មន្ត្រីជាន់ខ្ពស់គណបក្សសង្គ្រោះជាតិ លើកឡើងថា ហាងឆេងបង្កើតគណបក្សនយោបាយថ្មីនៅកម្ពុជាប្រហាក់ប្រហែលគ្នាទៅនឹងហាងឆេងលក់ដី ដែលកំពុងតែរីកស្គុសស្គាយសព្វថ្ងៃនេះ ប៉ុន្តែមិនដឹងថាការបើកបក្សនយោបាយរបស់អ្នកទាំងនោះជាឆន្ទៈជាតិ ដើម្បីជាតិពិតប្រាកដ ឬគ្រាន់តែជាការបំពេញបំណងប្រាថ្នារបស់បក្សកាន់អំណាចនោះ។
មន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានលើកឡើងបែបនេះក្នុងន័យរិះគន់មន្ត្រីបក្សប្រឆាំងមួយចំនួនដែលបាននាំគ្នាចេញទៅបង្កើតគណបក្សនយោបាយថ្មីដោយខ្លួនឯង ក្រោយពេលដែលពួកគេទទួលបានសិទ្ធិធ្វើនយោបាយឡើងវិញហើយនោះ។
លោក មាជ សុវណ្ណារ៉ា បានសរសេរលើគណនី Facebook របស់លោកនៅថ្ងៃទី២២ ខែមិថុនា ថា ពលរដ្ឋខ្មែរដែលស្រឡាញ់លទ្ធិប្រជាធិបតេយ្យ និងការផ្លាស់ប្ដូរ ពិតជាខកបំណងយ៉ាងខ្លាំងចំពោះអ្នកនយោបាយបក្សប្រឆាំងដែលនាំគ្នាចាកចេញពីគោលជំហរដើមរបស់បក្សសង្គ្រោះជាតិ ទៅបើកគណបក្សនយោបាយរៀងៗខ្លួន ក្រោមហេតុផលដែលមិនសមទំនងថាដើម្បីបន្តដួងព្រលឹងសង្គ្រោះជាតិ។
លោកអះអាងថា ពិតជាគួរឲ្យស្តាយ និងអៀនខ្មាសណាស់ ក្នុងពេលដែលគណបក្សរបស់ខ្លួនត្រូវបានគេរំលាយ មេបក្សត្រូវគេចាប់ដាក់គុក បែរជាមន្ត្រីគណបក្សសង្គ្រោះជាតិ នាំគ្នាទម្លាក់គោលជំហរនៃការផ្លាស់ប្ដូររបស់ខ្លួនចោល ហើយនាំគ្នាទៅបើកបក្សថ្មី ដែលនេះបង្ហាញយ៉ាងច្បាស់ថា អ្នកទាំងនោះកំពុងដើរចូលក្នុងផ្លូវរបស់បក្សកាន់អំណាច ដែលលោក ហ៊ុន សែន អះអាងថានឹងកម្ទេចកម្លាំងប្រឆាំងឲ្យខ្ទេចដល់ឫសគល់នោះ។
លោកលើកឡើងថា បក្សប្រឆាំងនៅអាហ្វ្រិក នៅភូមា និងនៅឥណ្ឌូនេស៊ី ជាដើម ដែលមេដឹកនាំបក្សប្រឆាំងក្នុងប្រទេសទាំងនោះត្រូវអ្នកកាន់អំណាចឃុំខ្លួនអស់រយៈពេលរាប់ឆ្នាំ ប៉ុន្តែចុងក្រោយ កម្លាំងប្រឆាំងនៅតែឈ្នះ ព្រោះពួកគេមិនបែកបាក់សាមគ្គីផ្ទៃក្នុង។
លោក មាជ សុវណ្ណារ៉ា បញ្ជាក់ថា ក្នុងកាលៈទេសៈនេះ កម្លាំងប្រឆាំងទាំងអស់ត្រូវតែរក្សាការឯកភាពផ្ទៃក្នុងបក្ស និងប្រើយន្តការរួបរួម ដើម្បីតវ៉ាប្រឆាំងដោយអហិង្សា ដោយសន្តិវិធីក្នុងការទាមទារឲ្យមានបក្សប្រឆាំងឡើងវិញ និងឲ្យមានការដោះលែងមេបក្សផងដែរ នោះទើបជាវិធីសាស្ត្រឈានទៅរកដំណោះស្រាយ និងបញ្ចប់វិបត្តិនយោបាយនៅកម្ពុជាពិតប្រាកដ។
