29 C
Phnom Penh

ប្រធាន​ចលនា​យុវជន​បក្ស​ប្រឆាំង​ប្រកាស​បញ្ចប់​អាណត្តិ​របស់​ខ្លួន​នៅ​កូរ៉េ

ដោយ ឌឹ ខេមបូឌា ដេលី

បទវិភាគ

ប្រធាន​ចលនា​យុវជន​គណបក្ស​សង្គ្រោះ​ជាតិ​ប្រចាំ​ប្រទេស​កូរ៉េ​ខាងត្បូង ប្រកាស​ពី​ការ​បញ្ចប់​អាណត្តិ​របស់​ខ្លួន បន្ទាប់ពី​បាន​ចូលរួម​ជាមួយ​ចលនា​បក្ស​ប្រឆាំង​អស់​រយៈពេល ២​អាណត្តិ​មាន​រយៈពេល ១០​ឆ្នាំ​ដោយ​គិត​ចាប់តាំង​ពី​ឆ្នាំ​២០១១ រហូត​ដល់​ឆ្នាំ​២០២១ នេះ។

អតីត​ប្រធាន​ប្រតិបត្តិ​នៃ​ចលនា​យុវជន​បក្ស​សង្គ្រោះ​ជាតិ​ប្រចាំ​ប្រទេស​កូរ៉េ​ខាងត្បូង លោក យឹម ស៊ីណន បាន​សរសេរ​លើ​គណនី​ហ្វេសប៊ុក (Facebook) របស់​លោក​នៅ​ថ្ងៃ​ទី​២ ខែ​មិថុនា ឆ្នាំ​២០២១ នេះ​ថា រយៈពេល​ជាច្រើន​ឆ្នាំ​កន្លង​មក​នេះ លោក​ពិតជា​មាន​មោទនភាព​ខ្លាំង​ណាស់​ដែល​មាន​ឱកាស​បាន​ចូលរួម​ជាមួយ​ពលករ​ខ្មែរ​ក្នុង​ប្រទេស​កូរ៉េ ក្នុង​ការ​ការពារ​លើកស្ទួយ​សិល្បៈ​វប្បធម៌​ជាតិ យុត្តិធម៌​សង្គម សិទ្ធិមនុស្ស និង​ប្រជាធិបតេយ្យ​សម្រាប់​កម្ពុជា​ជាដើម។

លោក​អះអាង​ថា បើ​ទោះ​គ្រប់​សកម្មភាព​របស់​លោក​កន្លង​មក​រួម​ជាមួយ​ពលករ​ខ្មែរ​នៅ​ប្រទេស​កូរ៉េ​ខាងត្បូង ត្រូវ​បាន​រដ្ឋាភិបាល​កម្ពុជា​ចោទ​ថា​ជា​ទង្វើ​ខុស​ច្បាប់ ឬ​ក្បត់​ជាតិ​យ៉ាងណាក៏ដោយ ប៉ុន្តែ​គ្រប់យ៉ាង គឺ​លោក​ធ្វើ​ទៅ​តាម​បែបបទ​ច្បាប់​ជាតិ និង​អន្តរជាតិ តស៊ូ​មតិ​ដោយ​អហិង្សា មិន​មាន​ចេតនា​ណាមួយ​បំផ្លាញ​ជាតិ និង​ផលប្រយោជន៍​ពលរដ្ឋ​ខ្មែរ​នោះ​ទេ។

លោក​បញ្ជាក់​ថា កិច្ចការ​ដែល​លោក​បាន​ដឹកនាំ​ពលករ​ខ្មែរ​កន្លង​មក គឺ​ដើម្បី​ផលប្រយោជន៍ និង​ដើម្បី​រក​យុត្តិធម៌​ជូន​កម្មករ​ដែល​រង​ការជិះជាន់​តែ​ប៉ុណ្ណោះ ជាពិសេស​ក្នុង​ការចូលរួម​ទប់ស្កាត់​បំបាត់​នូវ​អំពើ​ជិះជាន់​របស់​មន្ត្រី​ទូត​ខិលខូច​មួយ​ចំនួន ដែល​បាន​កេង​ចំណេញ​លើ​ភាព​ហត់នឿយ​របស់​ពលករ​ខ្មែរ​ចំណាកស្រុក​នៅ​ប្រទេស​កូរ៉េ​ខាងត្បូង​នេះ​តែម្តង។

ការ​អះអាង​នេះ ធ្វើ​ឡើង​ស្របពេល​ដែល​អតីត​ប្រធាន​ប្រតិបត្តិ​នៃ​ចលនា​យុវជន​បក្ស​សង្គ្រោះ​ជាតិ​នៅ​កូរ៉េ​ខាងត្បូង បាន​ប្រកាស​ជា​ផ្លូវការ​ស្ដីពី​ការ​បញ្ចប់​តួនាទី​របស់​ខ្លួន​ដែល​បាន​ចូលរួម​ជាមួយ​គណបក្ស​ប្រឆាំង​កន្លង​មក។

ក្នុង​នាម​ជា​ប្រធាន​ចលនា​យុវជន​បក្ស​ប្រឆាំង លោក យឹម ស៊ីណន តែង​ដឹកនាំ​យុវជន​គណបក្ស​សង្គ្រោះ​ជាតិ​ប្រចាំ​សាធារណរដ្ឋ​កូរ៉េ​ខាងត្បូង ប្រឆាំង​ទៅ​នឹង​ការ​ដឹកនាំ​ផ្ដាច់ការ​របស់​លោក ហ៊ុន សែន ដែល​តែង​គាបសង្កត់ និង​បំបិទ​សេរីភាព​បញ្ចេញ​មតិ​របស់​ពលរដ្ឋ​នៅ​ប្រទេស​កម្ពុជា​នា​ពេល​កន្លង​មក។

ជុំវិញ​បញ្ហា​នេះ កាលពី​ថ្ងៃ​ទី​៦ ខែ​វិច្ឆិកា ឆ្នាំ​២០១៩ លោក យឹម ស៊ីណន ត្រូវ​បាន​តុលាការ​ក្រុង​ភ្នំពេញ​ចេញ​ដីកា​ឱ្យ​ចាប់​ខ្លួន​លោក ដោយ​ចោទ​ប្រកាន់​ពី​បទ​រួម​គំនិត​ក្បត់ និង​ញុះញង់​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម ដែល​ខុស​ទៅ​នឹង​មាត្រា​៤៩៥ នៃ​ក្រម​ព្រហ្មទណ្ឌ។ មក​ទល់​នឹង​ខែ​មិថុនា ឆ្នាំ​២០២១ នេះ លោក យឹម ស៊ីណន នៅតែ​ស្ថិត​នៅ​ក្នុង​ការ​តាម​ចាប់​ខ្លួន​របស់​អាជ្ញាធរ​កម្ពុជា​តាម​អំណាច​សាល​ដីកា​សាលាដំបូង​រាជធានី​ភ្នំពេញ​នៅឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស