តុលាការក្រុងភ្នំពេញ បានបដិសេធសំណើរបស់មេធាវីលោក រ៉ុង ឈុន ប្រធានសហភាពការងារកម្ពុជា និងជាសមាជិកក្រុមប្រឹក្សាឃ្លាំមើលកម្ពុជា រួមទាំងយុវតី ស កណិកា ដែលមេធាវីបានស្នើសុំកូនក្ដីខ្លួននៅក្រៅឃុំបណ្ដោះអាសន្ន ដោយបារម្ភពីសុខភាព និងការឃុំខ្លួនកូនក្ដីបានធ្វើលើសនីតិវិធីហើយនោះ។
ការបដិសេធនេះ ធ្វើឡើងក្នុងសវនាការនៅព្រឹកថ្ងៃទី៨ ខែមិថុនា ឆ្នាំ២០២១ ក្រោយពីតំណាងអយ្យការអមសាលាដំបូងរាជធានីភ្នំពេញ លោក សេង ហៀង កោះហៅមេធាវីការពារក្តីលោក រ៉ុង ឈុន គឺលោក ឡោ ជុនធី ឲ្យចូលរួមសវនាការលើករណីលោក រ៉ុង ឈុន ដែលតុលាការបានចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម កាលពីចុងខែកក្កដា ឆ្នាំ២០២០ កន្លងទៅនោះ។
ប្រភពពីអ្នកឃ្លាំមើលដំណើរការសវនាការលើនីតិវិធីសុំនៅក្រៅឃុំរបស់លោក រ៉ុង ឈុន នៅព្រឹកថ្ងៃទី៨ មិថុនា បានឲ្យដឹងថា សហការមេធាវីការពារក្តីជនជាប់ចោទបានស្នើសុំកូនក្ដីរបស់ខ្លួនឱ្យនៅក្រៅឃុំជាបណ្ដោះអាសន្ន ដោយធានាអះអាងថា កូនក្ដីរបស់ខ្លួនទាំងពីរនឹងសហការ ព្រមទាំងបង្ហាញមុខនៅគ្រប់ដំណាក់កាលនៃដំណើរការសវនាការ។
ប្រភពដដែលបានបញ្ជាក់តាមសហមេធាវីទៀតថា រយៈពេលនៃការឃុំខ្លួនកូនក្ដីទាំងពីររហូតមកដល់ពេលនេះ គឺច្រើនជាងរយៈពេលអប្បបរមា និងជិតពាក់កណ្តាលនៃទោសអតិបរមាទៅហើយ នៅមិនទាន់បើកសវនាការនៅឡើយក្រោមហេតុផលជំងឺ Covid រាតត្បាត។
តាមក្រមព្រហ្មទណ្ឌ បទចោទតាមមាត្រា៤៩៤ និងមាត្រា៤៩៥ គឺជនជាប់ចោទប្រឈមមុខនឹងជាប់ពន្ធនាគារចន្លោះពី ៦ខែដល់ ២៤ខែប៉ុណ្ណោះ ប៉ុន្តែលោក រ៉ុង ឈុន បានជាប់ពន្ធនាគារគិតត្រឹមថ្ងៃទី៨ ខែមិថុនា នេះ គឺមានរយៈពេល ១១ខែ និង ២៣ថ្ងៃហើយ។
ប្រធានសហភាពការងារកម្ពុជា និងជាសមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ត្រូវបានសមត្ថកិច្ចចាប់ខ្លួនកាលពីចុងខែកក្កដា ឆ្នាំ២០២០ កន្លងទៅនោះ។ ការចាប់ខ្លួននេះ ធ្វើឡើងបន្ទាប់ពីលោកបានធ្វើអត្ថាធិប្បាយ និងចេញសេចក្តីថ្លែងការណ៍ជុំវិញបញ្ហាដីធ្លីរបស់ពលរដ្ឋក្នុងខេត្តត្បូងឃ្មុំ ដែលជាប់ពាក់ព័ន្ធជាមួយនឹងបញ្ហាព្រំដែនរវាងកម្ពុជា-វៀតណាម។
បន្ទាប់ពីការចាប់ខ្លួន លោក រ៉ុង ឈុន ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ ចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សង្គម និងចេញដីកាឲ្យឃុំខ្លួនបណ្ដោះអាសន្ននៅពន្ធនាគារព្រៃសរហូតដល់សព្វថ្ងៃនេះ៕