តើមានសេដ្ឋីស្រុកខ្មែរណាខ្លះ ជនបរទេសណាខ្លះ ប្រមូលទ្រព្យពីស្រុកខ្មែរទៅលាក់ទុកនៅបរទេស តាមកោះឯនាយសមុទ្រ ដោយបើកក្រុមហ៊ុនបំភ័ន្តភ្នែក? មានអ្នកខ្លះគេថាជនទាំងនោះបើកក្រុមហ៊ុនដាក់ទុនរកស៊ីធម្មតា។
តទៅនេះ ជាភាគទី៥ នៃសេចក្តីរាយការណ៍ស្រង់ពីសំណុំឯកសារប៉ាណាម៉ា ឯកសារឋានសួគ៌ និងឯកសារការទម្លាយក្រៅដែនដី។ តើអង្គភាពប្រឆាំងអំពើពុករលួយធ្វើយ៉ាងណាដែរក្រោយធ្លាយព័ត៌មាននោះ?
ពាណិជ្ជករអ្នកមានលុយពីស្រុកខ្មែរដែលយកលុយទៅដាក់ទុកនៅប្រទេសកោះតូចៗនៅអាមេរិកកណ្តាល ដោយបើកក្រុមហ៊ុនសម្បក ឬស្នូក (offshore shell company) ផ្សេងៗបង្វែងដានគេចបង់ពន្ធលើចំណូល ឬសម្បត្តិទ្រព្យ មិនមែនទៅដាក់ទុនរកស៊ីនៅទីនោះទេ។
តាមឯកសារបែកធ្លាយនៅឆ្នាំ២០១៦ ដែលរដ្ឋាភិបាលប្រទេសជាច្រើនបានស៊ើបអង្កេត ចាប់ផ្ដន្ទាទោសអ្នកគេចពន្ធនោះ យើងសូមបញ្ជាក់ថា អ្នកដាក់លុយទុកនៅតាមកោះទាំងនោះមានដូចជា៖
- British Virgin Islands
- Cayman Islands
- Bermuda
- Bahamas
- St. Kitts & Nevis
- Malta
- Cyprus
- Mauritius
- Seychelles ជាដើម មានបំណងតែមួយគត់ គឺគេចបង់ពន្ធឲ្យរដ្ឋ។
គេហៅកន្លែងទាំងអស់នោះថា «Tax Haven» ឬប្រែថា «ទីសុវត្ថិភាពពន្ធដារ»។ បើអ្នកដាក់លុយទុកទីនោះទាំងអស់គ្នា រកស៊ីបង់ពន្ធដារត្រឹមត្រូវតាមច្បាប់ រដ្ឋាភិបាលប្រទេសមួយចំនួននោះគេមិនចាប់ចងអ្វីទេ។
មនុស្សម្នាក្នុងសង្គមខ្មែរគេធ្លាប់និយាយថា អ្នកមានគេឆ្លាត។ មកពីគេឆ្លាត ទើបគេជាអ្នកមាន ដូច្នេះអ្នកមានកប់ពពកទាំងឡាយនោះក៏ឆ្លាតចេះលាក់លុយដែរ ទម្រាំគេតាមរកឃើញ ដូចដែលព្រះពុទ្ធដីការំឭកមនុស្សលោកជិត ២៦០០ឆ្នាំថា លាក់យូរមិនបាននោះឯង។
ក្នុងឯកសារឋានសួគ៌ Paradise Papers មានឈ្មោះ លឹម ហ៊ួ (Lim Hour) មានអាសយដ្ឋាននៅផ្ទះលេខ៤៩អា/បេ (49A/B) ផ្លូវ២២១ សង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ ជានាយកក្រុមហ៊ុនសម្បក ឬស្នូក ក្រុមហ៊ុនលក់រថយន្តឈ្មោះ China Automobile Group Co. Ltd. នៅកោះ Cayman Islands ប្រើអាសយដ្ឋានពីរនៅទីនោះ៖
