នៅទីបំផុត សហរដ្ឋអាមេរិកសម្រេចប្រឈមនឹងហានិភ័យក្នុងការបាញ់ព្រមាននៃកងកាំជ្រួចរបស់រុស្ស៊ី ដោយក្រុងវ៉ាស៊ីនតោន ជ្រើសរើសការធ្វើសមយុទ្ធនាវាចម្បាំងជាមួយកងនាវាចម្បាំងរបស់ប្រទេសអ៊ុយក្រែន និងកងនាវានៃប្រទេសសមាជិកណាតូ នៅដែនសមុទ្រខ្មៅ ជាទីដែលក្រុងម៉ូស្គូ អះអាងដោយឯកតោភាគីថាជាដែនទឹករបស់ខ្លួន ហើយព្រមានបាញ់កាំជ្រួចដាក់នាវាណាដែលហ៊ានចូលតំបន់នោះ។
សហរដ្ឋអាមេរិក រួមនឹងសម្ព័ន្ធមិត្តណាតូ បានបញ្ចេញឥរិយាបថប្រឆាំងនឹងរុស្ស៊ី ដែលប៉ុនប៉ងកាន់កាប់ដែនទឹករបស់ប្រទេសអ៊ុយក្រែន ជាអតីតធ្លាប់ជ្រកក្រោមដំបូលរបស់សហភាពសូវៀត។ ក្នុងស្ថានភាពតានតឹងនេះ រុស្ស៊ី ត្រូវបានរាយការណ៍មកថា បានបាញ់កាំជ្រួចដែលជាប្រព័ន្ធការពារដែនអាកាសរបស់រុស្ស៊ី ឱ្យធ្លាក់ក្នុងសមុទ្រខ្មៅ ខណៈនាវាចម្បាំងអាមេរិក និងអ៊ុយក្រែន រួមនឹងកងនាវាយោធាណាតូ កំពុងធ្វើសមយុទ្ធនៅតំបន់នោះ។
សេចក្តីរាយការណ៍របស់ទីភ្នាក់ងារព័ត៌មាន AFP បានឱ្យដឹងថា កងនាវាអ៊ុយក្រែន និងសហរដ្ឋអាមេរិក និងកងនាវារបស់អង្គការណាតូ បានធ្វើសមយុទ្ធរួមគ្នានៅក្នុងសមុទ្រខ្មៅចាប់តាំងពីថ្ងៃចន្ទ ទី២៨ មិថុនា ដើម្បីបង្ហាញកិច្ចសហប្រតិបត្តិការក្នុងវិស័យការពារជាតិរួមគ្នា។
ប៉ុន្តែការធ្វើសមយុទ្ធនៃកងនាវាចម្បាំងរបស់សហរដ្ឋអាមេរិក និងអ៊ុយក្រែន រួមនឹងយោធាណាតូ គឺធ្វើឡើងដើម្បីឆ្លើយតបប្រទេសរុស្ស៊ី កាលពីសប្ដាហ៍មុនដែលបានបើកយន្តហោះទម្លាក់គ្រាប់បែកដ៏ធំចំនួន ៤គ្រាប់ ស្កាត់មុខនាវាចម្បាំងរបស់អង់គ្លេស ដែលបានបើកទៅកាន់តំបន់មួយនៃខ្សែទឹកសមុទ្រក្នុងតំបន់នោះ។
រុស្ស៊ី ព្រមានថា នេះជាការព្រមានតែប៉ុណ្ណោះ ហើយបើអង់គ្លេស មិនបើកចេញទេ គឺអាចត្រូវគ្រាប់បែក ឬគ្រាប់កាំជ្រួចរបស់យន្តហោះចម្បាំងនៃរុស្ស៊ី។
ប្រទេសរុស្សី បានអះអាងថា កងទ័ពអាកាសបានទម្លាក់គ្រាប់ព្រមានទៅលើនាវាចម្បាំងអង់គ្លេសកាលពីថ្ងៃពុធ សប្តាហ៍មុន ដោយសារតែនាវាចម្បាំងនេះបានរំលោភទៅលើអធិបតេយ្យភាពដែនទឹករបស់រុស្ស៊ី។
ប៉ុន្តែប្រទេសអង់គ្លេស ថាខ្លួនគេមិនបានទទួលសារព្រមានពីរុស្ស៊ី នោះទេ ហើយបានអះអាងថា នាវាចម្បាំងរបស់អង់គ្លេសបានឆ្លងកាត់ដែនទឹកប្រទេសអ៊ុយក្រែន ដោយស្របទៅតាមច្បាប់អន្តរជាតិ។
សមយុទ្ធកងនាវាសហរដ្ឋអាមេរិក និងអ៊ុយក្រែន ក្នុងតំបន់សមុទ្រខ្មៅនេះ បានកើតមានឡើងចំនួន ២១លើករួចមកហើយ ចាប់តាំងពីឆ្នាំ១៩៩៧ មក ប៉ុន្តែការធ្វើសមយុទ្ធនៅពេលនេះមានបុគ្គលិកយោធាចូលរួមប្រមាណ ៥ពាន់នាក់មកពីប្រទេសចំនួន៣០ ដែលជាសមាជិករបស់អង្គការយោធាណាតូ។ សមយុទ្ធនេះដឹកនាំដោយកងនាវាចម្បាំងរបស់សហរដ្ឋអាមេរិក ហើយស្ថិតក្នុងក្របខ័ណ្ឌរបស់អង្គការយោធាណាតូ ផងដែរ។ សមយុទ្ធនេះមានឈ្មោះថា Sea Breeze 2021។
