ក្រុមអ្នកឃ្លាំមើលជំរុញឲ្យសហគមន៍អន្តរជាតិបង្ហាញគោលការណ៍ឲ្យកាន់តែជាក់លាក់ ដើម្បីកុំឲ្យអំណាចដែលបានមកពីការធ្វើរដ្ឋប្រហារឆ្នាំ១៩៩៧ របស់លោក ហ៊ុន សែន បន្តឥទ្ធិពលបំផ្លាញកម្ពុជាតទៅមុខទៀត និងដើម្បីសង្គ្រោះកម្ពុជាឲ្យរួចផុតពីការដឹកនាំរបស់រដ្ឋាភិបាលផ្ដាច់ការក្រុងភ្នំពេញនាពេលបច្ចុប្បន្ននេះ។
ក្រុមនេះបានរិះគន់រដ្ឋាភិបាលកម្ពុជាដែលតែងប្រើអំណាចផ្ដាច់ការរបស់ខ្លួនធ្វើទុក្ខបុកម្នេញពលរដ្ឋខ្លួនឯង ដោយការបិទសិទ្ធិសេរីភាពគ្រប់បែបយ៉ាង ចាប់តាំងពីដណ្តើមអំណាចពីរដ្ឋាភិបាលស្របច្បាប់ឆ្នាំ១៩៩៧ មក។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានសរសេរលើគណនី Facebook របស់លោកកាលពីថ្ងៃទី៥ ខែកក្កដា ឆ្នាំ២០២១ នេះថា សហគមន៍អន្តរជាតិត្រូវតែទាមទារឲ្យរដ្ឋាភិបាលលោក ហ៊ុន សែន បញ្ជាក់ឲ្យបានច្បាស់លាស់ពីគោលជំហរបញ្ចប់វិបត្តិជាប់គាំងនយោបាយនៅកម្ពុជា ដែលកំពុងរំលោភគោលការណ៍សិទ្ធិមនុស្ស និងជាន់ឈ្លីមូលដ្ឋានគ្រឹះនៃលទ្ធិប្រជាធិបតេយ្យយ៉ាងធ្ងន់ធ្ងរក្នុងពេលបច្ចុប្បន្ននេះ។
លោកជំរុញឲ្យសហគមន៍អន្តរជាតិ បង្ហាញជំហរម៉ឺងម៉ាត់ដោយការនិយាយចំមុខភាគីលោក ហ៊ុន សែន ក្នុងកិច្ចប្រជុំអាស៊ី-អឺរ៉ុប នៅខែវិច្ឆិកា ឆ្នាំ២០២១ និងនៅពេលដែលកម្ពុជាធ្វើជាប្រធានកិច្ចប្រជុំអាស៊ាន នៅឆ្នាំ២០២២ នាពេលខាងមុខ ប្រសិនបើលោក ហ៊ុន សែន មិនព្រមដោះស្រាយវិបត្តិជាប់គាំងនយោបាយនៅកម្ពុជាសព្វថ្ងៃនេះទេនោះ។
លោកអះអាងថា សហគមន៍អន្តរជាតិគួរតែទាមទារឲ្យរដ្ឋាភិបាលកម្ពុជា ទម្លាក់ចោលរាល់បទចោទប្រកាន់លើប្រធានគណបក្សសង្គ្រោះជាតិ លោក កឹម សុខា រួមទាំងមន្ត្រីបក្សប្រឆាំងទាំងអស់ ឲ្យពួកគេអាចចូលរួមក្នុងការបោះឆ្នោតឆ្នាំ២០២២ និងឆ្នាំ២០២៣ ដោយសេរី សុវត្ថិភាព និងត្រូវដោះលែងអ្នកទោសមនសិការឲ្យមានសេរីភាពឡើងវិញទាំងអស់។
