27 C
Phnom Penh

សារ​ចូលរួម​រំឭក​ខួប ៥​ឆ្នាំ​នៃ​មរណភាព​បណ្ឌិត កែម ឡី ពី​សារព័ត៌មាន ឌឹ ខេមបូឌា ដេលី

បទវិភាគ

The Cambodia Daily

Taing Sarada
Chief Correspondent & Anchor
The Cambodia Daily, Washington DC.

ជា​បឋម ខ្ញុំ​បាទ​សូម​ថ្វាយបង្គំ​ដល់​ព្រះ​ថេរានុត្ថេរៈ​គ្រប់​ព្រះអង្គ លោកតា លោក​យាយ អ៊ំ ពូ មីង ពលរដ្ឋ​ខ្មែរ​ដែល​ជា​អ្នក​ស្នេហា​ជាតិ ស្នេហា​ប្រជាធិបតេយ្យ ស្នេហា​តម្លៃ​នៃ​ការពិត ស្នេហា​គុណធម៌ និង​ស្នេហា​យុត្តិធម៌​សង្គម​ទាំងអស់​ជា​ទី​គោរព និង​ជា​ទី​រាប់អាន​ដោយ​ស្មោះត្រង់​ពី​ខ្ញុំ!

ថ្ងៃ​នេះ ខ្ញុំ​ពិតជា​មាន​កិត្តិយស​ណាស់​ដែល​សមាជិក និង​សមាជិកា​ទាំងអស់​របស់​សមាគម​សំឡេង​ខ្មែរ​ដើម្បី​ប្រជាធិបតេយ្យ (KVD) គណៈកម្មាធិការ​វត្ត​សាមគ្គីរតនារាម និង​គណបក្ស​សង្គ្រោះ​ជាតិ ប្រចាំ​រដ្ឋ​វ៉ាស៊ីនតុន ដែល​បាន​ផ្តល់​ឱកាស​ដល់​ខ្ញុំ​បាទ​ចូលរួម​នៅ​ក្នុង​កម្មវិធី​បុណ្យ​រំឭក​ខួប ៥​ឆ្នាំ​នៃ​មរណភាព​បណ្ឌិត កែម ឡី ក៏ដូចជា​បាន​ជួបជុំ​សហគមន៍​ខ្មែរ​នៅ​ក្នុង​រដ្ឋ​វ៉ាស៊ីនតុន សហរដ្ឋ​អាមេរិក​នេះ។

ចាប់តាំង​ពី​ថ្ងៃ​ទី​១០ ខែ​កក្កដា ឆ្នាំ​២០១៦ រហូត​មកដល់​ពេល​នេះ អស់​រយៈពេល​ប្រាំ​ឆ្នាំ​ហើយ យុត្តិធម៌​សម្រាប់​បណ្ឌិត កែម ឡី ដែល​ត្រូវ​បាន​ឃាតក​ផ្ដាច់​យក​ជីវិត​ទាំង​កណ្តាល​ថ្ងៃ​ត្រង់​ក្នុង​ទីក្រុង​ភ្នំពេញ ហាក់​ស្ថិតនៅ​ឆ្ងាយ​ដូច​ជើងមេឃ​ហៅ​មិន​ឮ ហើយ​រីឯ​ពន្លឺ​នៃ​ភស្តុតាង​ពី​កាមេរ៉ា​សុវត្ថិភាព ក៏​ស្ថិត​ក្នុង​ភាព​អាថ៌កំបាំង​យ៉ាង​ងងឹត​សូន្យសុង​ថែមទៀត​ផង។

រដ្ឋាភិបាល​ឯក​បក្ស​មិន​បាន​រក​យុត្តិធម៌​សម្រាប់​លោក​បណ្ឌិត និង​ក្រុម​គ្រួសារ​របស់​លោក​ឡើយ ក្រៅតែ​ការ​កាត់ទោស​បុរស​ឈ្មោះ អឿត អាង ហៅ ជួប សម្លាប់ ដោយ​មិន​បាន​បង្ហាញ​ភស្តុតាង​គ្រប់គ្រាន់​នោះ ឲ្យ​ជាប់​ពន្ធនាគារ​អស់​មួយ​ជីវិត។

ការ​កាត់ទោស​បុរស​ឈ្មោះ អឿត អាង នេះ​កំពុង​ស្ថិតនៅ​ក្នុង​មន្ទិល​សង្ស័យ​ដ៏​ធំ​របស់​របស់​មជ្ឈដ្ឋាន​ជាតិ និង​អន្តរជាតិ។ មតិ​ជាច្រើន​ចាត់ទុក អឿត អាង ហៅ ជួប សម្លាប់ ថា​ជា​ឃាតក​ក្លែងក្លាយ​ដែល​ត្រូវ​បាន​គេ​យក​មក​សម្ដែង​ឲ្យ​សាធារណជន​មើល​ឲ្យ​បាន​អស់ចិត្ត​ប៉ុណ្ណោះ។ ចម្លើយ​របស់ អឿត អាង ដែល​សារភាព​ថា ខ្លួន​បាន​សម្លាប់​បណ្ឌិត កែម ឡី ដោយសារតែ​ជំពាក់​លុយ​ចំនួន ៣​ពាន់​ដុល្លារ​នោះ ត្រូវ​គេ​ជឿ​ថា​វា​ជា​រឿង​មិន​សម​ហេតុផល និង​មិន​សមាមាត្រ​ទៅ​នឹង​តម្លៃ​កាំភ្លើង​ដែល​ប្រើប្រាស់​ដើម្បី​ធ្វើ​ឃាត​បណ្ឌិត កែម ឡី នោះ​ទេ។

បើ​ទោះបីជា អឿត អាង បាន​សារភាព​ថា​គាត់​ជា​អ្នក​បាញ់​សម្លាប់​បណ្ឌិត កែម ឡី ដោយសារ​រឿង​ជំពាក់​លុយ​ក៏ដោយ ប៉ុន្តែ អឿត អាង ដែល​រស់នៅ​តំបន់​ដាច់ស្រយាល​មួយ​ក្នុង​ឃុំ​នគរភាស ស្រុក​អង្គរជុំ ខេត្ត​សៀមរាប បាន​ចាកចេញ​ពី​ស្រុក​កំណើត​មក​ទីក្រុង​ភ្នំពេញ នៅ​ថ្ងៃ​ទី​០១ ខែ​កក្កដា ឆ្នាំ​២០១៦ គឺ​រយៈពេល ១០​ថ្ងៃ​មុន​ពេល​ធ្វើ​ឃាត។

នៅ​មាន​សំណួរ និង​បញ្ហា​ជាច្រើន​ទៀត​ដែល​មិនទាន់​មាន​ចម្លើយ​ដូចជា តើ​អ្នក​ទាំង​ពីរ​ស្គាល់​គ្នា​ដោយ​វិធី​ណា ដែល​អាច​នាំ​ឲ្យ​បណ្ឌិត កែម ឡី ខ្ចី​លុយ​ពី​ឈ្មោះ អឿត អាង នេះ?

តាមរយៈ​ការ​ធ្វើ​កោសល្យវិច័យ​របស់​សមត្ថកិច្ច​បង្ហាញ​ថា កាំភ្លើង​ដែល​ឃាតក​បាញ់​សម្លាប់​បណ្ឌិត កែម ឡី ជា​ប្រភេទ​កាំភ្លើងខ្លី​ម៉ាក GLOCK ផលិត​នៅ​ប្រទេស​អូទ្រីស (Austria) ដែល​មាន​តម្លៃ​ប្រហែល​ពី ២​ពាន់​ទៅ​បី​ពាន់​ដុល្លារ​សហរដ្ឋ​អាមេរិក។ ដូច្នេះ តម្លៃ​កាំភ្លើង​របស់ អឿត អាង សឹង​ស្មើ​គ្នា​ទៅ​នឹង​ចំនួន​លុយ​ដែល អឿត អាង ថា​បណ្ឌិត កែម ឡី ជំពាក់​ខ្លួន​នោះ​ទៅទៀត។ ចំណុច​នេះ​ហើយ​ដែល​មហាជន​នៅតែ​មាន​មន្ទិល​សង្ស័យ​ទៅលើ​ចម្លើយ​របស់​ឃាតក​ដែល​មាន​លក្ខណៈ​មិន​សម​ហេតុផល។

