មន្ត្រីជាន់ខ្ពស់គណបក្សសង្គ្រោះជាតិ បានលើកឡើងថា ការតស៊ូរបស់មេដឹកនាំបក្សប្រឆាំង លោក កឹម សុខា គឺដូចគ្នាទៅនឹងមេដឹកនាំដើម្បីសេរីភាពរបស់ប្រទេសអាហ្វ្រិកខាងត្បូង លោក Nelson Mandela ដែរ គឺហ៊ានលះបង់សេរីភាពខ្លួនឯងរហូតដល់ការលះបង់ជីវិតដើម្បីតែទាមទារសេរីភាព និងយុត្តិធម៌ជូនជាតិ និងពលរដ្ឋរបស់ខ្លួន។
មន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានសរសេរលើគណនី Facebook របស់លោកនៅថ្ងៃទី៤ ខែសីហា ថា ភាពស្មោះត្រង់ចំពោះជាតិមាតុភូមិ និងពលរដ្ឋខ្មែររបស់ប្រធានគណបក្សសង្គ្រោះជាតិ លោក កឹម សុខា បានធ្វើឲ្យលោកបាត់បង់សេរីភាពផ្ទាល់ខ្លួនទាំងស្រុង ដោយសារតែការតវ៉ាដើម្បីលទ្ធិប្រជាធិបតេយ្យ សិទ្ធិមនុស្ស និងសេរីភាពជូនពលរដ្ឋ ប៉ុន្តែលោកនៅតែមិនរាថយជាដាច់ខាត។
លោកអះអាងថា ដើម្បីសេរីភាព ដើម្បីលទ្ធិប្រជាធិបតេយ្យ និងសិទ្ធិមនុស្សនៅកម្ពុជា លោក កឹម សុខា នៅតែបន្តយុទ្ធសាស្ត្រនយោបាយប្រកាន់ធម៌អហិង្សា មិនយកជាតិឯងជាសត្រូវ មិនចងគំនុំសងសឹក ប៉ុន្តែជំនួសមកវិញដោយការបង្រួបបង្រួមខ្មែរ និងខ្មែរ ផ្សះផ្សាជាតិ ដើម្បីសេចក្តីសុខ និងការផ្លាស់ប្ដូរដោយសន្តិវិធីដែលជាជ័យជម្នះសម្រាប់ជាតិខ្មែរទាំងមូល។
លោក មាជ សុវណ្ណារ៉ា បញ្ជាក់ថា បើទោះបីជាមេដឹកនាំបក្សប្រឆាំងរូបនេះបានឆ្លងកាត់ព្យុះភ្លៀងក្នុងដំណើរជីវិតស្វែងរកយុត្តិធម៌ដោយការធ្វើទុក្ខបុកម្នេញពីរដ្ឋអំណាចបច្ចុប្បន្ន រហូតជាប់ពន្ធនាគារជាញឹកញាប់ក៏ដោយ ក៏លោកនៅតែមិនបោះបង់ចោលមាគ៌ាអហិង្សាឆ្ពោះទៅរកសេរីភាពជូនដល់ពលរដ្ឋខ្មែរដែរ។
ការលើកឡើងរបស់មន្ត្រីបក្សប្រឆាំងរូបនេះ ស្របពេលមេដឹកនាំគណបក្សសង្គ្រោះជាតិ កំពុងរងការធ្វើទុក្ខបុកម្នេញពីរដ្ឋាភិបាលឯកបក្ស ដែលកំពុងដឹកនាំដោយបក្សកាន់អំណាចយ៉ាងធ្ងន់ធ្ងរក្នុងពេលបច្ចុប្បន្ននេះ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីដើមខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេសតាមប្រសាសន៍របស់លោក ហ៊ុន សែន ដែលបានឃុំខ្លួននៅមន្ទីរឃុំឃាំងត្រពាំងផ្លុង អស់រយៈពេល ១ឆ្នាំ។ បន្ទាប់មក នៅដើមខែកញ្ញា ឆ្នាំ២០១៨ លោកត្រូវបានអាជ្ញាធរដោះលែងឲ្យនៅក្រៅឃុំជាបណ្ដោះអាសន្ន ប៉ុន្តែមិនត្រូវបានអនុញ្ញាតឲ្យជួបអ្នកដទៃ ឬចាកចេញពីគេហដ្ឋានរបស់ខ្លួនឡើយ។