កាលពីថ្ងៃទី៥ និងទី៦ ខែកក្កដា ឆ្នាំ១៩៩៧ លោក ហ៊ុន សែន បានដឹកនាំកងកម្លាំងប្រដាប់អាវុធ បង្កើតរដ្ឋប្រហារបង្ហូរឈាមពលរដ្ឋខ្មែរដើម្បីផ្តួលរំលំកម្លាំងរាជានិយមគណបក្សហ៊្វុនស៊ិនប៉ិច ដើម្បីដណ្តើមកាន់កាប់អំណាចផ្ដាច់មុខនៅកម្ពុជា។
យ៉ាងណាក៏ដោយ កាលពីដើមឆ្នាំ២០២១ ប្រមុខរដ្ឋាភិបាលលោក ហ៊ុន សែន បានអួតថា លោកគឺជានាយករដ្ឋមន្ត្រីដែលពលរដ្ឋគោរពស្រឡាញ់ និងគាំទ្រខ្លាំងបំផុត និងជានាយករដ្ឋមន្ត្រីដែលរក្សាមុខតំណែងបានយូរជាងគេបំផុតនៅក្នុងពិភពលោក។
លោកអះអាងថា ក្រោមការដឹកនាំដែលពោរពេញទៅដោយបទពិសោធន៍របស់លោក បានដឹកនាំកម្ពុជាឲ្យមានការកសាង អភិវឌ្ឍន៍ មានការរីកចម្រើនលើគ្រប់វិស័យ និងមានមុខមាត់លើឆាកអន្តរជាតិមកទល់នឹងសព្វថ្ងៃនេះ។
យ៉ាងណាក៏ដោយ ក្រុមអ្នកសង្កេតការណ៍រិះគន់ថា អំណាចរបស់លោក ហ៊ុន សែន គឺជាអំណាចមិនស្របច្បាប់ ព្រោះអំណាចនេះគឺបានមកពីការប្លន់តែប៉ុណ្ណោះ។
ការប្លន់អំណាចនេះ ដូចជាក្នុងឆ្នាំ១៩៨៥ លោក ហ៊ុន សែន បានប្លន់អំណាចពីលោក ប៉ែន សុវណ្ណ និងលោក ចាន់ ស៊ី ដើម្បីខ្លួនលោកឡើងកាន់កាប់អំណាចជានាយករដ្ឋមន្ត្រីនៅពេលនោះ។
ជាងនេះទៀត ក្រោយចាញ់ការបោះឆ្នោតឆ្នាំ១៩៩៣ ដែលរៀបចំឡើងដោយអង្គការសហប្រជាជាតិ អ៊ុនតាក់ (UNTAC) លោក ហ៊ុន សែន បានប្លន់អំណាចម្តងទៀតពីសម្តេចក្រុមព្រះនរោត្តម រណឫទ្ធិ ដែលជានាយករដ្ឋមន្ត្រីទី១ នាពេលនោះ ដោយបានបង្កើតព្រឹត្តិការណ៍រដ្ឋប្រហារបង្ហូរឈាមកាលពីថ្ងៃទី៥-៦ កក្កដា ឆ្នាំ១៩៩៧។
ក្រោយកាន់កាប់អំណាចបានពេញដៃ លោក ហ៊ុន សែន បានរំលោភបំពានលួចកែច្បាប់គ្រប់បែបយ៉ាង ក្នុងនោះមានទាំងរំលោភ និងកែប្រែខ្លឹមសាររដ្ឋធម្មនុញ្ញកម្ពុជាថែមទៀត។
ទោះយ៉ាងណា លោក ហ៊ុន សែន ត្រូវបានគេហទំព័រ List of current longest-ruling Leaders ចេញផ្សាយនូវរបាយការណ៍របស់ខ្លួនកាលពីដើមឆ្នាំ២០២១ ថា លោក ហ៊ុន សែន ជាមេដឹកនាំម្នាក់ក្នុងចំណោមមេដឹកនាំផ្ដាច់ការទាំង ៥ ដែលកាន់កាប់អំណាចយូរជាងគេក្នុងពិភពលោក ដែលពួកគេម្នាក់ៗបានកាន់អំណាចចាប់ពី ៣៦ឆ្នាំទៅរហូតដល់ជាង ៤០ឆ្នាំ៕