តើ​នៅ​លើ​លោក​នេះ​មាន​ទេ​ដែល​កូនបំណុល​ក្នុង​ទឹកប្រាក់​ចំនួន ៣​ពាន់​ដុល្លារ ហើយ​ម្ចាស់​បំណុល​ត្រូវតែ​ទៅ​ទិញ​កាំភ្លើង​តម្លៃ​ប្រហែល ៣​ពាន់​ដុល្លារ​ដែរ ដើម្បី​យក​ទៅ​ធ្វើ​ឃាត​កូនបំណុល​ដោយ​មិន​បាន​និយាយ​ទារ​លុយ​ពី​កូនបំណុល​សូម្បី​មួយ​ម៉ាត់ មុន​បាញ់​សម្លាប់​នោះ?

នេះ​ហើយ​ជា​ចំណុច​ដែល​មហាជន​ទូទៅ​នៅតែ​មាន​ការ​សង្ស័យ​ចំពោះ​ចម្លើយ​មិន​សម​ហេតុផល​របស់​ឃាតក។

រូបថត​បណ្ឌិត កែម ឡី

មរណភាព​របស់​បណ្ឌិត កែម ឡី ញាំញី​ទៅ​ដោយ​ភាព​ចម្រូងចម្រាស​ជាច្រើន និង​ការ​ធ្វើ​ទុក្ខបុកម្នេញ​របស់​សមត្ថកិច្ច​ក្នុង​អំឡុង​ពិធី​តម្កល់​សព និង​ក្នុង​ពេល​ហែ​សព​ចេញ​ពី​ទីក្រុង​ភ្នំពេញ​ទៅកាន់​ស្រុក​កំណើត​ក្នុង​ខេត្ត​តាកែវ។

ក្នុង​អំឡុង​ពេល​តម្កល់​សព​នៅ​វត្ត​ចាស់ សមត្ថកិច្ច​ដែល​ស្លៀកពាក់​ស៊ីវិល បាន​រំខាន​ដល់​ពិធី​បុណ្យ​សព ដូចជា​ការ​ថតរូប​អ្នក​ចូលរួម​បុណ្យ​សព ការ​បង្ហាញ​កាំភ្លើង​ខ្លី​ដើម្បី​បំភ័យ​ដល់​អ្នក​ចូលរួម និង​បាន​ដាក់​សម្ពាធ​ដល់​ព្រះ​ចៅអធិការ​វត្ត​ចាស់ ឲ្យ​ឆាប់​យក​សព​បណ្ឌិត កែម ឡី ចេញ​ពី​វត្ត​ជាដើម។

បន្ថែម​ពី​នេះ​ទៅ​ទៀត នៅ​ពេល​ដែល​ហែ​សព​របស់​បណ្ឌិត កែម ឡី ពី​វត្ត​ចាស់ ក្នុង​ទីក្រុង​ភ្នំពេញ​យក​ទៅ​បញ្ចុះ​នៅ​ផ្ទះ​កំណើត​របស់​បណ្ឌិត កែម ឡី ក្នុង​ខេត្ត​តាកែវ រដ្ឋាភិបាល​លោក ហ៊ុន សែន បាន​ហាម​ស្ថានីយ​ប្រេងឥន្ធនៈ​ទាំងអស់​នៅ​តាម​ដង​ផ្លូវ​ឲ្យ​ផ្អាក​ការ​លក់​សាំង​ជា​បណ្ដោះអាសន្ន។

តើ​ហេតុ​អ្វី​បាន​ជា​រដ្ឋាភិបាល​លោក ហ៊ុន សែន ធ្វើ​ទុក្ខបុកម្នេញ​ពិធី​ហែ​សព​ដ៏​សោកសង្រេង​របស់​គ្រួសារ​សព និង​របស់​មហាជន​ទូទាំង​នគរ​ទៅវិញ? តើ​មាន​ហេតុផល​អ្វី​នៅ​ពី​ក្រោយ​ការ​ធ្វើ​ទុក្ខបុកម្នេញ​នេះ? តើ​រដ្ឋាភិបាល​មាន​អារម្មណ៍​រអៀស​ខ្លួន ឬ​មាន​ភាព​អាម៉ាស់​ពី​អំពើ​ឃាតកម្ម​ដ៏​អយុត្តិធម៌​នេះ ឬ​យ៉ាង​ណា?