ការរិះគន់នេះ ធ្វើឡើងស្របពេលដែលមន្ត្រីជាន់ខ្ពស់គណបក្សសង្គ្រោះជាតិ មួយចំនួនសម្រេចឈប់គាំទ្រជំហរគណបក្សសង្គ្រោះជាតិបន្តទៀត ហើយនាំគ្នាទៅបង្កើតបក្សថ្មីដោយខ្លួនឯងក្រោមហេតុផលថា ដើម្បីរក្សាដួងព្រលឹងសង្គ្រោះជាតិ។
គិតត្រឹមខែចុងខែមិថុនា ឆ្នាំ២០២១ នេះ មានមន្ត្រីបក្សប្រឆាំងជាង ២០នាក់ហើយដែលទទួលបានសិទ្ធិធ្វើនយោបាយឡើងវិញ ក្រោយគណបក្សសង្គ្រោះជាតិ ត្រូវរំលាយកាលពីឆ្នាំ២០១៧ កន្លងទៅ ក្នុងនោះមានមន្ត្រីមួយចំនួនក៏បានសម្រេចចិត្តចេញទៅបង្កើតគណបក្សដោយខ្លួនឯង និងខ្លះទៀតត្រូវព្រះមហាក្សត្រតែងតាំងជាមន្ត្រីជាន់ខ្ពស់របស់រដ្ឋាភិបាលកម្ពុជាផងដែរ។
កាលពីចុងឆ្នាំ២០២០ កន្លងទៅ ក្រសួងមហាផ្ទៃ បានបង្ហាញរបាយការណ៍របស់ខ្លួនថា កម្ពុជាមានគណបក្សនយោបាយជាង ៤០គណបក្សនយោបាយហើយ ដែលបានចុះបញ្ជីជាផ្លូវការ ខណៈមន្ត្រីបក្សប្រឆាំងដែលបានសុំសិទ្ធិធ្វើនយោបាយឡើងវិញមួយចំនួន កំពុងតែស្វះស្វែងដាក់ពាក្យស្នើសុំបង្កើតបក្សនយោបាយបន្ថែមទៀតនោះ។
យ៉ាងណាក៏ដោយ អតីតក្រុមមន្ត្រីបក្សប្រឆាំងដែលបាននាំគ្នាទៅបង្កើតគណបក្សនយោបាយ តែងអះអាងថា ការបើកបក្សថ្មី គឺក្នុងគោលបំណងដោះស្រាយវិបត្តិនយោបាយ និងបង្កើតវប្បធម៌ប្រកួតប្រជែងដោយត្រឹមត្រូវ និងម៉ឺងម៉ាត់ ដោយស្របតាមរដ្ឋធម្មនុញ្ញប៉ុណ្ណោះ។
ក្រុមអ្នកឃ្លាំមើលសង្គម រិះគន់ថា មន្ត្រីបក្សប្រឆាំងតែងបន្ទោសគ្នាទៅវិញទៅមកថា ខ្វះភាពអត់ធ្មត់ ប៉ុន្តែពួកគេក៏ត្រូវពិនិត្យកំហុសមុនដំបូងបង្អស់ផងដែរ នោះគឺមេដឹកនាំកំពូលរបស់បក្សប្រឆាំង គឺលោក សម រង្ស៊ី និងលោក កឹម សុខា មិនដែលសម្បទានរវាងគ្នានិងគ្នា ដើម្បីបង្រួបបង្រួមផ្ទៃក្នុងគណបក្សនោះទេរហូតមកទល់នឹងពេលនេះ។
ពួកគេលើកឡើងថា វាជារឿងគួរឲ្យអស់សំណើចណាស់ដែលមេបក្សប្រឆាំងតែងនិយាយអំពីសម្បទាននយោបាយទៅកាន់លោក ហ៊ុន សែន ដែលជាគូប្រជែងរបស់ខ្លួន ប៉ុន្តែពួកគេមិនព្រមសម្បទានឲ្យគ្នាឯងដើម្បីរកគន្លឹះរួបរួមគ្នាការពារប្រទេសជាតិនោះ។
ជុំវិញបញ្ហានេះ លោក ហ៊ុន សែន កាលពីចុងខែឧសភា ឆ្នាំ២០២១ បានអះអាងថា មន្ត្រីបក្សប្រឆាំងដែលបានសុំសិទ្ធិធ្វើនយោបាយឡើងវិញ ពួកគេនឹងទៅបង្កើតបក្សដោយខ្លួនឯង ដើម្បីចូលរួមប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ក្នុងឆ្នាំ២០២២ ខាងមុខ។ ដូច្នេះ អាចបញ្ជាក់យ៉ាងច្បាស់ថា កម្ពុជាកំពុងតែអនុវត្តលទ្ធិប្រជាធិបតេយ្យសេរីពហុបក្សបានយ៉ាងល្អ បើទោះបីជាគ្មានអតីតបក្សសង្គ្រោះជាតិក៏ដោយ៕