30.1 C
Phnom Penh

អាមេរិកផ្តល់ថវិកា ជាង ១១ លានដុល្លាដល់កម្ពុជា ជាជំនួយច្រើនជាងប្រទេសដទៃ ទាក់ទងការប្រយុទ្ធប្រឆាំងកូវីដ១៩

ដោយ ឌឹ ខេមបូឌា ដេលី

បទវិភាគ

សហរដ្ឋអាមេរិកអះអាងថា គិតចាប់តាំងពីជំងឺរាតត្បាតជាសាកលកូវីដ១៩ បានចាប់ផ្តើមកើតមានមក រដ្ឋាភិបាលរបស់ខ្លួន បានផ្តល់ថវិកាចំនួនជាង ១១ លានដុល្លា ដើម្បីប្រយុទ្ធប្រឆាំងនឹងមេរោគកូវីដ១៩ ដល់កម្ពុជា ដែលមានចំនួនច្រើនជាងប្រទេសជាដៃគូដទៃណាទាំងអស់។

ទំព័រហ្វេសប៊ុករបស់ស្ថានទូតអាមេរិកប្រចាំកម្ពុជា បានសរសេរនៅថ្ងៃសុក្រនេះ ថា ទីភ្នាក់ងារការពារ និងកម្ចាត់ជំងឺរបស់សហរដ្ឋអាមេរិក និងទីភ្នាក់ងារផ្នែកសុខភាពសាធារណៈដទៃទៀត របស់សហរដ្ឋអាមេរិក មានភាពជាដៃគូដ៏យូរ ជាមួយក្រសួងសុខាភិបាលកម្ពុជា និងអង្គការស្ថាប័នពាក់ព័ន្ធដទៃទៀត។ ក្នុងនោះ រួមមានកម្មវិធីកសាងសមត្ថភាពក្នុងការតាមរកអ្នកមានការពាក់ព័ន្ធ និងអង្កេតមើលជំងឺ ឆ្លង។ ជាមួយគ្នានេះ ស្ថានទូតសហរដ្ឋអាមេរិក និងបុគ្គលិករបស់ខ្លួនគោរពយ៉ាងខ្ជាប់ខ្ជួន តាមគោលណែនាំទាំងអស់ទាក់ទងនឹងសុខភាពសាធារណៈរបស់កម្ពុជា។

ប្រភពដដែលបន្តថា ភាពជាដៃគូរបស់អាមេរិក ជាមួយនឹងប្រជាជនកម្ពុជាមានច្រើនរូបភាព សូម្បីនៅក្នុងអំឡុងពេលដែលមេរោគនេះកំពុងរាតត្បាតជាសាកលក្តី ក៏សហរដ្ឋអាមេរិកបានរួមចំណែកនូវថវិកាចំនួន ៧សែន ដុល្លា ដែរ សម្រាប់បំពេញតម្រូវការក្នុងគ្រាបន្ទាន់ នៅតាមសហគមន៍ ដែលរងការប៉ះពាល់ដោយទឹកជំនន់ដ៏ធ្ងន់ធ្ងរកាលពីពេលថ្មីៗនេះ។

ស្ថានទូតអាមេរិកបញ្ជាក់ថា ចាប់តាំងពីឆ្នាំ ១៩៩២ មក អាមេរិកបានចំណាយថវិកាចំនួនជាង ២ ពាន់លានដុល្លា នៅកម្ពុជា តាមរយៈកម្មវិធីលើកកម្ពស់សុខភាព ការអប់រំ កសិកម្ម ការការពារបរិស្ថាន ការពង្រឹងអភិបាលកិច្ច និងសិទ្ធិមនុស្ស។ ជាងនេះទៅទៀតសហរដ្ឋអាមេរិកនៅតែប្តេជ្ញាចិត្តផ្តល់ការគាំទ្រដល់សេចក្តីប្រាថ្នារបស់ប្រជាជនកម្ពុជា ដែលចង់ឲ្យមានអនាគតមួយប្រកបទៅដោយសុខភាពល្អ វិបុលភាព និងលទ្ធិប្រជាធិបតេយ្យ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស