មន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន GDP អះអាងថា សេរីភាពសារព័ត៌មាននៅកម្ពុជា សព្វថ្ងៃនេះត្រូវបានរឹតបន្តឹងកាន់តែខ្លាំងឡើងៗ ដែលផ្ទុយទៅនឹងខ្លឹមសារនៃរដ្ឋធម្មនុញ្ញរបស់ប្រទេសទាំងស្រុង។
អគ្គលេខាធិការគណបក្សប្រជាធិបតេយ្យមូលដ្ឋាន បណ្ឌិត សាម អ៊ីន បានប្រាប់សារព័ត៌មាន The Cambodia Daily នៅថ្ងៃនេះថា ក្រោយព្រឹត្តិការណ៍ ១៦វិច្ឆិកា ឆ្នាំ២០១៧ សេរីភាពសារព័ត៌មាននៅកម្ពុជាត្រូវបានរឹតបន្តឹងកាន់តែខ្លាំងឡើងៗ ខណៈអ្នកសារព័ត៌មានមួយចំនួនត្រូវបានទទួលរងការគំរាមកំហែង ធ្វើទុក្ខបុកម្នេញ និងចាប់ដាក់គុក ជាបន្តបន្ទាប់។
លោកអះអាងថា ការបើកទូលាយលើសេរីភាពសារព័ត៌មាន ពិតជាមានសារៈសំខាន់ខ្លាំងណាស់ នៅក្នុងដំណើរការកសាងសង្គមប្រជាធិបតេយ្យ ដូច្នេះលោកសូមគាំទ្រដល់ការទាមទាររបស់អង្គការសមាគម ដើម្បីឱ្យមានការបើកទូលាយសេរីភាពសារព័ត៌មានឡើងវិញ និងការការពារសុវត្ថិភាពដល់អ្នកសារព័ត៌មានទាំងនោះ។
ការអះអាងនេះ ធ្វើឡើងបន្ទាប់ពីអង្គការសមាគមន៍ អ្នកសារព័ត៌មាន និងអង្គការសង្គមស៊ីវិល សហការគ្នាបើកយុទ្ធនាការចូលរួមប្រារព្ធទិវាសេរីភាពសារព័ត៌មាន ពិភពលោកឆ្នាំ២០២១នេះ។
មជ្ឈមណ្ឌលសិទ្ធិមនុស្សកម្ពុជា CCHR បានចេញសេចក្តីថ្លែងការណ៍របស់ខ្លួននៅថ្ងៃទី២៧ ខែមេសា ឆ្នាំ២០២១ ដោយអះអាងថា ទិវាសេរីភាពសារព័ត៌មានពិភពលោក ដែលនឹងធ្វើឡើងនូវថ្ងៃទី៣ ខែឧសភា ឆ្នាំ២០២១ ដើម្បីគោរពដល់តួនាទីដ៏សំខាន់របស់អ្នកសារព័ត៌មាន ដែលត្រូវប្រឈមអាយុជីវិត ក្នុងការងបំពេញតួនាទីរបស់ខ្លួន។
អង្គការសមាគមន៍ទាំងនេះ បានអះអាងថា យុទ្ធនាការក្នុងការចូលរួមប្រារព្ធទិវាសេរីភាពសារព័ត៌មាន ពិភពលោកឆ្នាំ២០២១នេះ មានគោលបំណង ឆ្លុះបញ្ចាំងពីសារៈសំខាន់ និងជំរុញឲ្យមានការចូលរួមពីសាធារណជន ក្នុងការលើកកម្ពស់សេរីភាពសារព័ត៌មាននៅកម្ពុជាឲ្យកាន់តែល្អប្រសើរ ក្រោមប្រធានបទ ព័ត៌មានដែលជាប្រយោជន៍សាធារណៈ។
សេចក្តីថ្លែងការដដែលរិះគន់ថា ការកំណត់មុខសញ្ញាអ្នកសារព័ត៌មានឯករាជពីសំណាក់រដ្ឋាភិបាលកម្ពុជា នៅតែបន្តកើនឡើង ក្នុងនោះ អ្នកសារព័ត៌មានមួយចំនួន រងការវាយប្រហារ លើរូបរាងកាយ រងការធ្វើឃាត ការដកហូតអាជ្ញាប័ណ្ណផ្សព្វផ្សាយ និងការយាយីពីប្រព័ន្ធតុលាការ ដែលទាំងនោះសុទ្ធសឹងតែជាវិធីសាស្ត្រ បំបិទសំឡេងអ្នករិះគន់។
មជ្ឈមណ្ឌលសិទ្ធិមនុស្សកម្ពុជា សង្កត់ធ្ងន់ថា ក្នុងបរិបទនៃការរាតត្បាតនៃជំងឺ Covid-19នេះ អាជ្ញាធរបានរឹតបន្តឹងនឹងមិនអត់ឱនចំពោះសំឡេងរិះគន់ ខណៈអ្នកសារព័ត៌មានឯករាជទាំងនោះកាន់តែងាយរងគ្រោះពីការយាយី និងចោទប្រកាន់តាមផ្លូវតុលាការ ចំពោះការរាយការណ៍ដែលមានការពាក់ព័ន្ធនឹងប្រធានបទជំងឺ Covid-19។
ទិន្នន័យសង្គមស៊ីវិល បានបង្ហាញថា កាលពីចុងឆ្នាំ២០២០ អ្នកសារព័ត៌មានប្រហែល ៧០នាក់ ត្រូវបានរងការយាយីតាមប្រព័ន្ធតុលាការដោយសារការធ្វើសេចក្តីរាយការណ៍របស់ពួកគេ លើសពីនេះ ក៏មានការវាយប្រហារ និងការគំរាមកំហែងថែមទៀត ជាងនេះទៀត រយៈពេលទសវត្សចុងក្រោយនេះ អ្នកសារព័ត៌មានក៏ឃាតកសម្លាប់ក្នុងបេសកកម្មរបស់ខ្លួន ដោយមិនអាចវែកមុខជនដៃដល់យកមកផ្ដន្ទាទោសបានឡើយ។
អង្គការអ្នកសារព័ត៌មានគ្មានព្រំដែន (RSF) អះអាងកាលពីចុងឆ្នាំ២០២០ ថា សេរីភាពសារព័ត៌មាននៅកម្ពុជា បានថយចុះជាលំដាប់ គឺទទួលបានចំណាត់ថ្នាក់លេខ១៤៤ ក្នុងចំណោមប្រទេសចំនួន១៨០ បើប្រៀបធៀបនឹងឆ្នាំ២០១៩ ដែលជាប់ចំណាត់ថ្នាក់លេខ១៤៣ និងឆ្នាំ២០១៨ ជាប់ចំណាត់ថ្នាក់១៤២ ពោលសេរីភាពសារព័ត៌មាននៅកម្ពុជា បានធ្លាក់ចុះយ៉ាងធ្ងន់ធ្ងរ។
រដ្ឋធម្មនុញ្ញកម្ពុជាតាមមាត្រា ៤១ បានចែងថា ពលរដ្ឋខ្មែរ មានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មានសេរីភាពខាងការបោះពុម្ពផ្សាយ និងសេរីភាពខាងការជួបប្រជុំជាដើម៕