28 C
Phnom Penh

ក្រុម​អ្នក​តស៊ូ​មតិ៖ ការ​បកស្រាយ​មិន​ច្បាស់​ពី​តម្លៃ​តេស្ដ​កូវីដ-១៩ នាំ​ឲ្យ​មាន​ការ​សង្ស័យ​លើ​ការ​ប្រព្រឹត្ត​អំពើពុករលួយ

ដោយ ឌឹ ខេមបូឌា ដេលី

បទវិភាគ

ក្រុម​អ្នក​សង្កេតការណ៍​ខ្មែរ​នៅ​ឯ​នាយ​សមុទ្រ ទាមទារ​ឲ្យ​លោក​នាយករដ្ឋមន្ត្រី ហ៊ុន សែន ពន្យល់​រឿង​តម្លៃ​ធ្វើ​តេស្ដ​រក​មេរោគ Covid-19 នៅ​មន្ទីរពេទ្យ​ឯកជន​ឲ្យ​បាន​ច្បាស់លាស់ បើ​មិន​ដូច្នោះ​ទេ នឹង​នាំ​ឲ្យ​មាន​ការ​សង្ស័យ​ថា គ្រួសារ​ត្រកូល ហ៊ុន កំពុង​ប្រព្រឹត្ត​អំពើពុករលួយ​កេងប្រវ័ញ្ច​លើ​ខ្នង​រាស្រ្ត​ខ្មែរ​ក្រីក្រ​ក្នុង​ពេល​ដែល​ប្រទេស​កំពុង​ជួប​គ្រោះអាសន្ន។

អ្នកវិភាគ​នយោបាយ និង​សង្គម និង​ជា​អនុប្រធាន​ក្រុមប្រឹក្សាភិបាល​នៃ​ចលនា​និស្សិត​ដើម្បី​លទ្ធិប្រជាធិបតេយ្យ លោក គឹម សុខ បាន​សរសេរ​លើ​គណនី Facebook របស់​លោក​កាលពី​ថ្ងៃ​ទី​១៦ ខែ​សីហា ថា ការ​បំភ្លឺ​របស់​ប្រមុខ​រដ្ឋាភិបាល​កម្ពុជា​នៅ​មាន​ចំណុច​គួរ​ឲ្យ​សង្ស័យ​ជាច្រើន​អំពី​ការ​ប្រព្រឹត្ត​អំពើពុករលួយ​ទាក់ទង​ទៅ​នឹង​ការ​ចោទ​សួរ​របស់​ពលរដ្ឋ អំពី​ការ​ធ្វើ​តេស្ដ​រក​វីរុស Covid-19 យក​តម្លៃ​ខ្ពស់​នៅ​មន្ទីរពេទ្យ​ឯកជន។

លោក​អះអាង​ថា ការ​បកស្រាយ​របស់​លោក ហ៊ុន សែន ចំពោះ​សំណួរ​របស់​ប្រជាពលរដ្ឋ គឺ​ត្រូវតែ​មួយ​ករណី​ប៉ុណ្ណោះ គឺ​ករណី​សម្លៀកបំពាក់​ពេទ្យ​មាន​តម្លៃ​ខ្ពស់។ ប៉ុន្តែ​លោក​នាយករដ្ឋមន្ត្រី​ត្រូវតែ​បកស្រាយ​ឲ្យ​បាន​ច្បាស់​ជាង​នេះ​ថា តើ​ឈុត​ការពារ​នោះ​ក្រោយ​ធ្វើ​តេស្ដ​រក​ឃើញ​ថា​វិជ្ជមាន ឬ​អវិជ្ជមាន​ពី​វីរុស Covid-19 នឹង​ត្រូវ​បោះចោល​ដូច​ឧបករណ៍​យក​សំណាក​ដែល​គេ​ប្រើ​តែ​មួយ​ដង​ដែរ​ឬ​យ៉ាងណា?

លោក គឹម សុខ បញ្ជាក់​ថា តើ​សម្លៀកបំពាក់​មួយ​ឈុត​មាន​តម្លៃ​ប៉ុន្មាន? តើ​ជា​សម្លៀកបំពាក់​មាន​គុណភាព​ស្តង់ដារ​វេជ្ជសាស្ត្រ​ឬ​ទេ ព្រោះ​កន្លងមក​បាន​លេច​ធ្លាយ​មាន​ព័ត៌មាន​ថា​សម្លៀកបំពាក់​ដែល​ក្រុម​គ្រូពេទ្យ​ប្រើ​កន្លងមក​នេះ គ្មាន​ស្តង់ដារ​វេជ្ជសាស្ត្រ​ត្រឹមត្រូវ​ទេ ទោះបី​បុគ្គលិក​សុខាភិបាល​អាច​តស៊ូ​ពាក់​ការពារ​ខ្លួន​ក្នុង​រយៈពេល​មួយ​ក៏ដោយ។

ការរិះគន់​របស់​អ្នកវិភាគ​រូប​នេះ ធ្វើឡើង​បន្ទាប់ពី​ប្រមុខ​ដឹកនាំ​កម្ពុជា​បាន​ឆ្លើយ​នឹង​សំណួរ​របស់​ពលរដ្ឋ​កាលពី​ពេល​ថ្មីៗ​នេះ​អំពី​តម្លៃ​នៃ​ការ​ធ្វើ​តេស្ដ​នៅ​តាម​កន្លែង​ព្យាបាល​ឯកជន ថា​មាន​តម្លៃ​ខ្ពស់ ប៉ុន្តែ​លោក​នាយករដ្ឋមន្ត្រី​ហាក់​ផ្ដល់​ចម្លើយ​នៅ​មាន​ករណី​ស្រពេចស្រពឹល​នៅ​ឡើយ។

កាលពី​ថ្ងៃ​ទី​១៥ ខែ​សីហា ឆ្នាំ​២០២១ ប្រជាពលរដ្ឋ​បាន​ចូល​ទៅ​សួរ​ក្នុង​ប្រអប់​បញ្ចេញ​មតិ​លើ​ទំព័រ Facebook របស់​លោក​នាយករដ្ឋមន្ត្រី ហ៊ុន សែន ថា​ហេតុ​អ្វី​បាន​ជា​ពេទ្យ​ឯកជន​ធ្វើ​តេស្ដ​រក​មេរោគ Covid-19 ថ្លៃ​ម្ល៉េះ? ភ្លាមៗ​នោះ លោក ហ៊ុន សែន ក៏​បាន​ឆ្លើយ​ក្នុង​ប្រអប់​បញ្ចេញ​មតិ​នោះ​ថា គាត់​ក៏​ធ្លាប់​បាន​សួរ​រឿង​នេះ​ដែរ។ លោក ហ៊ុន សែន បញ្ជាក់​ថា ផ្នែក​ឯកជន​មិនមែន​គិត​តម្លៃ​តែ​ទៅលើ​ឧបករណ៍​ធ្វើ​តេស្ដ​តែ​មួយ​មុខ​នោះ​ទេ គឺ​គិត​ទាំង​សម្លៀកបំពាក់​ដែល​ពាក់​សម្រាប់​ធ្វើ​តេស្ដ​ផង​ដែរ។

លោក គឹម សុខ លើកឡើង​ថា ចម្លើយ​នេះ​គឺ​សមហេតុ​សមផល ព្រោះ​ថា​ពេល​ធ្វើ​តេស្ដ​ត្រូវ​ពាក់​ខោអាវ​ពេទ្យ​ដើម្បី​ការពារ​ខ្លួន​អ្នក​ធ្វើ​តេស្ដ​នោះ ដើម្បី​ការពារ​ការ​ចម្លង​មេរោគ។ តែ​យ៉ាងនេះ​ក្តី លោក ហ៊ុន សែន បញ្ជាក់​ថា ប្រសិន​យល់ថា​ពេទ្យ​ឯកជន​ថ្លៃ សូម​ទៅ​យក​សំណាក​ធ្វើ​តេស្ដ​នៅ​ពេទ្យ​រដ្ឋ​ដែល​បាន​រៀបចំ​វិញ​ចុះ។

យ៉ាងណាក៏ដោយ កាលពី​ថ្ងៃ​ទី​១០ ខែ​សីហា ឆ្នាំ​២០២១ កន្លងទៅ ក្រសួង​សុខាភិបាល​បាន​ចេញ​សារាចរ​ណែនាំ​ស្ដីពី​វិធានការ​រួមចំណែក​កាត់បន្ថយ​ការ​រីក​រាលដាល​នៃ​ជំងឺ Covid-19 ដោយ​ប្រើ​វិធានការ​មួយ​ចំនួន ក្នុង​នោះ​ក្រសួង​បាន​ណែនាំ​ឲ្យ​មន្ទីរពេទ្យ​ឯកជន និង​គ្លីនិក​ទាំងអស់​ត្រូវ​ផ្តល់​សេវា និង​ធ្វើ​តេស្ដ​រហ័ស​ដល់​ប្រជាពលរដ្ឋ​ក្នុង​តម្លៃ​ទាប​សមរម្យ​ដែល​ទទួលស្គាល់​ដោយ​ក្រសួង​សុខាភិបាល។

ជុំវិញ​បញ្ហា​នេះ ក្រសួង​សុខាភិបាល កាលពី​ថ្ងៃ​ទី​៤ ខែ​សីហា ឆ្នាំ​២០២១ បាន​ចេញ​លិខិត​ណែនាំ​ទៅ​ដល់​បណ្តា​អង្គភាព និង​បុគ្គលិក​សុខាភិបាល​ក្រោម​ឱវាទ ស្ដីពី​ការ​មិន​គិត​ថ្លៃ​សេវា​លើ​ការ​ធ្វើ​តេស្ដ​រក​មេរោគ Covid-19 ពី​ពលរដ្ឋ​ដែល​បាន​ទៅ​ទទួល​សេវា​នៅ​តាម​មូលដ្ឋាន​សុខាភិបាល​សាធារណៈ​របស់​ពួកគេ។

ជុំវិញ​ការ​ទប់ស្កាត់​ការ​ឆ្លង​វីរុស Covid-19 នេះ ក្រសួង​សុខាភិបាល​ក៏​បាន​បង្ហាញ​របាយការណ៍​អំពី​អ្នក​ឆ្លង​វីរុស Covid-19 នៅ​ថ្ងៃ​ទី​១៧ ខែ​សីហា ឆ្នាំ​២០២១ ផង​ដែរ​ថា ក្រសួង​បាន​រក​ឃើញ​អ្នក​ឆ្លង​វីរុស Covid-19 ថ្មី​ចំនួន ៥៥៦​នាក់ និង​អ្នក​ជាសះស្បើយ​ថ្មី​ចំនួន ៧១៦​នាក់ ខណៈ​អ្នក​ស្លាប់​ថ្មី​មាន​ចំនួន ១៤​នាក់។

ក្រសួង​បញ្ជាក់​ថា មក​ទល់នឹង​ពេលនេះ អ្នក​ឆ្លង​វីរុស Covid-19 សរុប​បាន​កើន​ឡើង​ដល់​ជាង ៨​ម៉ឺន ៦​ពាន់​នាក់​ហើយ និង​អ្នក​ដែល​ជាសះស្បើយ​សរុប​មាន​ចំនួន​ជាង ៨​ម៉ឺន ១​ពាន់​នាក់ ដោយឡែក​អ្នក​ស្លាប់​សរុប​បាន​កើន​ឡើង​ជាង ១៧០០​នាក់​ហើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស