ក្រុមអ្នកតស៊ូមតិនៅក្រៅស្រុកអះអាងថា ការប្រកាសឲ្យប្រជាពលរដ្ឋចូលរួមបង្កើតរដ្ឋាភិបាលរួបរួមជាតិរបស់អតីតមេដឹកនាំបក្សប្រឆាំង លោក សម រង្ស៊ី គឺជាល្បិចនយោបាយបំភ័ន្តពលរដ្ឋតែប៉ុណ្ណោះ ព្រោះថាកម្លាំងនយោបាយ និងគណៈកម្មាធិការជាតិសម្រាប់ដឹកនាំរដ្ឋាភិបាលរបស់លោក សម រង្ស៊ី មិនមានលក្ខណៈគ្រប់គ្រាន់ដូចជារដ្ឋាភិបាលរួបរួមជាតិនៅប្រទេសភូមា នោះទេ។
ការលើកឡើងរបស់ក្រុមបញ្ញវន្តខ្មែរនៅក្រៅស្រុកនេះ បន្ទាប់ពីអតីតមេបក្សប្រឆាំងដែលកំពុងរស់នៅក្រៅប្រទេស អំពាវនាវឲ្យពលរដ្ឋ និងកងកម្លាំងប្រដាប់អាវុធស្នេហាជាតិត្រៀមខ្លួនចូលរួមបង្កើតរដ្ឋាភិបាលបង្រួបបង្រួមជាតិនៅកម្ពុជា នៅពេលខាងមុខ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី១៩ ខែកក្កដា ឆ្នាំ២០២១ ថា ដើម្បីអាចបង្កើតសក្ដានុពលនយោបាយ មេដឹកនាំប្រឆាំង លោក សម រង្ស៊ី និងលោក កឹម សុខា មិនត្រូវបែកខ្ញែកគ្នាដូចសព្វថ្ងៃនេះទេ គឺត្រូវហ៊ានប្រឈមមុខតទល់នឹងរដ្ឋាភិបាលផ្ដាច់ការជាមួយគ្នា នោះទើបអាចមានកម្លាំងនយោបាយគ្រប់គ្រាន់បង្កើតរដ្ឋាភិបាលរួបរួមជាតិនេះឡើងដោយពិតប្រាកដ។
លោកអះអាងថា ដើម្បីអាចប្រកាសខ្លួនជារដ្ឋាភិបាលរួបរួមជាតិបាន ទាល់តែកម្លាំងនយោបាយរបស់ខ្លួនមានលក្ខណៈសម្បត្តិ និងផែនការគ្រប់គ្រាន់ ប៉ុន្តែកម្លាំងនយោបាយបក្សប្រឆាំងនៅពេលនេះ មួយចំហៀងនៅក្នុងស្រុក និងមួយចំហៀងទៀតរត់មកក្រៅស្រុក ដូច្នេះការប្រកាសបង្កើតរដ្ឋាភិបាលរួបរួមជាតិនេះ គឺគ្រាន់តែជាការប្រកាសបំភ័ន្តភ្នែកពលរដ្ឋតែប៉ុណ្ណោះ។
លោក គឹម សុខ បញ្ជាក់ថា ការប្រកាសរបស់អតីតមេបក្សប្រឆាំងលោក សម រង្ស៊ី ដោយអំពាវនាវឲ្យពលរដ្ឋចូលរួមបង្កើតរដ្ឋាភិបាលរួបរួមជាតិនេះ គឺហាក់ដូចជាគោះព្រៃបង្អើលទន្សាយ ដើម្បីឲ្យលោក ហ៊ុន សែន ចាប់ទន្សាយតែប៉ុណ្ណោះ ហើយការធ្វើបែបនេះ គឺនាំគ្រោះថ្នាក់ដល់អ្នកចូលរួមយ៉ាងធ្ងន់ធ្ងរ។
អតីតប្រធានគណបក្សសង្គ្រោះជាតិ លោក សម រង្ស៊ី បានសរសេរនៅលើគណនី Facebook របស់លោកកាលពីថ្ងៃទី១៩ ខែកក្កដា ឆ្នាំ២០២១ នេះ អំពាវនាវឲ្យពលរដ្ឋ និងកងកម្លាំងប្រដាប់អាវុធស្នេហាជាតិ ត្រៀមខ្លួនចូលរួមបង្កើតរដ្ឋាភិបាលបង្រួបបង្រួមជាតិនៅកម្ពុជា នៅពេលខាងមុខ ដូចរដ្ឋាភិបាលបង្រួបបង្រួមជាតិនៅប្រទេសភូមា ដែរ។
លោក សម រង្ស៊ី អះអាងថា មុននឹងផ្លាស់ប្ដូរសង្គម ត្រូវនាំគ្នាផ្លាស់ប្ដូរគំនិតមនុស្សម្នាក់ៗជាមុនសិន បន្ទាប់មកបាននាំគ្នាផ្លាស់ប្ដូរផ្នត់គំនិតសង្គមទាំងមូល។ ជាងនេះទៀត លោកបញ្ជាក់ថា ប្រជាពលរដ្ឋមិនត្រូវចាញ់បោកអ្នកដឹកនាំផ្ដាច់ការតទៅទៀតនោះទេ។
ជុំវិញបញ្ហានេះ អ្នកនាំពាក្យគណបក្សកាន់អំណាច លោក សុខ ឥសាន ត្រូវបានសារព័ត៌មានក្នុងស្រុកដកស្រង់សម្ដីរបស់លោក ចុះផ្សាយកាលពីថ្ងៃទី១៩ ខែកក្កដា ថា ការបង្កើតរដ្ឋាភិបាលបង្រួបបង្រួមជាតិរបស់អតីតមេបក្សប្រឆាំងរូបនេះ ដែលចង់យកគំរូតាមប្រទេសភូមា គឺមិនត្រឹមត្រូវនោះទេ ពីព្រោះសភាពការណ៍នៅភូមា និងកម្ពុជា ខុសគ្នាមេឃ និងដី។
លោកបញ្ជាក់ថា ដោយសារតែលោក សម រង្ស៊ី អត់ការងារធ្វើ ចេះតែនឹកស្រមើស្រមៃទៅ តែមិនអាចក្លាយជាការពិតនោះទេ ពីព្រោះប្រជាពលរដ្ឋ កងទ័ព នគរបាល កងកម្លាំងប្រដាប់អាវុធគ្រប់ប្រភេទ គ្មានអ្នកទៅធ្វើតាមអតីតមេបក្សប្រឆាំងនោះឡើយ ចំណែកអ្នកដែលបម្រើនយោបាយឲ្យក្រុមនោះ គឺសុទ្ធតែខុសច្បាប់ទាំងអស់ ដោយឡែករដ្ឋាភិបាលកម្ពុជាមានសិទ្ធិគ្រប់គ្រាន់ក្នុងការទប់ស្កាត់ ក៏ដូចជាការបង្ក្រាបរាល់សកម្មភាព ឬចលនាណាដែលខុសច្បាប់ទាំងនោះផងដែរ។
ជុំវិញការប្រកាសឲ្យប្រជាពលរដ្ឋ និងកងកម្លាំងប្រដាប់អាវុធឲ្យចូលបង្កើតរដ្ឋាភិបាលរួបរួមជាតិនេះ អតីតមេដឹកនាំបក្សប្រឆាំងលោក សម រង្ស៊ី ធ្លាប់បានអំពាវនាវឲ្យប្រជាពលរដ្ឋ និងមន្ត្រីរាជការទាំងស៊ីវិល និងកងកម្លាំងប្រដាប់អាវុធ ឲ្យចូលរួមជាមួយលោកផ្តួលរំលំរដ្ឋាភិបាលលោក ហ៊ុន សែន នៅថ្ងៃមាតុភូមិនិវត្តន៍របស់លោក កាលពីថ្ងៃទី៩ ខែវិច្ឆិកា ឆ្នាំ២០១៩ ម្តងរួចមកហើយ ប៉ុន្តែផែនការនេះត្រូវបរាជ័យទាំងស្រុង។
ដោយឡែកសកម្មជនគណបក្សសង្គ្រោះជាតិមួយចំនួនដែលបានចូលរួមលើកម្រាមដៃ ៩ នៅពេលនោះ ត្រូវបានអាជ្ញាធរចោទប្រកាន់ និងចាប់ខ្លួនពីបទផ្សំគំនិតក្បត់ដើម្បីផ្ដួលរំលំរដ្ឋាភិបាលបច្ចុប្បន្ន ដែលត្រូវឃុំខ្លួនក្នុងពន្ធនាគាររហូតមកទល់ពេលនេះ មិនទាន់ទទួលបានសេរីភាពនៅឡើយទេ។
ក្រុមអ្នកឃ្លាំមើលសង្គម អះអាងថា ដើម្បីដោះស្រាយវិបត្តិនយោបាយនៅកម្ពុជា មានវិធីតែមួយគត់ដែលអាចផ្សះផ្សាជាតិបាន គឺអ្នកនយោបាយធំៗគ្រប់ភាគី ត្រូវតែនាំគ្នាបង្កើតចលករប្រជាធិបតេយ្យមួយដើម្បីចរចាគ្នារកដំណោះស្រាយដោយសន្តិវិធី ដែលអាចបង្រួបបង្រួមជាតិ និងសាមគ្គីភាពជាតិដោយពិតប្រាកដទៅថ្ងៃមុខ៕