អាជ្ញាធរខេត្តបន្ទាយមានជ័យ បានឲ្យដឹងថា ក្រោយពីប្រមុខរាជរដ្ឋាភិបាលបានសម្រេចបិទខ្ទប់បណ្តាខេត្តជាប់ព្រំដែនកម្ពុជា-ថៃ ចំនួន ២សប្តាហ៍ដើម្បីទប់ស្កាត់ការឆ្លងរីករាលដាលជំងឺ Covid-19 បំប្លែងខ្លួនថ្មី Delta បានរកឃើញឆ្លងរាតត្បាតចូលមកដល់កម្ពុជារួចមក គឺមានពលករខ្មែររាប់រយនាក់នៅតែបន្តវិលត្រឡប់ពីប្រទេសថៃ ក្នុងបំណងឆ្លងដែនចូលមកប្រទេសកម្ពុជា ស្ទើរជារៀងរាល់ថ្ងៃ។
អភិបាលស្រុកថ្មពួក លោក អែម សុខា បានឲ្យប្រព័ន្ធផ្សព្វផ្សាយក្នុងស្រុកដឹងកាលពីថ្ងៃទី៤ ខែសីហា ថា ពលករខ្មែររាប់រយនាក់បានបន្តធ្វើដំណើរវិលពីប្រទេសថៃ ចូលមកកម្ពុជា ក្នុងដំណាក់កាលបិទខ្ទប់ចាប់តាំងពីចុងខែកក្កដា មក។ ប៉ុន្តែអាជ្ញាធរមិនអនុញ្ញាតឲ្យពលករទាំងនោះឆ្លងបន្ទាត់ព្រំដែនទេ ដោយក្រុមការងារចម្រុះបានសម្របសម្រួល និងរៀបចំកន្លែងឲ្យពួកគាត់សម្រាកនៅតាមព្រំដែនក្នុងតំបន់ “ស” ខាងទឹកដីកម្ពុជា ជាបណ្ដោះអាសន្នសិន។
លោកអភិបាលស្រុកថ្មពួក បន្ថែមថា បច្ចុប្បន្នមានពលករខ្មែរជាង ២០០នាក់ដែលបានធ្វើដំណើរពីខេត្តផ្សេងៗក្នុងប្រទេសថៃ ដែលប៉ុនប៉ងឆ្លងព្រំដែនចូលមកកម្ពុជាវិញ ប៉ុន្តែត្រូវបានជាប់គាំងនៅតាមព្រំដែនកម្ពុជា-ថៃ ស្ថិតនៅស្រុកតាប្រាយ៉ា ខេត្តស្រះកែវ ជាប់ព្រំដែនស្រុកថ្មពួក នៃខេត្តបន្ទាយមានជ័យ។
ទាក់ទិនបញ្ហានេះដែរ លោក ស្វាយ ជា អភិបាលស្តីទីស្រុកម៉ាឡៃ ក៏បានឲ្យដឹងដែរថា មូលដ្ឋាននេះកងកម្លាំងសមត្ថកិច្ចបានដាក់ពង្រាយចំនួន ៨គោលដៅ ដើម្បីយាមកាមតាមបន្ទាត់ព្រំដែន ២៤ម៉ោងលើ ២៤ម៉ោង ដើម្បីទប់ស្កាត់ពលករខ្មែរលួចឆ្លងដែនពីថៃ ចូលមកកម្ពុជា ក្នុងខេត្តបន្ទាយមានជ័យ ដែលមានព្រំប្រទល់ជាប់ជាមួយប្រទេសថៃ។
លោកបន្តថា កាលពីថ្ងៃទី៤ ខែសីហា មានពលករខ្មែរប្រមាណ ៨០នាក់ បានវិលពីថៃ ចូលមកកម្ពុជា វិញ តាមច្រកព្រំដែនស្រុកម៉ាឡៃ ប៉ុន្តែអាជ្ញាធរមិនទាន់អនុញ្ញាតឲ្យចូលមកកម្ពុជា ទេ។ ក្នុងនោះក្រុមការងារចម្រុះដែលប្រចាំការនៅទីនោះ ក៏បានផ្តល់តង់សម្រាប់សម្រាកបណ្ដោះអាសន្ន និងគ្រឿងឧបភោគបរិភោគមួយចំនួនដោយរង់ចាំបទបញ្ជាឲ្យបើកព្រំដែនជាមុនសិន។
លោក ស្វាយ ជា បន្តថា នៅក្នុងដំណាក់កាលនៃការបិទខ្ទប់នេះ ក៏មានសប្បុរសជនមួយចំនួនបានចូលរួមឧបត្ថម្ភជាសម្ភារ និងគ្រឿងឧបភោគបរិភោគសម្រាប់ចែកជូនពលករខ្មែរទាំងនោះជាបន្តបន្ទាប់ដែរ។
ចំណែកឯលោក អ៊ុំ រាត្រី អភិបាលខេត្តបន្ទាយមានជ័យ បានអំពាវនាវដល់ពលរដ្ឋ ជាពិសេសពលករខ្មែរធ្វើការនៅប្រទេសថៃ ដែលមានបំណងចង់វិលត្រឡប់ចូលមកកម្ពុជាវិញ សូមផ្អាកការធ្វើដំណើរមួយរយៈពេលសិន ដើម្បីចូលរួមទប់ស្កាត់ការឆ្លងរីករាលដាល Covid-19 បំប្លែងថ្មីនៅក្នុងប្រទេសកម្ពុជា។ លោកបន្តថា បច្ចុប្បន្ននេះ ខេត្តបន្ទាយមានជ័យ ក៏មានករណីរកឃើញវីរុស Covid-19 បំប្លែងថ្មីប្រភេទ Delta នេះជាច្រើនករណីផងដែរ។
បន្ថែមលើនេះ លោកអភិបាលខេត្តបន្ទាយមានជ័យ ក៏បានក្រើនរំឭកដល់ពលរដ្ឋ ពិសេសពលរដ្ឋខ្មែរដែលជាប់គាំងនៅតាមបន្ទាត់ព្រំដែនកម្ពុជា-ថៃទាំងអស់ ត្រូវបន្តយកចិត្តទុកដាក់អនុវត្តវិធានការសុខាភិបាលឱ្យបានត្រឹមត្រូវ៕