ពលរដ្ឋចំនួនពីរភូមិដែលមានលំនៅឋានអមសងខាងផ្លូវបេតុងមួយខ្សែស្ថិតក្នុងភូមិស្វាយតាអុក១ និងភូមិព្រែកជាងព្រំ នៃសង្កាត់វាលស្បូវ ខណ្ឌច្បារអំពៅ រាជធានីភ្នំពេញ បាននាំគ្នារអ៊ូរទាំថាមានក្រុមហ៊ុនលក់ខ្សាច់មួយកន្លែងបានយកផ្លូវសាធារណៈធ្វើអាជីវកម្មដឹកខ្សាច់តាំងពីព្រលឹមទល់ព្រលប់ នាំឲ្យប៉ះពាល់ដល់បរិស្ថាន បំផ្លាញផ្លូវ ប៉ះពាល់ដល់ការប្រកបរបរចិញ្ចឹមជីវិត និងការរស់នៅរបស់ពលរដ្ឋក្នុងមូលដ្ឋាននេះយ៉ាងធ្ងន់ធ្ងរ។
ក្រុមពលរដ្ឋបញ្ជាក់ថា ករណីនេះពួកគាត់ធ្លាប់បានប្តឹងទៅមេភូមិ និងចៅសង្កាត់ម្តងជាពីរដងរួចមកហើយ ដើម្បីស្នើឲ្យជួយរកដំណោះស្រាយអំពីផលប៉ះពាល់ពីការធ្វើអាជីវកម្មរបស់ក្រុមហ៊ុនដឹកខ្សាច់មួយនេះ ប៉ុន្តែគិតត្រឹមថ្ងៃទី១៨ ខែសីហា ឆ្នាំ២០២១ នេះ នៅតែគ្មានដំណោះស្រាយ។ ចំណែកឯរថយន្តដឹកខ្សាច់របស់ក្រុមហ៊ុននេះ នៅតែបន្តធ្វើសកម្មភាពដែលបង្កផលប៉ះពាល់ដល់ការប្រកបរបរ និងការរស់នៅរបស់ពលរដ្ឋដដែល។
ទោះយ៉ាងណា ពលរដ្ឋបន្តថា កង្វល់នេះ អ្នកស្រីចៅសង្កាត់វាលស្បូវ ក៏ធ្លាប់បានចុះមកសម្របសម្រួលម្តងដែរកាលថ្ងៃទី២៥ ខែកក្កដា ឆ្នាំ២០២១ ប៉ុន្តែពលរដ្ឋមិនព្រមទទួលយកនោះទេ។
ពលរដ្ឋបញ្ជាក់ថា រាល់ថ្ងៃនេះនៅក្នុងមូលដ្ឋានសង្កាត់វាលស្បូវ មានក្រុមហ៊ុនអាជីវកម្មខ្សាច់ជាច្រើនកន្លែង ប៉ុន្តែក្រុមហ៊ុនខ្លះមិនបានរំខានដល់ការរស់នៅរបស់ពលរដ្ឋឡើយ ព្រោះក្រុមហ៊ុនទាំងនោះមានផ្លូវឯកជនសម្រាប់ដឹកជញ្ជូនខ្សាច់ចេញពីបរិវេណក្រុមហ៊ុនរបស់គេ។ ប៉ុន្តែលើកលែងតែក្រុមហ៊ុនខ្សាច់ដែលទើបមកបើកធ្វើអាជីវកម្មថ្មីកាលពីពីខែឧសភា ឆ្នាំ២០២១ នេះទេ ដែលបង្កឲ្យមានផលប៉ះពាល់ដល់ការធ្វើដំណើរ និងការរស់នៅរបស់ប្រជាពលរដ្ឋធ្ងន់ធ្ងរនោះ។
ពលរដ្ឋចោទទៀតថា អ្នកបើកបររថយន្តដឹកខ្សាច់របស់ក្រុមហ៊ុននេះវិញ គឺមានចរិតមិនសមរម្យ ដោយបើកបរក្នុងល្បឿនលឿន ឬបើកបរវ៉ាជែងដោយមិនខ្វល់ពីអ្នកធ្វើដំណើរ ឬអ្នករស់នៅអមសងខាងផ្លូវខាងលើនេះឡើយ។
ពលរដ្ឋសំណូមពរដល់លោកអភិបាលខណ្ឌច្បារអំពៅ ជាពិសេសលោក ឃួង ស្រេង អភិបាលរាជធានីភ្នំពេញ ជួយអន្តរាគមន៍ទៅក្រុមហ៊ុនអាជីវកម្មខ្សាច់ដែលបង្កផលប៉ះពាល់ដល់ប្រជាពលរដ្ឋឲ្យបានឆាប់ផង។
ទោះជាបែបនេះក្តី សារព័ត៌មាន The Cambodia Daily នៅមិនទាន់អាចទាក់ទងអភិបាលខណ្ឌច្បារអំពៅ និងលោក ឃួង ស្រេង អភិបាលរាជធានីភ្នំពេញ ដើម្បីបំភ្លឺជុំវិញកង្វល់របស់ពលរដ្ឋលើករណីមានក្រុមហ៊ុនប្រកបអាជីវកម្មខ្សាច់បង្កផលប៉ះពាល់ដល់ការរស់នៅរបស់ប្រជាពលរដ្ឋទាំងនោះបាននៅឡើយទេ នៅថ្ងៃទី១៨ ខែសីហា ឆ្នាំ២០២១។
ក្រុមប្រជាពលរដ្ឋព្រមានថា ប្រសិនបើអាជ្ញាធរគ្មានការដោះស្រាយករណីក្រុមហ៊ុនលក់ខ្សាច់ដែលកំពុងបំផ្លាញផ្លូវរបស់ពួកគេនេះទេ នោះពួកគេនឹងនាំគ្នាធ្វើបាតុកម្មជាទ្រង់ទ្រាយធំដោយមានការលើកបដាតវ៉ាតែម្តង៕