បញ្ញវន្តខ្មែរនៅក្រៅស្រុក លើកឡើងថា ការចាកចេញរបស់រដ្ឋមន្ត្រីក្រសួងមហាផ្ទៃ ទៅប្រទេសបារាំង ក្នុងពេលនេះ ទំនងជាដើម្បីបន្ធូរភាពតានតឹងទំនាស់ផ្ទៃក្នុងបក្សកាន់អំណាចប៉ុណ្ណោះ បន្ទាប់ពីមានការតែងតាំងកូនប្រសាលោក ហ៊ុន សែន ក្នុងបំណងដើម្បីបន្សាបឥទ្ធិពលរបស់លោក ស ខេង ក្នុងកងកម្លាំងនគរបាលជាតិកាលពីពេលថ្មីៗនេះ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានលើកឡើងក្នុងកម្មវិធី Idea Talk របស់សារព័ត៌មាន The Cambodia Daily កាលពីថ្ងៃទី២៣ ខែសីហា ឆ្នាំ២០២១ ថា ការតែងតាំងលោក ឌី វិជ្ជា កូនប្រសារបស់លោក ហ៊ុន សែន ដែលជាស្វាមីរបស់អ្នកស្រី ហ៊ុន ម៉ាណា ឲ្យដឹកនាំក្រុមស៊ើបអង្កេតលើករណីជម្លោះដីធ្លីទូទាំងប្រទេស គឺជាការរំលោភអំណាចរបស់លោក ស ខេង យ៉ាងធ្ងន់ធ្ងរក្នុងឋានៈលោក ឌី វិជ្ជា ត្រឹមតែជាអគ្គស្នងការរងនៃអគ្គស្នងការដ្ឋាននគរបាលជាតិ ដែលចំណុះឲ្យក្រសួងមហាផ្ទៃនោះ។
លោកអះអាងថា ចំណុចសំខាន់នៃការតែងតាំងនេះ គឺលោក ឌី វិជ្ជា មានអំណាចប្រើកងកម្លាំងនគរបាលជាតិដោយមិនឆ្លងយោបល់របស់លោក ស ខេង ដែលជារដ្ឋមន្ត្រីក្រសួងមហាផ្ទៃនោះទេ ដូច្នេះបញ្ហានេះនឹងធ្វើឲ្យប៉ះទង្គិចយ៉ាងខ្លាំងចំពោះលោក ស ខេង ទើបបណ្តាលឲ្យលោកចេញទៅក្រៅស្រុក ដើម្បីបន្ធូរភាពស្មុគស្មាញក្នុងផ្លូវចិត្តផង និងដើម្បីចៀសវាងជម្លោះនៅផ្ទៃក្នុងគណបក្សរវាងក្រុមលោក ស ខេង និងលោក ហ៊ុន សែន ផងដែរ។
លោកបញ្ជាក់ថា សេចក្ដីសម្រេចនេះបានផ្តល់អំណាចដល់លោក ឌី វិជ្ជា ឲ្យដឹកនាំក្រុមការងារចំនួន ១៦រូប ដែលមានសិទ្ធិប្រើប្រាស់កម្លាំងផែនការសន្តិសុខនៃអគ្គស្នងការដ្ឋាននគរបាលជាតិទូទាំងប្រទេស ដែលបង្ហាញឲ្យឃើញថា ការតែងតាំងនេះ គឺជាការទប់ស្កាត់មួយដើម្បីកុំឲ្យមានអ្នកផ្សេងទៅស៊ើបអង្កេតការរំលោភដីធ្លីក្រៅពីសាច់ញាតិ ឬបក្ខពួករបស់លោក ហ៊ុន សែន និងជាការបន្ថយអំណាច និងឥទ្ធិពលរបស់លោក ស ខេង ទៅលើកម្លាំងសន្តិសុខជាតិផងដែរ។
ទោះយ៉ាងណា ការធ្វើដំណើរទៅក្រៅប្រទេសរយៈពេល ២សប្ដាហ៍នេះ ត្រូវបានក្រុមអ្នកវិភាគ និងអ្នកតាមដានសង្គមលើកឡើងថា ទំនងអាចនឹងមានជំនួបក្រៅផ្លូវការណាមួយរវាងលោក ស ខេង និងថ្នាក់ដឹកនាំអតីតគណបក្សប្រឆាំងដែរ។
ប៉ុន្តែកាលពីថ្ងៃទី២៣ ខែសីហា ឆ្នាំ២០២១ អ្នកនាំពាក្យក្រសួងមហាផ្ទៃ លោក ខៀវ សុភ័គ បានចេញលិខិតបដិសេធចំពោះការចុះផ្សាយថានឹងអាចមានជំនួបក្រៅផ្លូវការរវាងលោក ស ខេង និងមន្ត្រីជាន់ខ្ពស់បក្សប្រឆាំងក្នុងអំឡុងដំណើរទស្សនកិច្ចរបស់លោកទៅប្រទេសបារាំង ក្នុងពេលនេះ។
