 ហើយនៅថ្ងៃសុក្រ ទី៤ ខែមិថុនា។){kind=link}
គណៈកម្មាធិការអចិន្ត្រៃយ៍នៃរដ្ឋសភា អនុម័តយល់ព្រមតាមសំណើសុំលាលែងពីមុខតំណែងរបស់លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ហើយនៅថ្ងៃសុក្រ ទី៤ ខែមិថុនា។
ការអនុម័តនេះ ធ្វើឡើងបន្ទាប់ពីប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក បានសម្រេចចិត្តដាក់ពាក្យលាឈប់ពីតួនាទីរបស់លោកតាំងពីថ្ងៃទី០១ ខែមិថុនា ឆ្នាំ២០២១ មកម្ល៉េះ។
អគ្គលេខាធិការដ្ឋានរដ្ឋសភា បានចេញសេចក្តីប្រកាសព័ត៌មានស្ដីពីលទ្ធផលប្រជុំរបស់គណៈកម្មាធិការអចិន្ត្រៃយ៍រដ្ឋសភាកម្ពុជា នៅថ្ងៃទី៤ ខែមិថុនា ថា គណៈកម្មាធិការរដ្ឋសភាបានអនុម័តយល់ព្រមនូវពាក្យសុំលាឈប់ពីតួនាទី និងតំណែងជាប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក តាមសំណើរហើយនៅថ្ងៃទី៤ ខែមិថុនា។
ប្រភពដដែលអះអាងថា គណៈកម្មាធិការអចិន្ត្រៃយ៍រដ្ឋសភា ក៏បានអនុម័តនូវសេចក្តីព្រាងស្ដីពីការកំណត់នីតិវិធីនៃការជ្រើសរើសបេក្ខជនប្រធានគណៈកម្មាធិការជាតិរៀបចំការបោះឆ្នោតថ្មីជំនួសលោក ស៊ិក ប៊ុនហុក ក្នុងកិច្ចប្រជុំនេះផងដែរ។
កាលពីអំឡុងខែមេសា ឆ្នាំ២០១៥ លោក ស៊ិក ប៊ុនហុក ត្រូវបានរដ្ឋសភាជាតិកម្ពុជា បោះឆ្នោតតែងតាំងជាប្រធាន គ.ជ.ប ក្រោយការស្រុះស្រួលនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ ហើយលោកក៏ត្រូវបានទទួលតំណែងជាប្រធាន គ.ជ.ប តាំងពីពេលនោះរហូតមកដល់បច្ចុប្បន្ននេះ។
លោក ស៊ិក ប៊ុនហុក បានដឹកនាំ គ.ជ.ប អស់រយៈពេលជិត ៦ឆ្នាំ ដែលរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ ឆ្នាំ២០១៧ ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ ឆ្នាំ២០១៨ ការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ និងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ ឆ្នាំ២០១៩ ផងដែរ។
អគ្គហេរញ្ញិកគណបក្សខ្មែរស្រឡាញ់ជាតិ លោក សៀវ វិសុទ្ធ បានប្រាប់សារព័ត៌មាន The Cambodia Daily នៅថ្ងៃទី៤ ខែមិថុនា នេះថា ការលាឈប់របស់លោក ស៊ិក ប៊ុនហុក ជាគំរូល្អមួយសម្រាប់មន្ត្រីរដ្ឋាភិបាលផ្សេងទៀតដែលអាចឱ្យអ្នកមានសមត្ថភាពជំនាន់ក្រោយបញ្ចេញស្នាដៃ និងចូលរួមអភិវឌ្ឍប្រទេសរបស់ពួកគេ។
លោកអះអាងថា បើទោះបីជាកិច្ចការរបស់ គ.ជ.ប កន្លងមកបានទម្លាយនូវភាពរាំងស្ទះអំពីការជាប់គាំងរដ្ឋាភិបាលបានល្អប្រសើរខ្លះក៏ដោយ ប៉ុន្តែគណៈកម្មាធិការនេះនៅតែមានចំណុចខ្វះខាតដែលត្រូវកែលំអបន្តទៀត ព្រោះថាឆន្ទៈរបស់ម្ចាស់ឆ្នោត គឺពឹងទៅលើការរៀបចំនៃស្ថាប័នមួយនេះទាំងស្រុង ដូច្នេះ គ.ជ.ប មិនត្រូវធ្វើឱ្យប្រជាពលរដ្ឋបាត់បង់ទំនុកចិត្តលើខ្លួនឡើយ។
លោក សៀវ វិសុទ្ធ បញ្ជាក់ថា ដំណើរការនៃការបោះឆ្នោតក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ បានខិតជិតមកដល់ហើយ ដូច្នេះសមាសភាពប្រធានថ្មីត្រូវតែបញ្ចៀសឱ្យបាននូវភាពមិនប្រក្រតីដែលធ្លាប់កើតមានកន្លងមក ដូចជាការពន្យារពេលនៃការរាប់សន្លឹកឆ្នោត ជាដើម ដើម្បីផ្តល់ភាពយុត្តិធម៌ជូនគណបក្សដែលនឹងចូលរួមបោះឆ្នោតក្នុងអាណត្តិខាងមុខនេះ។
កាលពីខែមិថុនា ឆ្នាំ២០១៧ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានអះអាងថា ការបោះឆ្នោតឃុំ-សង្កាត់នៅកម្ពុជា អាណត្តិទី៤ បានប្រព្រឹត្តទៅក្នុងបរិយាកាសគំរាមកំហែងទៅដល់សិទ្ធិបញ្ចេញមតិ និងការចូលរួមក្នុងនយោបាយដែលអាចចាត់ទុកការបោះឆ្នោតនេះថាមិនបានធ្វើឡើងដោយសេរី និងយុត្តិធម៌នោះទេ៕