34 C
Phnom Penh

ពលរដ្ឋ​ស្រុក​ស្រែអំបិល​ស្នើ​ឲ្យ​អភិបាល​ខេត្ត​កោះកុង​បង្ក្រាប​បទល្មើស​ទន្ទ្រាន​កាប់​ដី​ព្រៃ​រដ្ឋ​ធ្វើ​កម្មសិទ្ធិ​ខុសច្បាប់

ដោយ ឌឹ ខេមបូឌា ដេលី

បទវិភាគ

ពលរដ្ឋ​រស់នៅ​ស្រុក​ស្រែអំបិល ខេត្ត​កោះកុង អះអាង​ថា បទល្មើស​កាប់​រាន​ដី​ព្រៃ​ជា​សម្បត្តិ​របស់​រដ្ឋ​បាន​កើតមាន​ឡើង​រាល់​ថ្ងៃ​ពី​ក្រុម​អ្នក​មាន​ទ្រព្យ និង​មាន​អំណាច​មួយ​ចំនួន កំពុង​កើត​មាន​យ៉ាង​អនាធិបតេយ្យ​នៅ​មូលដ្ឋាន​ឃុំ​ដងពែង ស្រុក​ស្រែអំបិល ដោយ​មិន​មាន​អាជ្ញាធរ ឬ​មន្ត្រី​ពី​ស្ថាប័ន​ពាក់ព័ន្ធ​ណាមួយ​ចុះ​ពិនិត្យ ឬ​បង្ក្រាប​នោះ​ឡើយ។

ពួកគេ​អះអាង​ថា បទល្មើស​កាប់​ទន្ទ្រាន​ដី​ព្រៃ​របស់​រដ្ឋ​ធ្វើ​កម្មសិទ្ធិ​ឯកជន​យ៉ាង​អនាធិបតេយ្យ​នេះ បាន​កើតមាន​ជាង ២​ខែ​កន្លងមក​ហើយ​នៅ​ក្នុង​តំបន់​ប្រើប្រាស់​ច្រើនយ៉ាង​ដងពែង នៃ​ស្រុក​ស្រែអំបិល ខេត្ត​កោះកុង។

ប្រភព​ដដែល​បន្ត​ថា យ៉ាងហោចណាស់​មាន​ដី​ព្រៃ​របស់​រដ្ឋ​ជិត ១០០​ហិកតារ​កំពុង​រង​នូវ​ការ​កាប់​ទន្ទ្រាន​ដោយ​ខុសច្បាប់​ពី​ក្រុម​អ្នក​មាន​លុយ និង​មាន​អំណាច​មួយ​ចំនួន​រស់នៅ​ស្រុក​ស្រែអំបិល និង​រស់នៅ​រាជធានី​ភ្នំពេញ។ ពលរដ្ឋ​បន្ត​ថា បទល្មើស​នេះ​គេ​ឃើញ​បុគ្គល​មួយ​ចំនួន​បាន​ប្រើប្រាស់​មធ្យោបាយ​កាប់​បំផ្លាញ​ដី​ព្រៃ​របស់​រដ្ឋ​ដើម្បី​ធ្វើ​ជា​កម្មសិទ្ធិ ក្រោម​រូបភាព​ជួល​មនុស្ស​ឲ្យ​ទៅ​ចូល​កាប់​ផ្តួល​រំលំ​ដើមឈើ រួច​បាន​ជួល​គ្រឿងចក្រ​ឲ្យ​ទៅ​ជីក​កាយ​កំណត់​ព្រំ​ដី​សម្រាប់​សម្គាល់​ម្ចាស់ដី​នីមួយៗ ប៉ុន្តែ​បែរជា​មិន​ឃើញ​មាន​អាជ្ញាធរ ឬ​មន្ត្រី​ជំនាញ​ស្ថាប័ន​ពាក់ព័ន្ធ​ណាមួយ​ចុះ​ហាមឃាត់​ឡើយ។

ប្រភព​ពី​ប្រជាពលរដ្ឋ​ដដែល​បន្ត​ថា បច្ចុប្បន្ន​នេះ​គេ​ឃើញ​ឈ្មោះ សៀង ឈី បាន​នាំ​យក​គ្រឿងចក្រ​ទៅ​ឈូស​កាយ​ដី​ព្រៃ​របស់​រដ្ឋ​មាន​ទីតាំង​នៅ​ចំណុច​វាលពួច ស្ថិត​ក្នុង​ភូមិ​ត្រពាំង ឃុំ​ដងពែង ស្រុក​ស្រែអំបិល ប៉ុន្តែ​មិន​ឃើញ​អាជ្ញាធរ​ចុះ​ទៅ​ហាមឃាត់​ទេ។

