ខណៈរដ្ឋាភិបាលប្រជាធិបតេយ្យនៅអាហ្វហ្គានីស្ថាន គាំទ្រដោយលោកខាងលិចដួលរលំដោយការវាយរុញច្រានពីកងកម្លាំងឧទ្ទាមតាលីបង់ដោយងាយបំផុត ហើយចំពេលដែលកងទ័ពនៃប្រទេសនេះបោះបង់ការប្រយុទ្ធមុនមកដល់ គឺកាសែតរបស់បក្សកុម្មុយនីស្តចិន Global Times បានធ្វើអត្ថាធិប្បាយដោយចំអកឡកឡឺយដាក់ដែនកោះតៃវ៉ាន់ថា ឱ្យមើលមេរៀននៅអាហ្វហ្គានីស្ថានទៅដែលកងទ័ពអាមេរិក និងសម្ពន្ធមិត្តអាមេរិករត់ចោលរដ្ឋាភិបាលក្រុងកាប៊ុល ដោយទុកឱ្យក្រឡាប់យ៉ាងងាយបំផុត។
ដោយមើលទៅចង់វាយបកឱ្យកាសែតរបស់ចិនមួយនេះ មេដឹកនាំតៃវ៉ាន់លំដាប់ទីពីរបន្ទាប់ពីប្រធានាធិបតី គឺនាយករដ្ឋមន្ត្រី Su Tseng-chang បានឆ្លើយតបយ៉ាងរហ័សថា តៃវ៉ាន់នឹងមិនដួលរលំដូចអាហ្វហ្គានីស្ថានឡើយ ទោះសង្គ្រាមឈ្លានពានទ្រង់ទ្រាយធំយ៉ាងណាក៏ដោយ។
នាយករដ្ឋមន្ត្រីតៃវ៉ាន់រូបនេះបន្តចំអកដាក់កាសែតចិនមួយនេះវិញថា ទោះបីជាសត្រូវមកដល់ច្រកទ្វារទីក្រុងតៃប៉ិ ដូចក្រុមតាលីបង់ចូលមកដល់ច្រកទ្វារទីក្រុងកាប៊ុលក៏ដោយ គឺកងទ័ពតៃវ៉ាន់មិនទម្លាក់អាវុធ ឬឈរឱបកាំភ្លើងមើលសត្រូវបាញ់ប្រជាជន ឬវាយប្រហារនោះទេ គឺពិតណាស់ត្រូវតែវាយបកហើយ ចំពោះមេដឹកនាំតៃវ៉ាន់គឺទាំងប្រធានាធិបតី ទាំងនាយករដ្ឋមន្ត្រី រដ្ឋមន្ត្រីការពារជាតិ និងប្រជាជនតៃវ៉ាន់ នឹងមិនរត់ចោលដែនកោះមួយនេះដាច់ខាត។
លោក Su Tseng-chang បានបង្ហាញការប្ដេជ្ញាចិត្តថា តៃវ៉ាន់ត្រូវតែការពារខ្លួន និងកុំធ្វើដូចក្រុមប្រទេសខ្លះដែលតែងតែលើកឡើងអំពីសមត្ថភាព និងអំណាចរបស់សត្រូវ ហើយបន្លាចកងទ័ពខ្លួនឯងនោះទេ។ លោកថាមានប្រទេសមហាអំណាចមួយចង់លេបត្របាក់កោះតៃវ៉ាន់ ដោយប្រើកម្លាំងយោធា ប៉ុន្តែកងទ័ពតៃវ៉ាន់ខុសនឹងកងទ័ពរដ្ឋាភិបាលអាហ្វហ្គានីស្ថានដែលទម្លាក់អាវុធមុនការប្រយុទ្ធ។
នាយករដ្ឋមន្ត្រីតៃវ៉ាន់រូបនេះយល់ថា ការដួលរលំយ៉ាងងាយបំផុតរបស់រដ្ឋាភិបាលក្រុងកាប៊ុល គឺមកពីកត្តាផ្ទៃក្នុងរបស់រដ្ឋាភិបាលនោះបែកបាក់គ្នា នាំឱ្យកងទ័ពអស់ស្មារតីប្រយុទ្ធ និងកាន់អាវុធ ប៉ុន្តែតៃវ៉ាន់មិនមែនដូច្នោះទេ។ លោកពន្យល់ថា បើប្រទេសមួយមានភាពច្របូកច្របល់ផ្ទៃក្នុងទៅហើយ នោះបើទោះមានជំនួយពីខាងក្រៅក៏មិនអាចជួយអន្តរាគមន៍បានឡើយ។
លោក Su Tseng-chang បន្តចំអកឱ្យកាសែតចិនមួយនេះថា កុំចាត់ទុកតៃវ៉ាន់ទៅនឹងរដ្ឋាភិបាលក្រុងកាប៊ុលដែលរត់ចោលសមរភូមិ គឺច្រឡំធំហើយ។
ចិនមានផែនការលេបតៃវ៉ាន់ តាំងពីដែនកោះមួយនេះបំបែកខ្លួនដោយសារសង្គ្រាមឆ្នាំ១៩៤៩ បើគិតមកដល់ពេលនេះ គឺ ៧២ឆ្នាំហើយដែលក្រុងប៉េកាំង ចេះតែរកឱកាសលើកទ័ពលុកលុយដែនកោះដ៏តូចមួយនេះពុំបាន។
អ្វីដែលនាំឱ្យចិនរួញរាដូចនេះ គឺយ៉ាងហោចណាស់ក៏ប្រទេសមហាយក្សមួយនេះខ្លាចញញើតបន្តិចដែរ មើលទៅគឺខ្លាចកងកម្លាំងអន្តរាគមន៍របស់កងទ័ពអាមេរិក និងសម្ពន្ធមិត្តដែលប្រឆាំងផែនការរបស់ចិន ចង់លើកទ័ពលុកលុយដែនកោះមួយនេះ ហើយបើគិតអំពីទីតាំងភូមិសាស្ត្រនយោបាយវិញ គឺមិនត្រូវយកកោះតៃវ៉ាន់ទៅប្រដូចនឹងអាហ្វហ្គានីស្ថាននោះទេ។
ត្រងចំណុចនេះ សម្រាប់សហរដ្ឋអាមេរិក និងសម្ពន្ធមិត្តច្បាស់ណាស់កាន់តែងាកមកជួយតៃវ៉ាន់កាន់តែខ្លាំងថែមទៀត ហើយការពិតការដកកងទ័ពអាមេរិកចេញពីអាហ្វហ្គានីស្ថាន គឺអាចមានជាប់ពាក់ព័ន្ធនឹងការប្ដូរយុទ្ធសាស្ត្រងាកមកផ្ដោតសំខាន់លើតំបន់អាស៊ី ជាពិសេសគឺការខ្ទប់ការកើនឡើងឥទ្ធិពលចិនក្នុងតំបន់នេះ។
យុទ្ធសាស្ត្រខ្ទប់ឥទ្ធិពលចិន ត្រូវបានមើលឃើញថាមានសន្ទុះខ្លាំងនៅរយៈពេលចុងក្រោយនេះ គឺស្របពេលសមាជិកសន្តិសុខចតុភាគីហៅថា Quad រួមមានអាមេរិក ជប៉ុន អូស្ត្រាលី និងឥណ្ឌា រួមទាំងប្រទេសមួយចំនួនទៀតនៅអឺរ៉ុប មានដូចជាអង់គ្លេស បារាំង អាល្លឺម៉ង់ កាណាដា ហុល្លង់ កំពុងពង្រឹងតួនាទី និងសមត្ថភាពកងទ័ពកាន់តែខ្លាំងនិងសកម្មនៅក្នុងតំបន់អាស៊ី ដោយការដាក់ពង្រាយនាវាចម្បាំង យន្តហោះចម្បាំងនៅសមុទ្រចិនខាងត្បូង សមុទ្រចិនខាងកើត មហាសមុទ្រឥណ្ឌា និងមហាសមុទ្រប៉ាស៊ីហ្វិក។
ជាមួយគ្នានេះទៀត អាមេរិកអូសទាញបានប្រទេសវៀតណាម សិង្ហបុរី ហ្វីលីពីន ឥណ្ឌូនេស៊ី និងកូរ៉េខាងត្បូង ដែលអាចជួយពង្រឹងឥទ្ធិពលអាមេរិកនៅក្នុងតំបន់មួយនេះដើម្បីប្រឈមនឹងចិន។
យុទ្ធសាស្ត្ររបស់សហរដ្ឋអាមេរិកនេះហើយមើលទៅដែលនាយករដ្ឋមន្ត្រីតៃវ៉ាន់ លោក Su Tseng-chang ហ៊ានចំអកឱ្យក្រុងប៉េកាំង ថាកុំមើលស្រាលឱ្យសោះស្មារតីជាតិនិយមរបស់ប្រជាជន កងទ័ព និងមេដឹកនាំតៃវ៉ាន់ ដោយមិនត្រូវប្រៀបប្រដូចរដ្ឋាភិបាលតៃវ៉ាន់ ទៅនឹងរដ្ឋាភិបាលក្រុងកាប៊ុលរបស់ប្រធានាធិបតី អាស្រាហ្វ ហ្កានី ដែលទម្លាក់អាវុធ និងរត់ចោលសមរភូមិនោះទេ៕