លោក Yoshihide Suga ដែលទើបចូលកាន់តំណែងជានាយករដ្ឋមន្រ្ដីជប៉ុន បានសន្យានៅចំពោះមុខសមាជិកអាស៊ានមួយចំនួនថា រដ្ឋាភិបាលរបស់លោកនឹងជួយពង្រឹងស្មារតីនៃសមាគមអាស៊ានក្នុងការទប់ទល់ក្នុងជម្លោះដែនទឹកនៃសមុទ្រចិនខាងត្បូង។
ទីភ្នាក់ងារសារព័ត៌មាន AFP ចុះផ្សាយថា លោក Suga បានបញ្ជាក់ជំហរដូច្នេះនៅក្នុងពេលដែលលោកបិទបញ្ចប់ដំណើរទស្សនកិច្ចរបស់លោកនៅក្នុងប្រទេសឥណ្ឌូនេស៊ីកាលពីថ្ងៃទី២២ ខែតុលា។
នៅចំពោះមុខប្រធានាធិបតីឥណ្ឌូនេស៊ីលោក ចូកូវីដូដូ លោកនាយករដ្ឋមន្រ្ដីជប៉ុនបានបង្ហាញការប្រឆាំងរបស់ប្រទេសជប៉ុនចំពោះសកម្មភាពណាមួយដែលបង្កើនភាពតានតឹងនៅសមុទ្រចិនខាងត្បូង ឬនៅសមុទ្រចិនខាងកើត។
ក្នុងដំណើរទស្សនកិច្ចរយៈពេល៤ថ្ងៃទៅកាន់ប្រទេសធំពីរនៃសមាគមអាស៊ាន លោកនាយករដ្ឋមន្រ្ដី Yoshihide Suga ដែលទើបចូលកាន់តំណែងដ៏កំពូលនៃប្រទេសជប៉ុនកាលពីមួយខែមុននេះបានចាប់យកប្រទេសវៀតណាម និងឥណ្ឌូនេស៊ីធ្វើទស្សនកិច្ចលើកដំបូងរបស់លោកនៅក្រៅប្រទេស។
ក្នុងទស្សនកិច្ចនៅតំបន់អាស៊ាន គឺត្រូវបានគេមើលឃើញថា មេដឹកនាំជប៉ុនរូបនេះបានបង្កើនការខិតខំប្រឹងប្រែងរបស់ខ្លួនខ្លាំងថែមទៀតជាមួយនឹងសមាគមអាស៊ានដើម្បីទប់ទល់ឥទ្ធិពល និងការវាតទីរបស់ចិននៅក្នុងតំបន់អាស៊ី។
នៅទីក្រុង ចាកាតា (JAKATA) លោកបានប្រាប់ក្រុមអ្នកសារព័ត៌មានថា ប្រទេសជប៉ុនប្រឆាំងដាច់ខាតរាល់សកម្មភាពទាំងឡាយណាដែលវាតទីកាន់កាប់ដែនទឹកនៅក្នុងតំបន់ ហើយសម្រាប់ជប៉ុនខិតខំឱ្យមានដំណោះស្រាយដោយសន្ដិវិធីដោយផ្អែកលើច្បាប់អន្ដរជាតិ។
ដំណើរទស្សនកិច្ចរបស់នាយករដ្ឋមន្រ្ដីជប៉ុនបានធ្វើឡើងបន្ទាប់បីលោកបានជួបប្រជុំសន្និសីទក្រុមប្រទេស Quad ជាមួយប្រទេសធំ ៣ទៀត គឺអូស្រ្ដាលី ឥណ្ឌា និង អាមេរិករួមនឹងជប៉ុនខ្លួនគេផ្ទាល់ ដែលប្រទេសបួននេះសន្យារួមគ្នាទប់ទល់ឥទ្ធិពលរបស់ចិននៅក្នុងតំបន់។ប៉ុន្ដែនាយករដ្ឋមន្រ្ដីជប៉ុនបានអះអាងថា ជប៉ុនមិនចង់ឃើញវត្តមានកងទ័ពនៃអង្គការណាតូនៅក្នុងតំបន់អាស៊ីនោះទេ។ លោកបញ្ជាក់ទៀតថា ក្នុងនាមជានាយករដ្ឋមន្រ្ដីបន្ដតំណែងពីលោក ស៊ីនសូអាបេ គឺលោកនៅតែពិនិត្យឡើងវិញនូវគោលនយោបាយរបស់លោក អាបេ ហើយត្រូវតែពង្រឹងគោលនយោបាយនេះឱ្យបានខ្លាំងក្លា និងមានប្រសិទ្ធភាព។
លោកបញ្ជាក់ថាជប៉ុនត្រូវតែប្ដេជ្ញាការពារសន្ដិសុខតំបន់ដោយសហការជាមួយប្រទេសមួយចំនួន។ នាយករដ្ឋមន្រ្ដីជប៉ុនរូបនេះមិនបាននិយាយចំឈ្មោះប្រទេសចិននោះទេ ប៉ុន្ដែរាល់សម្ដីរបស់លោកទាំងអស់មើលទៅគ្មានអ្វីក្រៅពីប្រទេសចិននោះទេ។ ក្នុងដំណើរទស្សនកិច្ចនៅប្រទេសឥណ្ឌូនេស៊ីលោកបានជួបភ្លាមៗជាមួយនឹងប្រធានាធិបតី ចូកូវីដូដូ ដោយភាគីទាំងពីរបានព្រមព្រៀងគ្នាបង្កើនកិច្ចសហប្រតិបត្តិការផ្នែកការពារជាតិនិងសន្ដិសុខតំបន់។
មុននឹងមកដល់ទីក្រុងចាកាតា (JAKATA) នាយករដ្ឋមន្រ្ដីជប៉ុនរូបនេះ បានទៅធ្វើទស្សនកិច្ចនៅវៀតណាម។
ក្នុងដំណើរទស្សនកិច្ចនោះលោកបានជួបជាមួយនឹងនាយករដ្ឋមន្រ្ដីវៀតណាម ង្វៀងស៊ុនហ្វុក ប៉ុន្ដែកាសែតជប៉ុនNikkei Asian Review ចុះផ្សាយថា ភាគីទាំងពីរបានព្រមព្រៀងជាគោលការណ៍ជាមួយគ្នានូវមុខជំនួញអាវុធ គឺប្រទេសវៀតណាមបានសម្រេចទិញអាវុធបន្ថែមទៀតពីប្រទេសជប៉ុន។
មុនមកដល់របស់នាយករដ្ឋមន្រ្ដីជប៉ុននៅទីក្រុងហាណូយ រដ្ឋាភិបាលជប៉ុនបានបញ្ចូននាវាចម្បាំងរបស់ខ្លួនចំនួនបីគ្រឿងមកចូលចតនៅមូលដ្ឋានកងទ័ពជើងទឹករបស់វៀតណាមនៅខេមរ៉ាញ។
នាវាចម្បាំងរបស់ប្រទេសជប៉ុនទាំងបីគ្រឿងនេះ ត្រូវបោះទីតាំងនៅមូលដ្ឋានទ័ពជើងទឹករបស់ប្រទេសវៀតណាម គឺរហូតតដល់ទៅ១ខែដោយបានធ្វើសមយុទ្ធនាវាជើងទឹកជាមួយកងនាវាចម្បាំងរបស់សហរដ្ឋអាមេរិកទៀតផង។
ទស្សនកិច្ចរបស់នាយករដ្ឋមន្រ្ដីជប៉ុនមកកាន់ប្រទេសធំ២នៃសមាគមអាស៊ានដោយសន្យាថា ជួយសមាគមនេះក្នុងការទប់ទល់ឥទ្ធិពលរបស់ចិន កើតឡើងទន្ទឹមនឹង ចិនបង្កើនការវាតទីដោយពង្រឹងកងទ័ពរបស់ចិនក្នុងការធ្វើសកម្មភាពសមយុទ្ធនៅសមុទ្រចិនខាងត្បូងនិងនៅច្រកសមុទ្រកោះតៃវ៉ាន់។
ប្រទេស ជប៉ុនខ្លួនគេផ្ទាល់ក៏កំពុងតស៊ូប្រឆាំងនឹងការវាតទីកាន់ពីសំណាក់កងនាវាចម្បាំងនៃប្រទេសចិនផងដែរ នៅក្នុងជំលោះដែនទឹក នៅសមុទ្រចិនខាងតកើត។ ចិនបានអះអាងថា ប្រជុំកោះ ដាយយូ ដែលសម្បូរដោយ ជីវចម្រុះ គឺជាដែនទឹករបស់ចិន មានរាប់ពាន់ឆ្នាំមកហើយ ប៉ុន្តែជប៉ុនបានកាន់កាប់យក នៅក្នុងសង្ត្រាមលោកលើកទី២។
ប្រជុំកោះនោះ ភាសាជប៉ុនហៅ សេនកាគូ ហើយជប៉ុន ក៏បានអះអាងថា គឺជាដែនទឹកប្រវត្តិសាស្ត្ររបស់ខ្លួន។ ប៉ុន្តែសម្រាប់ជម្លោះក្នុងដែន សមុទ្រចិនខាងត្បូង ជាមួយប្រទេសចិន គឺមិនមានតែ វៀតណាមនោះទេ គឺហ្វីលីពីន ម៉ាឡេស៊ី ព្រុយណេ និងចុងក្រោយគឺប្រទេសឥណ្ឌូនេស៊ី ហើយសម្រាប់សហរដ្ឋអាមេរិកជាភាគីក្រៅតំបន់៕