ទាក់ទិន​នឹង​បញ្ហា​នេះ លោក សៀង ឈី ម្ចាស់​គ្រឿងចក្រ​ត្រូវ​បាន​សារព័ត៌មាន​ក្នុង​ស្រុក​ឈ្មោះ “កម្ពុជា​ថ្ងៃ​នេះ” ដកស្រង់​សម្ដី​មក​ចុះផ្សាយ​ថា ដី​ព្រៃ​ដែល​រូប​លោក​នាំ​យក​គ្រឿងចក្រ​ទៅ​ឈូស​ឆាយ​ខាងលើ​នេះ គឺ​ត្រូវ​បាន​ម្ចាស់ដី​ជួល​ឲ្យ​ទៅ​កាយ​ហ៊ុមព័ទ្ធ ដើម្បី​កំណត់​ព្រំ​ដី​របស់​ម្ចាស់ដី​នីមួយៗ​សរុប​មាន​ចំនួន ៨៧​ហិកតារ។ ប្រភព​ដដែល​អះអាង​ថា ដី​ទាំងនេះ​មួយ​ផ្នែក​ជា​កម្មសិទ្ធិ​របស់​លោក ម៉ា ទី អតីត​អធិការ​ស្រុក​ស្រែអំបិល និង​ភរិយា​របស់​លោក។ រីឯ​ដី​មួយ​ផ្នែក​ទៀត គឺ​ម្ចាស់​មាន​លំនៅឋាន​នៅ​ក្នុង​រាជធានី​ភ្នំពេញ ដែល​ពួកគេ​បាន​ជួល​កម្មករ​ឲ្យ​ចូល​ទៅ​កាប់​ទន្ទ្រាន​ធ្វើ​កម្មសិទ្ធិ​ឯកជន។

ការ​កាប់​ទន្ទ្រាន​ដី​ព្រៃ​របស់​រដ្ឋ​ធ្វើ​កម្មសិទ្ធិ​ឯកជន​នៅ​ក្នុង​តំបន់​ប្រើប្រាស់​ច្រើនយ៉ាង​ដងពែង នៃ​ស្រុក​ស្រែអំបិល ខេត្ត​កោះកុង។

កន្លងមក លោក សុខ សទ្ធី អភិបាល​រង​ខេត្ត​កោះកុង ទទួល​បន្ទុក​វិវាទ​ដីធ្លី ធ្លាប់​ព្រមាន​ថា អ្នក​ដែល​បំពាន​ដី​ព្រៃ​របស់​រដ្ឋ នឹង​ត្រូវ​ឃាត់​ខ្លួន ហើយ​កសាង​សំណុំរឿង​បញ្ជូន​ទៅ​តុលាការ​ផ្ដន្ទាទោស​តាម​ផ្លូវ​ច្បាប់ ទោះ​អ្នក​នោះ​មាន​មុខនាទី​ជា​អ្វី​ក៏ដោយ។

ចំណែក​ពលរដ្ឋ​រស់នៅ​ស្រុក​ស្រែអំបិល បាន​សំណូមពរ​ដល់​អ្នកស្រី មិថុនា ភូថង អភិបាល​ខេត្ត​កោះកុង ជួយ​បញ្ជូន​មន្ត្រី​ចុះ​ពិនិត្យ​ចំពោះ​សកម្មភាព​កាប់​បំផ្លាញ​ដី​ព្រៃ​របស់​រដ្ឋ​ធ្វើ​កម្មសិទ្ធិ​ឯកជន ដែល​កំពុង​កើតមាន​យ៉ាង​អនាធិបតេយ្យ​នៅ​មូលដ្ឋាន​ឃុំ​ដងពែង ឲ្យ​បាន​ឆាប់ ត្បិត​បទល្មើស​ទន្ទ្រាន​ដី​ព្រៃ​រដ្ឋ​ខាងលើ​នេះ បាន​កើតឡើង​ជាង ២​ខែ​កន្លងមក​ហើយ ប៉ុន្តែ​មិន​ឃើញ​មាន​អាជ្ញាធរ ឬ​មន្ត្រី​ពី​មន្ទីរ​ស្ថាប័ន​ជំនាញ​ណាមួយ​ចុះ​មក​ពិនិត្យ ឬ​មាន​វិធានការ​ទប់ស្កាត់​នៅឡើយ​ទេ។

ទោះ​ជា​បែប​នេះ​ក្តី សារព័ត៌មាន The Cambodia Daily នៅ​មិនទាន់​អាច​ទាក់ទង លោក ម៉ា ទី ដើម្បី​បំភ្លឺ​ជុំវិញ​ការ​ចោទប្រកាន់​លើ​ករណី​ជួល​មនុស្ស​ឲ្យ​ទៅ​កាប់​បំផ្លាញ​ព្រៃឈើ​រាន​យក​ដី​ធ្វើ​កម្មសិទ្ធិ​ខុសច្បាប់​បាន​នៅឡើយ​ទេ នៅ​ថ្ងៃ​ទី​០៩ ខែ​សីហា ឆ្នាំ​២០២១៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស