នៅក្នុងតំបន់អាស៊ីអាគ្នេយ៍ដែលមានប្រទេសចំនួន១០ គឺមានប្រជាជនជាង ៦៧៥លាននាក់។ តំបន់នេះធ្លាក់ក្នុងការរាតត្បាតនៃជំងឺកូវីដ-១៩ យ៉ាងធ្ងន់ធ្ងរនៅដំណាក់កាលចុងក្រោយនេះ។
គិតត្រឹមថ្ងៃទី២៦ កក្កដា ចំនួនអ្នកឆ្លងជំងឺកូវីដ-19 នៅក្នុងប្រទេសសមាជិកអាស៊ានបានកើនឡើងជិត ៧លាននាក់ ក្នុងនោះមានអ្នកស្លាប់ចំនួន ១៣ម៉ឺន ៣៧៤១នាក់។ នេះបើតាមទិន្នន័យគេហទំព័រតាមដានការរីករាលដាលជំងឺកូវីដលើពិភពលោក ហៅថា Worldometer។ ក្នុងចំណោមនេះ គឺប្រទេសឥណ្ឌូនេស៊ី ដែលមានប្រជាជនជាង ២៧៦លាននាក់ នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេក្នុងចំណោមសមាជិកអាស៊ានទាំងអស់។ បន្ទាប់មក ប្រទេសហ្វីលីពីន ម៉ាឡេស៊ី ភូមា ថៃ និងកម្ពុជា។
ក្នុងដំណាក់កាលនេះ ប្រទេសចិន ដែលជាប្រភពឆ្លងដំបូងគេនៃការផ្ទុះមេរោគកូរ៉ូណាបានក្លាយជាប្រទេសដែលបញ្ចេញវ៉ាក់សាំងច្រើនជាងគេទាំងអស់ទៅដល់បណ្ដាប្រទេសនៅទូទាំងពិភពលោក គឺប្រមាណជា ៩០ប្រទេស ប៉ុន្តែតំបន់អាស៊ីអាគ្នេយ៍ដែលកៀកនឹងប្រទេសចិន គឺងាយទទួលការដឹកជញ្ជូនវ៉ាក់សាំងពីប្រទេសចិន។ វ៉ាក់សាំងចិន ដែលជាជំនួយរបស់ចិនផង និងស្នើទិញផង គឺវ៉ាក់សាំងស៊ីណូហ្វាម និងស៊ីណូវ៉ាក់។ ស៊ីណូវ៉ាក់ ត្រូវបានប្រើប្រាស់ច្រើនជាងគេក្នុងតំបន់នេះ តែវ៉ាក់សាំងរបស់ចិនទាំងពីរប្រភេទនេះពុំសូវមានប្រសិទ្ធភាពច្រើនទេ បើធៀបនឹងវ៉ាក់សាំងរបស់សហរដ្ឋអាមេរិក និងអឺរ៉ុប។
ក្នុងដំណាក់កាលដែលជំងឺកូវីដរាតត្បាតធ្ងន់ធ្ងរនេះ គឺបណ្ដាប្រទេសនៅអាស៊ីអាគ្នេយ៍បានឲ្យដឹងថា វ៉ាក់សាំងប្រទេសចិននៅតែអាចឆ្លងជំងឺប្រភេទនេះ ហើយរហូតគ្រោះថ្នាក់ដល់ជីវិតទៀតផង។ តែយ៉ាងណា អង្គការសុខភាពពិភពលោក (WHO) ទទួលស្គាល់វ៉ាក់សាំងចិនក្នុងដំណាក់កាលអាសន្នតែប៉ុណ្ណោះ។ ក្នុងស្ថានភាពនេះ ប្រទេសនៅអាស៊ីអាគ្នេយ៍គឺបានប្រើប្រាស់វ៉ាក់សាំងប្រទេសចិន ច្រើនលើសលប់ចាក់ទៅលើប្រជាជនរបស់ពួកគេ។ ប៉ុន្តែនៅពេលដែលវ៉ាក់សាំងនេះប្រើប្រាស់ហើយនៅតែឆ្លងជំងឺកូវីដ គឺប្រជាជននៅក្នុងតំបន់នេះរួមនឹងរដ្ឋាភិបាលមួយចំនួននៃសមាគមនេះ បានបន្ថយការប្រើប្រាស់វ៉ាក់សាំងចិន ហើយក៏ងាកទៅរកការប្រើប្រាស់វ៉ាក់សាំងរបស់អាមេរិក និងអឺរ៉ុប។
នៅទីបំផុត វ៉ាក់សាំងសហរដ្ឋអាមេរិក និងអឺរ៉ុប ចាប់ផ្ដើមធ្លាក់មកដល់តំបន់អាស៊ីអាគ្នេយ៍ គឺកាលពី ២សប្ដាហ៍មកនេះ។ ប្រព័ន្ធផ្សព្វផ្សាយជាច្រើនក្នុងតំបន់នេះ បានផ្សព្វផ្សាយអំពីការមកដល់វ៉ាក់សាំងរបស់សហរដ្ឋអាមេរិកក្នុងដំណាក់កាលដំបូងនៃការផ្ដល់ជំនួយមនុស្សធម៌ គឺវ៉ាក់សាំងប្រភេទ Moderna និង Johnson & Johnson ហើយប្រទេសខ្លះប្រើប្រាស់វ៉ាក់សាំងអាមេរិក Pfizer-BioNTech។
តាមបណ្ដាញសង្គម Facebook នៅក្នុងតំបន់អាស៊ីអាគ្នេយ៍ ប្រជាជនបានបញ្ចេញមតិ និងដោះដូរទស្សនៈគ្នាអំពីការប្រើប្រាស់វ៉ាក់សាំងសហរដ្ឋអាមេរិក វ៉ាក់សាំងអឺរ៉ុប និងវ៉ាក់សាំងប្រទេសចិន។ អ្នកខ្លះវាយប្រហារវ៉ាក់សាំងរបស់ចិន សរសើរវ៉ាក់សាំងអាមេរិកនិងអឺរ៉ុប។ អ្នកខ្លះចាត់ទុកការប្រើប្រាស់វ៉ាក់សាំងចិន គ្រាន់បើដែរក្នុងគ្រាអាសន្នទប់ស្កាត់ការវាយលុករបស់ជំងឺកូវីដ។ ប៉ុន្តែភាគច្រើនពួកគេរីករាយនឹងទទួលបានការចាក់វ៉ាក់សាំងរបស់សហរដ្ឋអាមេរិក និងអឺរ៉ុប ដែលពួកគេគិតថាវាមានប្រសិទ្ធភាពខ្លាំងក្នុងការប្រយុទ្ធប្រឆាំងជំងឺរាតត្បាតសកលនេះ ហើយវាមិនប៉ះពាល់អនាគតសុខភាពរបស់អ្នកប្រើប្រាស់។
គ្រាន់តែឮដំណឹងថាវ៉ាក់សាំងរបស់សហរដ្ឋអាមេរិកបានមកដល់តំបន់អាស៊ីអាគ្នេយ៍ហើយនោះ គឺប្រជាជនក្នុងតំបន់នោះដែលមិនទាន់ទទួលការចាក់វ៉ាក់សាំងពីប្រទេសចិន ក៏ត្រៀមលក្ខណៈដើម្បីចាក់វ៉ាក់សាំងរបស់សហរដ្ឋអាមេរិក។
ក្នុងដំណាក់កាលដំបូងនៃជំនួយវ៉ាក់សាំង ៨០លានដូសនៅទូទាំងពិភពលោក និងក្នុងគម្រោងធំ ៥០០លានដូស រដ្ឋការរបស់លោក ចូ បៃដិន បានទម្លាក់វ៉ាក់សាំងពីរប្រភេទទៅឱ្យប្រទេសក្នុងតំបន់អាស៊ីអាគ្នេយ៍ គឺវ៉ាក់សាំង Moderna និង Johnson & Johnson។ ប្រទេសដែលទទួលបានវ៉ាក់សាំងរបស់អាមេរិកដំបូងគេ គឺឥណ្ឌូនេស៊ី