ព្រឹទ្ធសភាសហរដ្ឋអាមេរិកកាលពីសប្ដាហ៍មុន បានចាប់ផ្ដើមសួរដេញដោលទៅកាន់មន្ត្រីសន្តិសុខជាតិនៃរដ្ឋការរបស់លោក បៃដិន ដែលបានដាក់បង្ហាញអំពីរបាយការណ៍ចារកម្មដែនអាកាសរបស់ប្រទេសមហាអំណាចមួយនេះ ដោយថតឃើញយានអវកាស UFO យ៉ាងតិច ១៤៣ដង ចាប់តាំងពីឆ្នាំ២០០៤ ដែលវាហោះហើរចូលដែនអាកាសរបស់សហរដ្ឋអាមេរិក និងលំហសមុទ្រ។
កងទ័ពសហរដ្ឋអាមេរិក និងអង្គភាពចារកម្មដែនអាកាសរបស់ប្រទេសមហាអំណាចនេះ បានប្រាប់សមាជិកព្រឹទ្ធសភាថា មកដល់ពេលនេះពុំទាន់មានការស្រាវជ្រាវ និងចាប់បានភស្តុតាងយានអវកាសនោះមកពីប្រទេសណា ឬពិភពណាច្បាស់លាស់នោះទេ។
ប៉ុន្តែក្រុមចារកម្ម និងស៊ើបអង្កេតលំហអាកាសសហរដ្ឋអាមេរិក បានបញ្ជាក់ប្រាប់សមាជិកព្រឹទ្ធសភាថា បាតុភូតនេះបានកើតឡើងជាង ៥០ឆ្នាំមកហើយ ដោយនៅតែពុំអាចកំណត់អត្តសញ្ញាណបានថាចេញពីប្រភពណាឲ្យពិតប្រាកដឡើយ។
បណ្ដាញផ្សាយព័ត៌មាន BBC បានចុះផ្សាយថា រដ្ឋាភិបាលរបស់លោក ចូ បៃដិន ត្រូវបានគណៈកម្មការព្រឹទ្ធសភាអាមេរិក និងសភាតំណាងរាស្ត្របានទាមទារឲ្យកងទ័ពអាមេរិក ជាពិសេសកងទ័ពផ្នែកចារកម្មលំហអាកាស ព្យាយាមរកឲ្យឃើញប្រភពដែលបង្កើតយានអវកាស UFO។
មន្ទីរ Pengtagon បានបង្កើតកម្លាំងប្រតិបត្តិការបាតុភូតលំហអាកាសកាលពីខែសីហា ឆ្នាំ២០២០ ដើម្បីពិនិត្យមើល និងស្រាវជ្រាវយានអាវកាស UFO និងបាតុភូតលំហអាកាសដែលមិនអាចកំណត់បានហៅថា UAP មកពីភាសាអង់គ្លេស Unidentified Aerial Phenomena។
កាលពី ២ឆ្នាំមុន កងនាវាសហរដ្ឋអាមេរិកចាប់បានរូបភាព និងសកម្មភាពរបស់ UFO ឬយានអវកាសថាសហោះ មកពីភាសាអង់គ្លេសហៅថា Unidentified Flying Object ដែលបានហោះហើរលើលំហសមុទ្រ។
តាមប្រភពព័ត៌មានរបស់ BBC គឺមន្ទីរ Pengtagon បង្ហាញរូបភាពចាប់បាន ១៤៣ដងក្នុងការហោះហើរចំនួន ១៤៤ដងរបស់យានអវកាសនេះ។ តែពុំអាចមានទិន្នន័យ និងព័ត៌មានច្បាស់លាស់ថា UFO ត្រូវបានបង្កើតឡើងដោយប្រទេសណា ឬក៏ពិភពណានោះឡើយ។