សមយុទ្ធយោធានេះមានរយៈពេល ២សប្តាហ៍ និងមាននាវាចម្បាំងចូលរួមប្រមាណ ៣០គ្រឿង ដែលក្នុងនោះក៏រួមមាននាវារបស់សហរដ្ឋអាមេរិក USS Ross ដែលបំពាក់ទៅដោយកាំជ្រួច និងយន្តហោះចម្បាំង ៤០គ្រឿង។
ឧត្តមសេនីយ៍ Oleksiy Neizhpapa មេបញ្ជាការកងទ័ពជើងទឹកអ៊ុយក្រែន បាននិយាយក្នុងពិធីបើកសមយុទ្ធយោធាក្នុងទីក្រុងកំពង់ផែ Odessa នៃប្រទេសអ៊ុយក្រែន ថា ព្រឹត្តិការណ៍នេះគឺជាសារដ៏មានឥទ្ធិពលមួយក្នុងការថែរក្សាស្ថិរភាព និងសន្តិភាពនៅក្នុងតំបន់នៃសមុទ្រខ្មៅ។
តំបន់គ្រីមមៀ ដែលធ្លាប់ស្ថិតក្រោមការគ្រប់គ្រងរបស់អ៊ុយក្រែន បានធ្លាក់មកក្រោមការគ្រប់គ្រងរបស់រុស្ស៊ី ក្នុងឆ្នាំ២០១៤ តាមរយៈការបោះឆ្នោតប្រជាមតិ ដែលតំបន់នោះជាដែនដីអ៊ុយក្រែន តែជនជាតិរុស្សី មកបង្កើតភូមិរស់នៅកាលពីសម័យអតីតសហភាពសូវៀត។
ក្រោយពីតំបន់គ្រីមមៀ បានឆ្លងកាត់ការបោះឆ្នោតដោយសំឡេងឆ្នោតលើសលុប បង្ហាញពីការផ្ដាច់ខ្លួនចេញពីការគ្រប់គ្រងរបស់អ៊ុយក្រែន គឺរុស្ស៊ី បានអះអាងថា ដែនទឹកជុំវិញតំបន់នោះជាផ្នែកមួយនៃអធិបតេយ្យភាពរបស់រុស្ស៊ី។
ប៉ុន្តែពុំមានការទទួលស្គាល់របស់រុស្ស៊ី នោះទេ។ ទាំងសហរដ្ឋអាមេរិក អង់គ្លេស និងបក្សសម្ព័ន្ធយោធាណាតូ បានប្រឆាំងនឹងការវាតទីរបស់ប្រទេសរុស្ស៊ី។ ប្រទេសទាំងនេះនៅតែចាត់ទុកដែនទឹកជាប់ឧបទ្វីបគ្រីមមៀ ជារបស់អ៊ុយក្រែន។
ក្នុងស្ថានភាពតានតឹងនេះ រុស្ស៊ី មិនបានស្ងប់ស្ងាត់ឡើយ។ កងកាំជ្រួចរបស់រុស្ស៊ី បានធ្វើតេស្ដសមត្ថភាពប្រព័ន្ធការពារដែនអាកាសរបស់ខ្លួននៅតំបន់គ្រីមមៀ ដែលមើលទៅជាការព្រមានសមយុទ្ធរបស់សហរដ្ឋអាមេរិក អ៊ុយក្រែន និងប្រទេសជាសមាជិកអង្គការណាតូ ដែលបានធ្វើសមយុទ្ធយោធារួមគ្នានៅសមុទ្រខ្មៅ។
ប្រព័ន្ធផ្សព្វផ្សាយក្នុងប្រទេសរុស្ស៊ី បានធ្វើសេចក្ដីរាយការណ៍ថា ទីក្រុងម៉ូស្គូ ពិតជាបានធ្វើតេស្ដសមត្ថភាពប្រព័ន្ធការពារដែនអាកាស S-400 និង Pantsir នៅឯតំបន់គ្រីមមៀ។
តាមទីភ្នាក់ងារសារព័ត៌មាន Interfax ឲ្យដឹងថា ទីក្រុងម៉ូស្គូ បានអំពាវនាវឱ្យលុបចោលសមយុទ្ធ Sea Breeze នេះ គឺច្រើនសប្ដាហ៍មុនពេលចាប់ផ្ដើម។ ក្រសួងការពារជាតិរុស្ស៊ី ព្រមានថា ប្រសិនបើចាំបាច់ដើម្បីការពារដែនអធិបតេយ្យរបស់រុស្ស៊ី គឺត្រូវតែប្រតិកម្ម។
តើភាពតានតឹងរវាងអាមេរិក និងរុស្ស៊ី ជាថ្មីទៀតនេះ អាចធ្វើឱ្យលទ្ធផលនៃជំនួបកំពូលនៅប្រទេសស្វីស កាលពីថ្មីៗនេះរវាងប្រធានាធិបតីអាមេរិក ចូ បៃដិន និងសមភាគីរុស្ស៊ី ផ្លាឌីមៀ ពូទីន ធ្លាក់ដល់ចំណុចសូន្យដែរឬទេ?
តើក្រោយពីបិទបញ្ចប់នូវសមយុទ្ធកងនាវាចម្បាំងដ៏ធំរវាងអាមេរិក និងអ៊ុយក្រែន រួមជាមួយកងទ័ពយោធាណាតូ អាចធ្វើឱ្យអ៊ុយក្រែន កាន់តែរងាថែមទៀត ដោយការគំរាមពីសំណាក់រុស្ស៊ី ឬក៏យ៉ាងហោចណាស់រុស្ស៊ី ស្គាល់អំពីតម្លៃនៃកម្លាំងរបស់ណាតូ ដែលសហរដ្ឋអាមេរិក ដឹកនាំនៅពីក្រោយអ៊ុយក្រែន ដែរឬយ៉ាងណា៕