រហូតដល់ថ្ងៃទី១០ ខែវិច្ឆិកា ឆ្នាំ២០១៩ ទើបលោក កឹម សុខា ត្រូវបានផ្តល់សិទ្ធិសេរីភាពមួយកម្រិតទៀត គឺអាចធ្វើដំណើរក្នុងប្រទេស ប៉ុន្តែត្រូវហាមប្រាមការនិយាយពាក់ព័ន្ធនឹងរឿងនយោបាយ និងចេញក្រៅប្រទេសជាដាច់ខាត។
ទោះជាយ៉ាងណាក៏ដោយ រហូតមកទល់នឹងពេលនេះ លោកនៅតែមានភាពស្អាតស្អំ ព្រោះលោក កឹម សុខា មិនទាន់ត្រូវបានតុលាការកាត់ទោសពីបទល្មើសណាមួយនៅឡើយទេ ខណៈតុលាការកម្ពុជាប្រកាសផ្អាកសវនាការរបស់លោកជាបន្តបន្ទាប់ចាប់តាំងពីខែមីនា ឆ្នាំ២០២០ មកម្ល៉េះ។
កាលពីខែកក្កដា ឆ្នាំ២០១៤ សារព័ត៌មាន Southeast Asia Globe បានចុះផ្សាយពីការលើកឡើងរបស់អ្នកផ្តល់ប្រឹក្សាផ្នែកនយោបាយឯករាជ្យនៅកម្ពុជា បណ្ឌិត ម៉ាខឺស ស្កាប៊ូ ថាលោក កឹម សុខា បានដាក់ខ្លួនគាត់ក្នុងភ្នក់ភ្លើងជាច្រើនលើកច្រើនគ្រា ដោយសារតែគាត់ហ៊ាននិយាយប្រឆាំងនឹងក្រុមអ្នកកាន់អំណាច។
កាលពីចុងខែមីនា ឆ្នាំ២០២១ ប្រធានគណបក្សសង្គ្រោះជាតិ លោក កឹម សុខា ធ្លាប់អះអាងថា សហរដ្ឋអាមេរិក និងបណ្តាប្រទេសលោកសេរីមួយចំនួនទៀតនៅតែទទួលស្គាល់អំពីគុណតម្លៃរបស់លោកក្នុងការងារសិទ្ធិមនុស្ស និងប្រជាធិបតេយ្យ។ បន្ថែមពីនេះ ពួកគេក៏បានទទួលស្គាល់នូវគោលជំហររបស់លោកដែលតែងប្រកាន់ភ្ជាប់នូវគោលការណ៍អហិង្សា ការអត់ធ្មត់ និងតែងតែស្វែងរកដំណោះស្រាយបញ្ហានានាដោយសន្តិវិធី ដើម្បីបម្រើប្រយោជន៍ប្រជាពលរដ្ឋខ្មែរ។
ជុំវិញបញ្ហានេះ ក្រុមអ្នកឃ្លាំមើលសង្គមអះអាងថា មេបក្សប្រឆាំងលោក កឹម សុខា មិនអាចបន្តនៅស្ងៀមបែបនេះរហូតទេ ព្រោះថាដើម្បីរកយុត្តិធម៌ជូនគណបក្សរបស់ខ្លួនដែលត្រូវគេរំលាយទាំងអយុត្តិធម៌ ជាពិសេសសមាជិកក្រុមប្រឹក្សាឃុំ-សង្កាត់ទាំង ៥០០៧នាក់ដែលមិនទាន់ផុតអាណត្តិនៅពេលនេះ គឺត្រូវតែបន្តការតស៊ូមតិតាមរយៈនយោបាយការទូតឲ្យខ្លាំងក្លាបន្ថែមទៀត៕