បាន ៤លានដូស។ ឥណ្ឌូនេស៊ី មានប្រជាជនជាង ២៧៦លាននាក់ គឺច្រើនជាងគេនៅក្នុងតំបន់នេះ ហើយកំពុងប្រឈមនឹងគ្រោះថ្នាក់ធ្ងន់ធ្ងរជាងគេ។ ប្រទេសនេះប្រើប្រាស់វ៉ាក់សាំងស៊ីណូវ៉ាក់របស់ចិនលើសលប់ ហើយភាគច្រើនវ៉ាក់សាំងនេះចាក់ទៅលើបុគ្គលិកសុខាភិបាល។
តាមព័ត៌មានចុងក្រោយនេះ វ៉ាក់សាំងស៊ីណូវ៉ាក់របស់ចិន នៅតែពុំអាចទប់ទល់បាននូវការរាតត្បាតនៃជំងឺឆ្លងនេះទេ។ បុគ្គលិកសុខាភិបាលខ្លះដែលទទួលចាក់វ៉ាក់សាំងគ្រប់ចំនួនពីរលើកមកហើយ គឺនៅតែឆ្លង ហើយគ្រោះថ្នាក់អាយុជីវិតទៀតផង។ ក្រសួងសុខាភិបាលរបស់ប្រទេសឥណ្ឌូនេស៊ី កំពុងសិក្សាជាមួយនឹងក្រុមហ៊ុនវ៉ាក់សាំងស៊ីណូវ៉ាក់ប្រទេសចិន ថាតើត្រូវបន្ថែមវ៉ាក់សាំងប្រភេទនេះមួយដូសទៀតឬទេទៅឱ្យអ្នកដែលទទួលវ៉ាក់សាំងពីរលើកហើយនោះ។ នេះនិយាយពីប្រទេសឥណ្ឌូនេស៊ី។
វ៉ាក់សាំងរបស់សហរដ្ឋអាមេរិកដែលទទួលស្គាល់ដោយអង្គការសុខភាពពិភពលោក ថាមានប្រសិទ្ធភាពខ្ពស់ជិត ១០០ភាគរយកំពុងទទួលបានការទុកចិត្តជាខ្លាំង។
ប្រទេសក្នុងតំបន់អាស៊ីអាគ្នេយ៍ដែលទទួលវ៉ាក់សាំងអាមេរិកបន្ទាប់ពីប្រទេសឥណ្ឌូនេស៊ី គឺម៉ាឡេស៊ី ហ្វីលីពីន វៀតណាម និងប្រទេសឡាវ។ ម៉ាឡេស៊ី ទទួលបានវ៉ាក់សាំងពីសហរដ្ឋអាមេរិកជំហានដំបូងជាង ១លានដូស នៅខណៈវៀតណាម ទទួលវ៉ាក់សាំងពីសហរដ្ឋអាមេរិកដល់ដំណាក់កាលទី២ ចំនួន ៥លានដូស។ ចំណែកហ្វីលីពីន ទទួលវ៉ាក់សាំងដល់ដំណាក់កាលទី២ គឺ ៣លាន ២សែនដូស ហើយឥណ្ឌូនេស៊ី ត្រៀមទទួលវ៉ាក់សាំងពីអាមេរិក ៣លានដូសថែមទៀត។ ចំណែកឯប្រទេសឡាវ ទទួលបានពីអាមេរិក ១លាន ៨ពាន់ដូសនៅដំណាក់កាលដំបូង។ ចំណែកប្រទេសថៃ កម្ពុជា គឺវ៉ាក់សាំងរបស់សហរដ្ឋអាមេរិកត្រូវធ្លាក់មកដល់ក្នុងអំឡុងពេលនេះដែរ។
កម្ពុជា ត្រូវបានស្ថានទូតអាមេរិកប្រកាសថានឹងទទួលបានជាង ១លានដូសនៅពេលដែលប្រទេសថៃ ក៏ត្រៀមទទួលវ៉ាក់សាំងអាមេរិកជាច្រើនលានដូសទៀតផង។ យ៉ាងណា ប្រទេសសិង្ហបុរី បានប្រើប្រាស់វ៉ាក់សាំងសហរដ្ឋអាមេរិកទាំង ៣ប្រភេទនេះ គឺបានចាក់លើប្រជាជនរបស់ខ្លួនភាគច្រើនទៅហើយ។ ប៉ុន្តែការកត់សម្គាល់មួយទៀត ប្រទេសវៀតណាម ដែលមានប្រជាជនជិត ១១០លាននាក់ មិនបានដាក់ពាក្យស្នើទិញវ៉ាក់សាំងពីចិន ឬអំពាវនាវសុំវ៉ាក់សាំងពីប្រទេសចិន នោះទេ ថ្វីត្បិតជាប្រទេសជាប់ព្រំដែនជាមួយនឹងចិន ក៏ដោយ។
រដ្ឋាភិបាលវៀតណាម ត្រូវបានមើលឃើញថានិយមប្រើប្រាស់វ៉ាក់សាំងរបស់សហរដ្ឋអាមេរិក និងអឺរ៉ុប គឺវ៉ាក់សាំង AstraZeneca។ ប្រជាជនវៀតណាម សម្ដែងការត្រេកអរដែលសហរដ្ឋអាមេរិកផ្ដល់ជំនួយវ៉ាក់សាំងមកទាន់ពេលវេលា។ នាយករដ្ឋមន្ត្រីវៀតណាម តាងនាមឲ្យប្រជាជនរបស់ប្រទេសនេះ បានថ្លែងអំណរគុណយ៉ាងជ្រាលជ្រៅចំពោះរដ្ឋការរបស់លោក ចូ បៃដិន ដែលបានបញ្ជូនវ៉ាក់សាំងមនុស្សធម៌មកឲ្យវៀតណាម ក្នុងពេលដែលប្រទេសនេះធ្លាក់ក្នុងស្ថានភាពនៃជំងឺរាតត្បាតធ្ងន់ធ្ងរ។ មិនថាឡើយប្រជាជនវៀតណាម ដែលសម្លឹងចង់ចាក់វ៉ាក់សាំងរបស់សហរដ្ឋអាមេរិក គឺប្រជាជនប្រទេសផ្សេងៗទៀតក្នុងតំបន់នេះ ក៏ងាកទៅរកការចាក់វ៉ាក់សាំងរបស់សហរដ្ឋអាមេរិក និងអឺរ៉ុប។ តែជាមួយគ្នានេះ ប្រទេសជប៉ុន ដែលមានសក្ដានុពលសេដ្ឋកិច្ចដ៏ខ្លាំងក្លាទី៣ នៃពិភពលោក បានចាប់ផ្ដើមទម្លាក់វ៉ាក់សាំង AstraZeneca របស់អឺរ៉ុប ទៅដល់ប្រទេសក្នុងតំបន់អាស៊ីអាគ្នេយ៍ដូចនឹងសហរដ្ឋអាមេរិកផងដែរ។
តាមរយៈជំនួយវ៉ាក់សាំងមកកាន់ប្រទេសក្នុងតំបន់អាស៊ីអាគ្នេយ៍ ស្ថានទូតសហរដ្ឋអាមេរិក បានចេញសេចក្ដីថ្លែងការណ៍ថា សហរដ្ឋអាមេរិកកំពុងធ្វើការឆ្លើយតបនឹងមេរោគរាតត្បាតជាសកលនេះ ដោយផ្តល់វ៉ាក់សាំងដែលមានសុវត្ថិភាព និងប្រសិទ្ធភាពដល់ប្រជាជនក្នុងចំនួនដ៏ច្រើនតាមដែលអាចធ្វើទៅបាន។ សេចក្ដីថ្លែងការណ៍បន្តថា ប្រជាជាតិនានាត្រូវការប្រព័ន្ធសុខាភិបាលរឹងមាំជាមួយនឹងការផ្គត់ផ្គង់វ៉ាក់សាំង។ ដោយសារជំងឺកូវីដ បានបង្កការរាំងស្ទះដល់ផ្នែកសុខាភិបាល អប់រំ ការងារ និងការប្រយុទ្ធប្រឆាំងនឹងជំងឺអេដស៍នៅក្នុងប្រទេសជាច្រើន គឺសហរដ្ឋអាមេរិកសន្យាផ្តល់ជំនួយមនុស្សធម៌នៅទូទាំងសកលលោក៕