នៅពេលដែលចាប់បានសកម្មភាព និងរូបភាពទាំងនេះ គឺយានអវកាសនោះក៏ហោះហើរបាត់យ៉ាងលឿនបំផុត គឺប្រៀបដូចនឹងដំណើរធម្មជាតិរបស់វា។
កាលពីខែមេសា ឆ្នាំ២០២០ ក្រសួងការពារជាតិសហរដ្ឋអាមេរិក បានបញ្ចេញវីដេអូអំពីបាតុភូតលំហអាកាស UAP គឺផ្សព្វផ្សាយជាសាធារណៈក្រោយពីកងនាវាសហរដ្ឋអាមេរិកបានចាប់រូបភាពទាំងនោះ និងសកម្មភាពយានអវកាស UFO នៅលើលំហសមុទ្រប៉ាស៊ីហ្វិក ហើយនៅពេលនោះបានឃើញរូបភាពតូចល្អិតរបស់យានអវកាសនេះ ដោយហោះចុះហោះឡើងលើលំហអាកាសសមុទ្រនោះ។ បុគ្គលិកម្នាក់របស់នាវាអាមេរិកបានពណ៌នា UFO នោះ គឺវាមានពណ៌សបន្តិច ហើយថាពេលនោះគឺវាហោះបាត់ខ្លួនមួយរំពេច។
លោកស្រី Alex Dietrich បានប្រាប់បណ្ដាញ BBC ថា យានអវកាសនោះពុំមានផ្សែងទេ តែលោកស្រីថាអាចជាតាក់ទិចរបស់ពិភពណាមួយដែលប៉ុនប៉ងមកលើផែនដី។
ការសិក្សាស្រាវជ្រាវ និងស៊ើបអង្កេត បានកំពុងធ្វើឡើងដោយរដ្ឋាភិបាលប្រទេសជាច្រើននៅលើពិភពលោក ដោយសហការជាមួយក្រុមស្រាវជ្រាវអវកាសផ្សេងៗទៀត។ សម្រាប់សហរដ្ឋអាមេរិក បានចាប់ផ្ដើមស្រាវជ្រាវបាតុភូតនេះតាំងទសវត្ស១៩៤០ ប៉ុន្តែបានផ្អាកវិញនៅឆ្នាំ១៩៧០។ មកដល់ឆ្នាំ២០០៧ សហរដ្ឋអាមេរិកក៏បានបង្កើតក្រុមប្រតិបត្តិការបាតុភូតលំហអាកាស ដោយផ្ដល់ឱ្យក្រុមនេះបំពេញភារកិច្ចនេះឡើងវិញ។ ពន្លឺភ្លើង និងការហោះហើររបស់យានអវកាស UFO ត្រូវបានរាយការណ៍មកថា ជាញឹកញាប់មាននៅក្នុងលំហអាកាស ហើយតែងជួបនឹងដំណើរជីវិតរបស់ភពផែនដី។
ក្នុងរយៈពេលពីរបីថ្ងៃមកនេះ ប្រព័ន្ធផ្សព្វផ្សាយធំៗរបស់សហរដ្ឋអាមេរិក រួមនឹងបណ្ដាញផ្សាយព័ត៌មានអន្តរជាតិជាច្រើន បានធ្វើសេចក្ដីរាយការណ៍ដោយស្នើឱ្យអ្នកវិទ្យាសាស្ត្របកស្រាយអំពីបាតុភូតនេះ។ នៅសហរដ្ឋអាមេរិក មានការភ្ញាក់ផ្អើលខ្លាំងនៅពេលសមាជិកព្រឹទ្ធសភាបានសាកសួរ និងទាមទារឱ្យរដ្ឋការលោកប្រធានាធិបតី ចូ បៃដិន ត្រូវខិតខំស្រាវជ្រាវរកឱ្យឃើញប្រភពដែលស្ថាបនាយានអវកាស UFO ព្រោះតែបារម្ភថានឹងអាចមានបាតុភូតអាក្រក់មកលើផែនដីរបស់មនុស្ស៕