27 C
Phnom Penh

តើ​អាជ្ញាធរ​កម្ពុជា​គួរ​អនុវត្ត​បែប​ណា​ចំពោះ​អ្នក​ដែល​ស្លាប់​ដោយសារ​ជំងឺ Covid-19?

បទវិភាគ

មន្ត្រី​ជាន់ខ្ពស់​គណបក្ស​ប្រជាធិបតេយ្យ​មូលដ្ឋាន ដែល​កាត់​ថា GDP បាន​ប្រតិកម្ម​ជុំវិញ​ការ​បូជា​សព​អ្នក​ដែល​បាន​ស្លាប់​ដោយសារ​ជំងឺ Covid-19នៅ​ខេត្ត​កំពត ថា​មាន​ភាព​អាណោចអាធម្ម​មិន​ស្រប​តាម​ទំនៀមទម្លាប់​ប្រពៃណី​ខ្មែរ​នោះ​ទេ។

ការ​អះអាង​នេះ ធ្វើ​ឡើង​បន្ទាប់​ពី​ក្រុម​គ្រូពេទ្យ និង​អាជ្ញាធរ​ខេត្ត​កំពត បាន​បូជា​សព​អ្នក​ដែល​បាន​ស្លាប់​ដោយសារ​ជំងឺ Covid-19នៅ​វាល​រហោឋាន​ក្បែរ​ជើងភ្នំ​មួយ​កន្លែង ដែល​មិនបាន​ប្រើ​ទី​ប៉ាឆា​សម្រាប់​បូជា​ឲ្យ​បាន​ត្រឹមត្រូវ​នោះ​ឡើយ។

ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​ប្រាប់​សារព័ត៌មាន The Cambodia Daily នៅ​ថ្ងៃ​ទី​៩ ខែ​មិថុនា នេះ​ថា នៅ​ពេលនេះ​ទី​ប៉ាឆា​សម្រាប់​បូជា​អ្នក​ដែល​បាន​ស្លាប់​ដោយសារ​ជំងឺ Covid-19ពិត​មាន​ភាព​ចាំបាច់​ខ្លាំង​ណាស់​ដែល​ត្រូវ​បង្កើត​ឲ្យ​មាន​តាម​ខេត្ត​នីមួយៗ ព្រោះ​ថា​ស្ថានភាព​ការ​ឆ្លង​នៃ​ជំងឺ​នេះ​មិន​ដឹង​ថា តើ​នឹង​ត្រូវ​បញ្ចប់​នៅ​ពេលណា​នោះ​ទេ។

លោក​អះអាង​ថា ការ​ឆ្លង​វីរុស​កាច​សាហាវ​មួយ​នេះ​ចេះតែ​បន្ត ខណៈ​អ្នក​ស្លាប់​នៅតែ​កើត​មាន​ជា​រៀងរាល់ថ្ងៃ​បែប​នេះ អាជ្ញាធរ​តាម​ខេត្ត​ទូទាំង​ប្រទេស​ដែល​មិនទាន់​បាន​រៀបចំ​ឲ្យ​មាន​ទី​ប៉ាឆា​សម្រាប់​បូជា​សាកសព​ដែល​បាន​ឆ្លង​ជំងឺ​ទាំងនេះ គួរតែ​ពិចារណា​លើ​បញ្ហា​នេះ​ឲ្យ​បាន​ឆាប់​ផង​ដែរ ព្រោះ​ថា​ការ​បូជា​សព​ដោយ​គ្មាន​ពិធី​សាសនា​ជា​ការ​ខកខាន​មួយ​ទៅ​ហើយ តែ​មិន​គួរ​សូម្បីតែ​ប៉ាឆា​សម្រាប់​បូជា​ឲ្យ​បាន​សមរម្យ​ក៏​គ្មាន​ដែរ​នោះ​ទេ។

បណ្ឌិត យ៉ង សាំងកុមារ បញ្ជាក់​ថា តាម​ការណែនាំ​របស់​ប្រមុខ​រដ្ឋាភិបាល​កម្ពុជា ទៅកាន់​អាជ្ញាធរ​ឲ្យ​បង្កើត​ប៉ាឆា​សម្រាប់​បូជា​សព​ដែល​ស្លាប់​ដោយសារ​ជំងឺ Covid-19 កាលពី​ដើម​ខែ​មីនា ឆ្នាំ​២០២១ កន្លង​ទៅ​នោះ ហាក់​ពុំ​ទាន់​មាន​ប្រសិទ្ធភាព​នោះ​ទេ។ បញ្ហា​នេះ បង្ហាញ​ថា​រដ្ឋាភិបាល​នៅ​ខ្វះខាត​ប្រព័ន្ធ​ត្រួតពិនិត្យ និង​វាយតម្លៃ​ក្នុង​ការ​អនុវត្ត​វិធានការ​នានា​របស់​ខ្លួន​នៅឡើយ។

កាលពី​ថ្ងៃ​ទី​៨ ខែ​មិថុនា ឆ្នាំ​២០២១ រដ្ឋបាល​ខេត្ត​កំពត បាន​ប្រតិកម្ម​ទៅ​នឹង​ការ​ចុះផ្សាយ​តាម​បណ្ដាញ​សង្គម​ថា អាជ្ញាធរ​ខេត្ត​នេះ​បាន​យក​សព​អ្នក​ដែល​បាន​ស្លាប់​ដោយសារ​ជំងឺ Covid-19 ទៅ​ផ្លុង​ចោល​នៅ​ម្តុំ​ជើងភ្នំ​ប្រាសាទ ស្រុក​កំពង់ត្រាច ខេត្ត​កំពត ថា​ជា​ការ​លើកឡើង​មិន​ពិត​នោះ​ទេ ប៉ុន្តែ​រដ្ឋបាល​ខេត្ត​បាន​អះអាង​ថា អាជ្ញាធរ​បាន​បូជា​សព​ទាំងនោះ​ទៅតាម​ប្រពៃណី​រួចរាល់​ហើយ។

បញ្ហា​នេះ ត្រូវ​អ្នក​លេង​បណ្ដាញ​សង្គម​រិះគន់​ថា អាជ្ញាធរ​ខេត្ត​នេះ​មិនបាន​ប្រើ​ទី​ប៉ាឆា​ឲ្យ​បាន​ត្រឹមត្រូវ ឬ​ស្របតាម​ប្រពៃណី​ខ្មែរ និង​តាម​ការណែនាំ​របស់​ប្រមុខ​រដ្ឋាភិបាល​កម្ពុជា​កន្លង​មក​នោះ​ទេ គ្រាន់តែ​រៀបចំ​កន្លែង​ដុត​សាកសព​ទាំងនោះ​ឲ្យ​តែ​ឆេះ​អស់​តែប៉ុណ្ណោះ។

ជុំវិញ​បញ្ហា​នេះ កាលពី​ដើម​ខែ​មីនា ឆ្នាំ​២០២១ លោក ហ៊ុន សែន បាន​ណែនាំ​ឲ្យ​អាជ្ញាធរ​មូលដ្ឋាន​តាម​ខេត្ត​នីមួយៗ​ឲ្យ​រៀបចំ​ទីតាំង​ឲ្យ​បាន​សមរម្យ​ក្នុង​ដែន​សមត្ថកិច្ច​របស់​ខ្លួន​ធ្វើ​ប៉ាឆា​សម្រាប់​បូជា​សព​អ្នក​ដែល​បាន​ស្លាប់​ដោយសារ​ជំងឺ Covid-19។ លោក​ថា ការ​រៀបចំ​ទីតាំង​បូជា​នេះ គឺជា​ការ​គោរព​ដល់​អ្នក​ស្លាប់ បើ​ទោះបីជា​មិន​បាន​ធ្វើ​ពិធី​ទំនៀមទម្លាប់​ព្រះពុទ្ធសាសនា​បាន​ពេញលេញ​ក៏ដោយ។

បញ្ហា​នេះ ត្រូវ​គេ​មើលឃើញ​ថា​អាជ្ញាធរ​តាម​ខេត្ត​ខ្លះ​មិនទាន់​បាន​អនុវត្ត​តាម​ការណែនាំ​នេះ​នៅឡើយ​ទេ ខណៈ​អ្នក​ដែល​បាន​ស្លាប់​ដោយសារ​ជំងឺ Covid-19 ចេះតែ​កើន​ឡើង​ជាប់​ជា​រៀងរាល់​ថ្ងៃ។

ទាក់ទិន​នឹង​បញ្ហា​នេះ អ្នក​តាមដាន​ការ​អភិវឌ្ឍ​សង្គម បណ្ឌិត មាស នី បាន​លើកឡើង​កាលពី​ពេល​ថ្មីៗ​នេះ​ថា អ្នកជំងឺ​ទាំងនោះ​ពេល​ស្លាប់​ទៅ​មិន​មាន​បងប្អូន​នៅ​ក្បែរ​ទេ ដូច្នេះ​ស្ថាប័ន​ពាក់ព័ន្ធ​ដែល​ទទួល​បន្ទុក​ក្នុង​ការរៀបចំ​បូជា​សព សូម​មេត្តា​ផ្តល់​នូវ​តម្លៃ​ជា​ប្រពៃណី​ជូន​ពួកគាត់​ផង ចៀសវាង​គ្រាន់តែ​យក​សព​ចេញ​ពី​មន្ទីរពេទ្យ​រួច​ដឹក​យក​ទៅ​ដុត​ចោល​ដូច​គល់ឈើ ដែល​ករណី​ធ្លាប់​កើត​រួច​មក​ហើយ។

ទាក់ទិន​នឹង​ការ​ស្លាប់​ដោយសារ​ជំងឺ Covid-19 នេះ ក្រសួង​សុខាភិបាល នៅ​ថ្ងៃ​ទី​៩ ខែ​មិថុនា ឆ្នាំ​២០២១ បាន​អះអាង​ថា អ្នក​ដែល​បាន​ស្លាប់​ថ្មី​ដោយសារ​ជំងឺ Covid-19 មាន​ចំនួន ១១​នាក់ ខណៈ​វិជ្ជមាន​វីរុស Covid-19 ថ្មី​ចំនួន ៧២៩​នាក់ និង​អ្នក​ជាសះស្បើយ​ថ្មី​មាន​ចំនួន ៣៩៨​នាក់​ផង​ដែរ។ ក្រសួង​បញ្ជាក់​ថា អ្នក​ឆ្លង​វីរុស Covid-19 សរុប​បាន​កើន​ឡើង​ដល់​ជាង ៣​ម៉ឺន ៦​ពាន់​នាក់​ហើយ រីឯ​អ្នក​ជាសះស្បើយ​សរុប​មាន​ចំនួន​ជាង ២​ម៉ឺន ៩​ពាន់​នាក់ ចំណែក​អ្នក​ស្លាប់​បាន​កើន​ឡើង​ដល់ ២៨៩​នាក់​ហើយ​គិត​ត្រឹម​ថ្ងៃ​នេះ៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

សេចក្ដីរាយការណ៍ពិសេស