- ទី១- 3rd Floor, Queensgate House; 113 South Church Street; Georgetown; P.O. Box 10240 Grand Cayman KY1-1002; Cayman Islands
- ទី២- Clifton House; 75 Fort Street; Grand Cayman KY1-1108; Cayman Islands
ស៊ីដារ៉ា នុប (Sidara Noup) តាមឯកសារ Paradise Papers មានហ៊ុនក្នុងក្រុមហ៊ុនរ៉ែឧត្តរមានជ័យ (Uddor Meanchey Mining Holdings, Ltd.) បើកនៅឯកោះ Cayman Islands នាថ្ងៃទី៩ ខែតុលា ឆ្នាំ២០០៧ ដោយប្រើអាសយដ្ឋាននៅស្រុកខ្មែរផ្ទះលេខ១៣ បន្ទប់លេខ៤០០ សង្កាត់បឹងកេងកង១ ខណ្ឌចំការមន រាជធានីភ្នំពេញ។
នុប ស៊ីដារ៉ា មានហ៊ុនជាមួយឈ្មោះ ងឺ សាខុន (Sakhon Ngoeu) ក្នុងក្រុមហ៊ុនរ៉ែឧត្តរមានជ័យ (Uddor Meanchey Mining Holdings, Ltd.) ដែលប្រើអាសយដ្ឋានដោយឡែកមួយទៀតផ្ទះលេខ៥៨ ផ្លូវលេខ៣២២ សង្កាត់បឹងកេងកង១ ខណ្ឌចំការមន រាជធានីភ្នំពេញ។ ក្រុមហ៊ុនរ៉ែឧត្តរមានជ័យ (Uddor Meanchey Mining Holdings, Ltd.) បំបែកចេញជាឈ្មោះក្រុមហ៊ុនពីរផ្សេងទៀតនៅកោះ Cayman Islands គឺក្រុមហ៊ុន Rexwell Engineering Ltd. និងក្រុមហ៊ុន Reid Services Ltd. ដោយប្រើអាសយដ្ឋាននៃក្រុមហ៊ុនចុះបញ្ជីដដែល គឺ Clifton House; 75 Fort Street; Grand Cayman KY1-1108; Cayman Islands។
ក្រុមហ៊ុន Reid Services Ltd. បំបែកចំណែកភាគហ៊ុនជាសាខាក្រុមហ៊ុនចំនួន៤០ទៀត ដោយមានឈ្មោះផ្សេងៗគ្នា។ ក្រុមហ៊ុន Rexwell Engineering Ltd. ចុះឈ្មោះក្នុងបញ្ជីនៅប្រទេសអង់គ្លេស Suite 5, Tower Hill House; P.O. Box 263; Le Bordage; St. Peter Port; Guernsey; Channel Islands GY1 3QT; United Kingdom។
នៅប្រទេសកម្ពុជា ងឺ សាខុន (Sakhon Ngoeu) ជាប្រធានក្រុមអភិបាល និងជានាយកក្រុមហ៊ុនជ្យីរេហ៍ អន្តរជាតិ កម្ពុជា សំណង់ អាហរ័ណ នីហរ័ណ (JIREH INTERNATIONAL CAMBODIA CONSTRUCTION IMPORT & EXPORT CO., LTD.) ចុះបញ្ជីតាំងពីឆ្នាំ១៩៩៣។ ចំណែកឯ ស៊ីដារ៉ា នុប ជាប្រធានក្រុមអភិបាល និងជានាយកក្រុមហ៊ុន៖
- Green Coastal Co. Ltd
- Terakviniyo Co. Ltd.
- រតនៈសិលាកម្ពុជាអភិវឌ្ឍន៍ (Ratanak Stone Cambodia Development Co. Ltd.)
- និងក្រុមហ៊ុន JPE Co. Ltd.។
ចំណែកឯជនបរទេសដែលប្រើអាសយដ្ឋាននៅស្រុកខ្មែរ ហើយបើកក្រុមហ៊ុនសម្បក ឬស្នូកនៅឯនាយសមុទ្រ ក៏មានច្រើនបង្គួរដែរ ដោយមិនដឹងថារកស៊ីចូលហ៊ុនជាមួយពលរដ្ឋខ្មែរ ឬក៏ជួលឈ្មោះខ្មែរ អាសយដ្ឋានខ្មែរ ដើម្បីបើកក្រុមហ៊ុនលាក់លៀមពីរដ្ឋាភិបាលគេនោះទេ។
Parkes Daniel Graham ប្រើអាសយដ្ឋានស្រុកខ្មែរនៅ Colonial Mansion, អគារ A-One, ផ្លូវលេខ១០២ រាជធានីភ្នំពេញ និងអាសយដ្ឋាននៅប្រទេសអង់គ្លេស ក្នុងនាមជាអ្នកទទួលកេរពីកិច្ចព្រមព្រៀងផ្សះផ្សាគ្នា The Sara Meaker Settlement នៅកោះ Isle of Man ក្នុងសមុទ្រភាគខាងជើងចន្លោះប្រទេសអង់គ្លេស និងអៀឡង់ដ៍ ដោយមានភាគហ៊ុនឈ្មោះ៖
- Dowling-Sean Kevin
- Kewley-Jonathan Dennis Richards
- Moore-George Ramsey Martin
- Meikle Vanessa Patricia
- Humphrey Mark Stephen
- Parkes Alicia Teresa
- និង Spice Maria Luisa ។
Parkes Daniel Graham មានក្រុមហ៊ុនឈ្មោះ Gowbarrow Ltd. ចុះឈ្មោះចុះបញ្ជីនៅប្រទេសអង់គ្លេសនៅអាសយដ្ឋាន Reading House, Waterside Court; Neptune Close; Rochester; Kent, UK ME2 4NZ ដោយមានដៃគូហ៊ុនឈ្មោះ៖
- Parkes Michael Norman;
- Darbara Ltd.;
- Parkes Alicia Teresa
- និង Spice Maria Luisa។
ជនជាតិចិន ហ្សាង ហ្សិនហ្សុង (Zhang Zhenzhong) តាមឯកសារ Paradise Papers ប្រើអាសយដ្ឋានស្រុកខ្មែរនៅផ្ទះលេខ៥៤ ផ្លូវលេខ២៩៤ សង្កាត់បឹងកេងកង១ ខណ្ឌចំការមន រាជធានីភ្នំពេញ បើកក្រុមហ៊ុនសម្បក ឬស្នូកនៅកោះ Bermuda អាមេរិកកណ្តាល ឈ្មោះក្រុមហ៊ុន China Asean Resources Ltd. ចុះបញ្ជីនៅថ្ងៃទី១៥ ខែសីហា ឆ្នាំ២០០១ ហើយធ្វើជានាយកក្រុមហ៊ុននេះ។ ក្រុមហ៊ុន China Asean Resources Ltd. ដែលមានប្រភពពីក្រុងហុងកុង មានក្រុមហ៊ុនមេអណ្ដើករត់ការពីរ គឺ Central Registration Hong Kong Ltd. និង Computershare Hong Kong Investor Services Ltd. មានអាសយដ្ឋាននៅហុងកុងពីរ និងមានអាសយដ្ឋាននៅកោះ Bermuda មួយ គឺ Canon’s Court; 22 Victoria Street; Hamilton, HM 12, Bermuda។ ក្រុមហ៊ុន China Asean Resources Ltd. របស់ ហ្សាង ហ្សិនហ្សុង (Zhang Zhenzhong) មានហ៊ុននឹងដៃគូចំនួន ២៨នាក់ចុះឈ្មោះក្រុមហ៊ុនសម្បក ឬស្នូកពីឆ្នាំ២០០១ ដល់ឆ្នាំ២០១១។
Anthony Stuart Plummer តំណាងខាងចុះឈ្មោះចុះបញ្ជីឲ្យក្រុមហ៊ុននៅកោះម៉ាល់តា ក្នុងសមុទ្រ ម៉េឌីតែរ៉ាណេ ជិតប្រទេសអ៊ីតាលី ប្រើអាសយដ្ឋានស្រុកខ្មែរនៅផ្ទះលេខដេ១៥ (D25) បុរីចំការមន មហាវិថីព្រះនរោត្តម រាជធានីភ្នំពេញ បើកក្រុមហ៊ុនឈ្មោះ The Wellspring Initiative Ltd. នៅថ្ងៃទី២៨ ខែមេសា ឆ្នាំ២០១៥។
ឈ្មោះ Robert Knowles បង្កើតក្រុមហ៊ុនឈ្មោះ Pacific Biomass Energy Co. Ltd. ហើយធ្វើជានាយកក្រុមហ៊ុននេះ។ គេប្រើអាសយដ្ឋានស្រុកខ្មែរ FS៤ ផ្លូវលេខ១៩៩ សង្កាត់ទំនប់ទឹក ខណ្ឌចំការមន រាជធានីភ្នំពេញ។ អាសយដ្ឋាននៅប្រទេសឥណ្ឌា ស្ថិតនៅ Ankur Farm House, Beyond Ms Hostel, Sama Savli Road, Sama Vadodara, 390008, India។ ក្រុមហ៊ុន Pacific Biomass Energy Co. Ltd. មានដៃគូក្រុមហ៊ុនពីឥណ្ឌាពីរគឺ Ankur Jain និង Ankur Scientific Technologies Pte, Ltd.; ក្រុមហ៊ុនពីម៉ាឡេស៊ីពីរគឺ Tuck Low និង Low Chee Group SDN Bhd មានអាសយដ្ឋាននៅផ្ទះលេខ58g Jalan Wasasan, 2/3 Bandar Baru, Ampang 68000, Selangor, Malaysia; ក្រុមហ៊ុនពីកោះសាម័រ (Samoa) បី គឺ Lui Seru; Suafaiga Blood និង Sua Peter Blood មានអាសយដ្ឋាននៅ Tufuiopa, Apia, Vaimauga Sasae, Samoa។ ក្រុមហ៊ុន Pacific Biomass Energy Co. Ltd. ចុះបញ្ជីនៅកោះសាម័រ នៅថ្ងៃទី១៣ ខែវិច្ឆិកា ឆ្នាំ២០១៤។
សេចក្តីរាយការណ៍ប្រាំភាគ ស្រង់ពីឯកសារប៉ាណាម៉ា ឯកសារឋានសួគ៌ និងឯកសារបែកធ្លាយក្រៅដែនដី ស្តីអំពីក្រុមអាជីវករពាណិជ្ជករទុច្ចរិត មិនចង់បង់ពន្ធដារលើចំណូលចំណេញ និងសម្បត្តិទ្រព្យស្តុកស្តម្ភរបស់គេ ដោយបើកក្រុមហ៊ុនបិទបាំងឯនាយសមុទ្រចប់តែប៉ុណ្ណេះ។ យើងខ្ញុំនឹងព្យាយាមស្រាវជ្រាវស្វែងរកការពិតផ្សេងៗតទៅទៀត ហើយនឹងផ្សាយជូនជ្រាបនាពេលអនាគត ដើម្បីចែករំលែកព័ត៌មានពិតជួយដល់សង្គមជាតិ។
បើគ្មានក្រុមអ្នកកាសែតក្លាហានពីសមាគមអ្នកកាសែតស៊ើបអង្កេតអន្តរជាតិ (ICIJ) យើងក៏មិនដឹងរឿងដូច្នោះយកមកផ្សាយជូនជ្រាបដែរ។ យើងខ្ញុំសូមអរគុណចំពោះការតាមដានស្តាប់របស់លោកអ្នក៕