ប្រភពដដែលបញ្ជាក់ថា ការលើកឡើងនោះ គឺជារឿងមិនពិត ព្រោះការធ្វើដំណើររបស់រដ្ឋមន្ត្រីក្រសួងមហាផ្ទៃនៅពេលនេះ គឺជាធុរៈផ្ទាល់ខ្លួនប៉ុណ្ណោះ មិនមានកម្មវិធីផ្សេងនោះឡើយ។
អ្នកស្រាវជ្រាវការអភិវឌ្ឍសង្គម បណ្ឌិត សេង សារី បានប្រាប់សារព័ត៌មាន The Cambodia Daily នៅថ្ងៃទី២៤ ខែសីហា ថា ការធ្វើដំណើររបស់រដ្ឋមន្ត្រីក្រសួងមហាផ្ទៃ លោក ស ខេង ទៅកាន់ប្រទេសបារាំង ក្នុងស្ថានភាព Covid-19 នេះ ប្រហែលជាមានហេតុផលនយោបាយនៅពីក្រោយ ជាជាងរឿងឯកជន ព្រោះថាក្នុងស្ថានភាពប្រទេសកំពុងប្រឈមនឹងវិបត្តិ Covid-19 នេះ ការចេញទៅក្រៅប្រទេសដោយមូលហេតុផ្ទាល់ខ្លួន គឺជាហេតុផលមិនទំនងនោះទេ។
លោកអះអាងថា ការចាកចេញនេះប្រហែលជាអាចនឹងមានការចរចាណាមួយរវាងបក្សប្រឆាំង ដើម្បីរកដំណោះស្រាយនយោបាយរួមសម្រាប់កម្ពុជា ព្រោះថាដំណើរទស្សនកិច្ចនេះធ្វើឡើងស្របពេលដែលសហរដ្ឋអាមេរិកកំពុងជំរុញឲ្យមានការអនុម័តច្បាប់ដើម្បីដាក់ទណ្ឌកម្មលើកម្ពុជា ក្នុងគោលបំណងឲ្យបើកលំហប្រជាធិបតេយ្យឡើងវិញ ក្រោយគេមើលឃើញថា ការរឹតត្បិតសេរីភាពនៅកម្ពុជាបានកើតឡើងជាបន្តបន្ទាប់មកនេះ។
បណ្ឌិត សេង សារី បញ្ជាក់ថា ប្រសិនបើដំណើរទស្សនកិច្ចនេះនាំឲ្យមានការចរចានយោបាយណាមួយដើម្បីឈានទៅរកដំណោះស្រាយនយោបាយនៅកម្ពុជា នោះគឺជារឿងល្អសម្រាប់ខ្មែរទាំងអស់គ្នាដែលគួរតែអបអរសាទរ។
ក្រុមអ្នកឃ្លាំមើលខ្លះនិយាយថា វត្តមានរបស់លោក ស ខេង នៅប្រទេសបារាំង គ្មានហេតុផលណាមួយដើម្បីជួបក្រុមមន្ត្រីបក្សប្រឆាំង ជាពិសេសភាគីលោក សម រង្ស៊ី នោះទេ ប៉ុន្តែលោក ស ខេង អាចស្វែងរកប្រព័ន្ធអនុគ្រោះពន្ធរបស់អឺរ៉ុប EBA ២០% នោះមកវិញ។
ប្រភពដដែលឲ្យដឹងថា លោក ស ខេង ធ្លាប់រងនូវការចោទប្រកាន់ពីលោក សម រង្ស៊ី កាលពីអំឡុងឆ្នាំ២០១៩ ថារូបលោក និងកូនប្រសារបស់លោក ហ៊ុន សែន គឺលោក ឌី វិជ្ជា កំពុងរៀបចំគម្រោងដើម្បីកម្ចាត់ក្រុមលោក ហ៊ុន សែន ដើម្បីសងសឹកឲ្យឪពុករបស់លោក គឺលោក ហុក ឡង់ឌី អតីតអគ្គស្នងការនគរបាលជាតិ ដែលបានស្លាប់ដោយសារការផ្ទុះឧទ្ធម្ភាគចក្រកាលពីឆ្នាំ២០០៨ ហើយដែលមានការសង្ស័យថា លោក ហ៊ុន សែន ជាអ្នកបញ្ជាឲ្យមានរៀបចំបំផ្ទុះគ្រាប់បែក។
ក្រោយមក លោក ស ខេង បានសម្រេចប្តឹងលោក សម រង្ស៊ី ដោយអះអាងថា ដើម្បីឱ្យអ្នកនយោបាយមានក្រមសីលធម៌ និងបញ្ចៀសពីការចោទប្រកាន់ លាបពណ៌ ដែលនាំឱ្យខ្មែរបែកបាក់ជាតិធ្ងន់ធ្ងរ។
សាលាដំបូងរាជធានីភ្នំពេញនៅចុងខែធ្នូ ឆ្នាំ២០២០ បានសម្រេចកាត់ទោសលោក សម រង្ស៊ី ឱ្យជាប់ពន្ធនាគារចំនួន ៤ឆ្នាំ ក្នុងនោះមាន ២ឆ្នាំលើករណីបំភ្លៃព័ត៌មានជុំវិញមរណភាពរបស់អតីតអគ្គស្នងការនគរបាលជាតិ លោក ហុក ឡង់ឌី និង ២ឆ្នាំទៀតលើករណីញុះញង់ប្រជាពលរដ្ឋកុំឱ្យសងបំណុលធនាគារ៕