង​ជាង៨៧ភាគរយ ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស