សមត្ថកិច្ចនគរបាលស្រុកក្រគរ ខេត្តពោធិ៍សាត់ បានឲ្យដឹងថា យ៉ាងហោចណាស់មានមនុស្សចំនួន ៧នាក់បានស្លាប់ជាបន្តបន្ទាប់ និងមនុស្សជាង ៣០នាក់ទៀតកំពុងសង្គ្រោះបន្ទាន់នៅមន្ទីរពេទ្យចាប់ពីថ្ងៃទី០២ ខែមិថុនា ឆ្នាំ២០២១ មក ដោយសង្ស័យពុលស្រាស។
សមត្ថកិច្ចនគរបាលស្រុកក្រគរ បញ្ជាក់ក្នុងរបាយការណ៍បឋមថា ករណីសង្ស័យពុលស្រាសខាងលើនេះ បានកើតឡើងបន្ទាប់ពីមានពលរដ្ឋបានជួបជុំគ្នាផឹកស្រាសនៅក្នុងកម្មវិធីកំដរបុណ្យសពមួយកន្លែងស្ថិតក្នុងមូលដ្ឋានស្រុកក្រគរ កាលពីប៉ុន្មានថ្ងៃកន្លងមកនេះ ដែលបណ្តាលឱ្យមានមនុស្សដែលចូលរួមផឹកស្រាសក្នុងពិធីបុណ្យសពនោះបានស្លាប់ជាបន្តបន្ទាប់។
សមត្ថកិច្ចបញ្ជាក់ថា ក្នុងចំណោមពលរដ្ឋរងគ្រោះបាត់បង់ជីវិតទាំង ៧នាក់នោះ គឺស្ត្រីភេទទាំងអស់។ សមត្ថកិច្ចបញ្ជាក់ថា បច្ចុប្បន្នអ្នកសង្ស័យដែលជាអ្នកបិទ ឬផលិតស្រាសម្នាក់ឈ្មោះ ទ្រី វណ្ណា ភេទស្រី អាយុ ៥៤ឆ្នាំ រស់នៅភូមិសានស ឃុំអន្សាចំបក់ ត្រូវបានសមត្ថកិច្ចឃាត់ខ្លួននាំយកមកសាកសួរនៅអធិការដ្ឋាននគរបាលស្រុកក្រគរ ដើម្បីស្រាវជ្រាវ និងឈានទៅបន្តនីតិវិធីច្បាប់។
សមត្ថកិច្ចក៏បានដកហូតវត្ថុតាងស្រាសមួយចំនួន ដើម្បីបញ្ជូនទៅឱ្យមន្ត្រីសុខាភិបាលពិនិត្យ និងវិភាគ ហើយពេលនេះសមត្ថកិច្ច និងគ្រួសារជនរងគ្រោះកំពុងរង់ចាំមើលលទ្ធផលនេះនៅឡើយ។
កាលពីពេលថ្មីៗកន្លងមកនេះ មានករណីពុលស្រាសចំនួន ២លើកហើយបានកើតឡើង គឺមានករណីនៅស្រុកល្វាឯម ខេត្តកណ្តាល និងមួយករណីទៀតនៅស្រុកកំពង់ត្រាច ខេត្តកំពត បណ្ដាលឱ្យមានមនុស្សស្លាប់ជាង ២០នាក់។
ទាក់ទិនបញ្ហានេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ក៏បានអំពាវនាវដល់ពលរដ្ឋរស់នៅតាមបណ្តារាជធានី-ខេត្តនានាទូទាំងប្រទេសកម្ពុជា សូមកុំពិសាស្រាស ឬស្រាថ្នាំដែលផលិតគ្មានបច្ចេកទេសត្រឹមត្រូវ ព្រោះនាំឱ្យប៉ះពាល់ដល់សុខភាពធ្ងន់ធ្ងរ និងឈានដល់ពុលស្លាប់។
លោក ម៉ម ប៊ុនហេង ក៏បានក្រើនរំឭកដល់ពលរដ្ឋ និងអ្នកពាក់ព័ន្ធ ត្រូវចូលរួមអនុវត្តតាមការណែនាំរបស់ក្រសួងសុខាភិបាល ដើម្បីបញ្ចៀសគ្រោះថ្នាក់ដល់អាយុជីវិតបណ្តាលមកពីការពិសាស្រាស និងស្រាថ្នាំ ដូចជាត្រូវឈប់ពិសាស្រាស ឬស្រាថ្នាំដែលបិទ ឬលាយសារធាតុដែលគ្មានបច្ចេកទេសត្រឹមត្រូវ និងគ្មានការត្រួតពិនិត្យ។
ចំពោះអ្នកប្រកបអាជីវកម្ម ហាមដាច់ខាតយកសារធាតុមេតាណុលមកលាយធ្វើស្រាសដែលបង្កឱ្យពុល និងស្លាប់។
លោកបន្តថា អាជ្ញាធរតាមមូលដ្ឋានស្រុក-ខេត្តនីមួយៗ ត្រូវចាត់តាំងកម្លាំងគ្រប់គ្រង និងទប់ស្កាត់ការលក់ស្រាបិទ ឬលាយគ្មានបច្ចេកទេសត្រឹមត្រូវ ព្រមទាំងណែនាំដល់ប្រជាពលរដ្ឋឱ្យចៀសវាងយកសារធាតុមេតាណុលមកលាយធ្វើស្រាស ដែលបង្កឲ្យពុល និងស្លាប់ជីវិតមនុស្សតទៅទៀត៕