ចលនានិស្សិតដើម្បីលទ្ធិប្រជាធិបតេយ្យ បានចេញលិខិតមួយនៅថ្ងៃទី៤ ខែមករា ឆ្នាំ២០២១ ពីរដ្ឋធានីវ៉ាស៊ីនតោន សហរដ្ឋអាមេរិក ដោយសម្គាល់ឃើញថា លទ្ធិប្រជាធិបតេយ្យនៅក្នុងប្រទេសកម្ពុជា បានធ្លាក់នៅក្នុងស្ថានការណ៍ពិបាកសង្គ្រោះបំផុត។ លិខិតដដែលសរសេរថា សិទ្ធិសេរីភាពរបស់ប្រជាពលរដ្ឋខ្មែរ កំពុងជាប់ទ្រុងនៃអំណាចអាជ្ញាទំនើងចិត្តរបស់លោក ហ៊ុន សែន ដែលធ្វើឲ្យពលរដ្ឋរងទុក្ខវេទនា និងអសន្តិសុខកើតឡើងពេញប្រទេសយ៉ាងអយុត្តិធម៌ ហើយស្ថានការណ៍សេដ្ឋកិច្ចជាតិកាន់តែធ្លាក់ដុនដាបក្រោមការក្ដោបក្ដាប់ទាំងស្រុង ដោយសមាជិកគ្រួសារលោកនាយករដ្ឋមន្ត្រី។
លោក ទូច វិបុល ប្រធានប្រតិបត្តិចលនានិស្សិតដើម្បីលទ្ធិប្រជាធិបតេយ្យ បានសរសេរទៀតថា អំណាចកំពូលរបស់រដ្ឋដែលបម្រើប្រជាពលរដ្ឋនោះ គឺស្ថិតនៅក្រោមការគ្រប់គ្រងរបស់បុគ្គលដឹកនាំផ្ដាច់ការតែម្នាក់ ហើយពលរដ្ឋកាន់តែរងគ្រោះ ព្រមទាំងស្ថាប័នសារព័ត៌មានឯករាជ ក៏រដ្ឋបាលលោក ហ៊ុន សែន កម្ចាត់ចេញពីប្រទេសដែរ។
ក្នុងលិខិតបញ្ជាក់ទៀតថា នៅមានស្ថាប័នព័ត៌មានតិចតួចផ្សាយពីក្រៅប្រទេសប៉ុណ្ណោះដែលអាចឲ្យពលរដ្ឋបញ្ចេញសំឡេង និងផ្សព្វផ្សាយព័ត៌មានពិតប្រាកដជូនដល់ប្រជាពលរដ្ឋទូលំទូលាយ ក្នុងនោះសារព័ត៌មាន The Cambodia Daily បានរួមចំណែកយ៉ាងច្រើន ក្នុងការផ្ដល់ប្រភពព័ត៌មាន គួរជាទីទុកចិត្ត សម្រាប់ប្រជាពលរដ្ឋខ្មែរ ពិចារណាលើទិដ្ឋភាពសង្គមនយោបាយ ថ្លឹងតុល្យភាពជាមួយបណ្ដាញស្ថាប័នព័ត៌មានមួយចំនួនធំដែលមាននិន្នាការក្រុមបក្ខពួក បុគ្គល ស្ទើរផ្ដាច់មុខនោះ៕