នៅ​ពេល​ពិធី​បុណ្យ ១០០​ថ្ងៃ​សព​បណ្ឌិត កែម ឡី អាជ្ញាធរ​បាន​រារាំង​ព្រះ​ចៅអធិការ​វត្ត​ចាស់ មិន​ឲ្យ​ទទួល​ធ្វើ​កម្មវិធី​បុណ្យ​នោះ​ទេ ហើយ​ចំណែក​អាជ្ញាធរ​ខេត្ត​តាកែវ ឯណោះ​វិញ ក៏​បាន​ធ្វើ​ទុក្ខបុកម្នេញ​តាមរយៈ​ការ​រំខាន​មិន​ឲ្យ​ធ្វើ​ពិធី​បុណ្យ​បាន​ស្រួលបួល​ដែរ។ អាជ្ញាធរ​ខេត្ត​តាកែវ ពេល​នោះ​បាន​រារាំង​អ្នក​សារព័ត៌មាន​មិន​ឲ្យ​សម្ភាស​អ្នក​ចូលរួម​បុណ្យ និង​ថែមទាំង​ព្រមាន​ពួកគេ​ទៀត​ផង។

ពលរដ្ឋ​ខ្មែរ​ភាគច្រើន​ជឿ​ថា លោក ហ៊ុន សែន គឺជា​មនុស្ស​តែ​ម្នាក់​គត់​ដែល​ត្រូវ​បន្ទោស​ក្នុង​ករណី​ឃាតកម្ម និង​ការ​ធ្វើ​ទុក្ខបុកម្នេញ​ទៅលើ​សាកសព និង​គ្រួសារ​សព។

ឃាតកម្ម​ដ៏​ល្បី​រន្ទឺ​មួយ​នេះ ក៏ដូចជា​ឃាតកម្ម​ខ្នាត​ធំ​ផ្សេងៗ​ទៀត​ដែរ​ដែល​ព្រលឹង​ជនរងគ្រោះ​ទាំងនោះ​ហាក់​តាម​លង​បន្លាច​លោក ហ៊ុន សែន ក្នុង​សុបិន​នៃ​ភាព​អន្ធការ​ដ៏​ញឹកញាប់៖

  • ឃាតកម្ម​ទៅលើ​បណ្ឌិត កែម ឡី កាលពី​ឆ្នាំ​២០១៦
  • ក៏ដូចជា​ឃាតកម្ម​ទៅលើ​អ្នកស្រី ពិសិដ្ឋ ពីលីកា តារា​ភាពយន្ត និង​ជា​គ្រូ​របាំ​ព្រះរាជទ្រព្យ​កាលពី​ឆ្នាំ​១៩៩៩
  • ការ​ធ្វើគត​ព្រះ​តេជគុណ សំ ប៊ុនធឿន កាលពី​ឆ្នាំ​២០០៣
  • ការ​បាញ់​សម្លាប់​លោក ជា វិជ្ជា ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា កាលពី​ឆ្នាំ​២០០៤
  • ការ​បាញ់​សម្លាប់​លោក ឈុត វុទ្ធី ប្រធាន​អង្គការ​ការពារ​ធនធាន​ធម្មជាតិ​កាលពី​ឆ្នាំ​២០១២
  • និង​អំពើ​ឃាតកម្ម​ខ្នាត​ធំ​ជាច្រើន​ទៀត​ទៅលើ​កងទ័ព និង​មន្ត្រី​ជាន់ខ្ពស់​របស់​គណបក្ស​រាជា​និយម​ហ៊្វុនស៊ិនប៉ិច កាលពី​ឆ្នាំ​១៩៩៧

ដែល​ឃាតកម្ម​ទាំងនេះ សមត្ថកិច្ច​បរាជ័យ​ក្នុង​ការស្វែងរក​ឃាតក​ពិត ឬ​អ្នកបញ្ជា​នៅ​ពី​ក្រោយ​យក​មក​ផ្ដន្ទាទោស​តាម​ផ្លូវ​ច្បាប់។

ដោយសារ​ភាព​បរាជ័យ​ក្នុង​រឿង​យុត្តិធម៌​ទាំងអស់​នេះ​ហើយ ដែល​ធ្វើ​ឲ្យ​មហាជន​អស់​ជំនឿ​លើ​ប្រព័ន្ធ​តុលាការ​របស់​ប្រទេស ហើយ​មនុស្ស​ជាច្រើន​បាក់​ទឹកចិត្ត​ក្នុង​ការ​បន្ត​ស្វែងរក​យុត្តិធម៌​ពិតប្រាកដ​នៅ​កម្ពុជា។

ក្នុង​នាម​ជា​អ្នក​សារព័ត៌មាន​មួយ​រូប ខ្ញុំ​មាន​ការ​ទទួល​ខុសត្រូវ​ក្នុង​ការ​រាយការណ៍ និង​បន្ត​ការ​រាយការណ៍​ថែមទៀត​ដើម្បី​ឲ្យ​ប្រាកដ​ថា តើ​លោក ហ៊ុន សែន នឹង​ដោះស្រាយ​បញ្ហា​នេះ​ដោយ​របៀប​ណា។

រូបថត​បណ្ឌិត កែម ឡី

តើ​លោក ហ៊ុន សែន នឹង​ស្វែងរក​ឃាតក​ពិត ឬ​អ្នក​នៅ​ពី​ក្រោយ​ការ​សម្លាប់​បណ្ឌិត កែម ឡី ក៏ដូចជា​សកម្មជន​បរិស្ថាន មេដឹកនាំ​សហជីព ព្រះសង្ឃ តារា​សម្ដែង និង​ឃាតកម្ម​ខ្នាត​ធំ​ជាច្រើន​ទៀត ឬ​មួយ​លោក ហ៊ុន សែន ត្រូវ​បិទ​រឿង​ទាំងនេះ​ចោល ដោយ​សង្ឃឹម​ថា​ពលរដ្ឋ និង​អ្នក​សារព័ត៌មាន​នឹង​ភ្លេច​នោះ?

ប្រាកដ​ណាស់ សាធារណជន​នឹង​មិន​ភ្លេច​រឿង​នេះ​ជាដាច់ខាត ហើយ​ក្នុង​នាម​ខ្ញុំ​ជា​អ្នក​សារព័ត៌មាន ក៏ដូចជា​តួនាទី​របស់​អ្នក​សារព័ត៌មាន​ដទៃ​ទៀត នៅតែ​បន្ត​ស៊ើប​អង្កេត​ដើម្បី​បង្ហាញ​ការពិត និង​ធ្វើ​សេចក្តី​រាយការណ៍។

ជា​ចុងក្រោយ ខ្ញុំ​សូម​បួងសួង​ឲ្យ​វិញ្ញាណក្ខន្ធ​របស់​បណ្ឌិត កែម ឡី និង​ជនរងគ្រោះ​ដទៃ​ទៀត​ដែល​បាន​ស្លាប់​ទាំង​អយុត្តិធម៌ បាន​ទៅកាន់​សុគតិភព ហើយ​សូម​បួងសួង​ដល់​វត្ថុ​ស័ក្ដិសិទ្ធិ​ទាំងអស់​ក្នុង​លោក តាម​ជួយ​ទ្រទ្រង់ ថែរក្សា​គ្រួសារ​ជនរងគ្រោះ​ទាំងឡាយ​ឲ្យ​ចៀស​ផុត​ពី​ការបៀតបៀន​នៃ​ភាវ​អាក្រក់ ហើយ​ទទួល​បាន​នូវ​យុត្តិធម៌​ពិតប្រាកដ និង​ចៀស​ផុត​ពី​ការ​ធ្វើ​ទុក្ខបុកម្នេញ​ទាំងឡាយ។

ខ្ញុំ​ក៏​សូម​ប្រគេន​ពរ​ដល់​ព្រះ​ថេរានុត្ថេរៈ​គ្រប់​ព្រះអង្គ និង​លោកតា លោក​យាយ អ៊ំ ពូ មីង ពលរដ្ឋ​ខ្មែរ​ដែល​កំពុង​រស់នៅ​ទីនេះ សូម​ឲ្យ​មាន​សុខភាព​ល្អ និង​ទទួល​បាន​ជ័យជម្នះ​គ្រប់​ភារកិច្ច។

សូម​អគុណ!

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

សេចក្ដីរាយការណ៍ពិសេស