អតីតជាសត្រូវនឹងគ្នា ហើយពេលនេះកំពុងក្លាយជាមិត្តស្លាប់រស់នឹងគ្នាទៅវិញ។ អាមេរិកមិនអាចខ្វះវៀតណាម ហើយវៀតណាមក៏មិនអាចខ្វះអាមេរិក គឺទាំងសេដ្ឋកិច្ច និងសន្តិសុខតំបន់។
ចាប់តាំងពីស្ថាបនាឡើងវិញនូវទំនាក់ទំនងការទូតនៅឆ្នាំ១៩៩៥ មកនេះ សេដ្ឋកិច្ច និងទំនាក់ទំនងសហប្រតិបត្តិការទ្វេភាគីហក់ឡើងជាខ្លាំង។ ទំនាក់ទំនងពាណិជ្ជកម្មនៃប្រទេសទាំងពីរនេះបានហក់ឡើងដល់ទៅ ៩០ពាន់ ៨០០លានដុល្លារអាមេរិក គឺហក់ឡើង ១៩,៨ភាគរយក្នុងរយៈពេលមួយឆ្នាំមកនេះ ទោះជាប្រទេសទាំងពីររងផលប៉ះពាល់ដោយសារការរាតត្បាតនៃជំងឺកូវីដក៏ដោយ។ នេះបើតាមទិន្នន័យនៃក្រសួងពាណិជ្ជកម្មវៀតណាម។
លើសពីនេះទៀត គឺដើម្បីអបអរសាទរដំណើរទស្សនកិច្ចរបស់អនុប្រធានាធិបតីអាមេរិក អ្នកស្រី Kamala Harris វៀតណាមបានសម្រេចបើកជើងហោះហើរដោយផ្ទាល់ពីទីក្រុងហូជីមិញ ដែលខ្មែរហៅថាទីក្រុងព្រៃនគរ។ នេះបើតាមការចុះផ្សាយរបស់សារព័ត៌មានវៀតណាម VNA កាលពីថ្ងៃទី២៥ សីហា។
នៅក្នុងជំនួបជាមួយអ្នកស្រី Kamala Harris នៅទីក្រុងហាណូយ ប្រធានាធិបតីវៀតណាម Nguyen Xuan Phuc បានលើកសរសើរសហរដ្ឋអាមេរិក ដោយចាត់ទុកក្រុងវ៉ាស៊ីនតោន ជាដៃគូមិនអាចខ្វះបានសម្រាប់វៀតណាម នៅក្នុងស្ថានភាពពិភពលោកពេលនេះ និងទៅថ្ងៃអនាគត។
តាមលោក Nguyen Xuan Phuc វៀតណាមមានបំណងខ្លាំងក្នុងការពង្រឹងទំនាក់ទំនងទ្វេភាគីក្នុងគោលការណ៍គោរពគ្នាស្មើមុខស្មើមាត់ សំដៅលើកស្ទួយឯករាជភាព អធិបតេយ្យភាព បូរណភាពដែនដី និងជួយគ្នាដើម្បីសន្តិភាព ស្ថិរភាព និងការអភិវឌ្ឍតំបន់។
សម្រាប់វៀតណាម សូមស្វាគមន៍ការសម្រេចចិត្តរបស់សហរដ្ឋអាមេរិកដើម្បីធ្វើជាម្ចាស់ផ្ទះនៃកិច្ចប្រជុំនៃមេដឹកនាំក្រុមប្រទេសសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក សម្រាប់ឆ្នាំ២០២៣។
ចំណែកអ្នកស្រីអនុប្រធានាធិបតីអាមេរិក Kamala Harris បានថ្លែងអះអាងថា សហរដ្ឋអាមេរិកគាំទ្រវៀតណាម ដែលបើកចំហទំនាក់ទំនងជាមួយអាមេរិកកាន់តែស៊ីជម្រៅទាំងទំនាក់ទំនងទ្វេភាគី និងពហុភាគី ហើយគាំទ្រវៀតណាម ដែលដើរតួនាទីដ៏សំខាន់ក្នុងសមាគមអាស៊ាន។
អ្នកស្រី Kamala Harris បានទៅដល់ទីក្រុងហាណូយ កាលពីយប់ថ្ងៃអង្គារ ទី២៤ សីហា។ ក្នុងដំណើរទស្សនកិច្ចរបស់មន្ត្រីកំពូលៗនៃរដ្ឋការលោក ចូ បៃដិន ដែលបណ្ដាក់គ្នាមកកាន់អាស៊ី និងជាន់ទឹកដីវៀតណាម សិង្ហបុរី ត្រូវបានមើលឃើញថា ក្រុងវ៉ាស៊ីនតោន កំពុងស្រវាឱបប្រទេសសមាគមអាស៊ាន ដើម្បីដាក់សម្ពាធទៅលើចិនឲ្យខ្លាំង ហើយក្នុងគោលបំណងដើម្បីប្រាប់ចិនបញ្ឈប់សកម្មភាពរំលោភបំពានដែនទឹកប្រទេសជិតខាងនៅក្នុងតំបន់សមុទ្រចិនខាងត្បូង។
ជំនួបជាមួយប្រធានាធិបតីវៀតណាម លោក Nguyen Xuan Phuc អ្នកស្រី Kamala Harris បានប្រាប់ទៅមេដឹកនាំវៀតណាមថា សមាគមអាស៊ានត្រូវតែរួមគ្នារកវិធីដាក់សម្ពាធឲ្យខ្លាំងទៅលើចិន។ អនុប្រធានាធិបតីអាមេរិករូបនេះ បានអះអាងថា កងទ័ពជើងទឹកអាមេរិកនឹងបន្តមានវត្តមានជាប្រចាំនៅក្នុងតំបន់នេះ ហើយព្រមទាំងអាចចូលរួមជួយពង្រឹងសមត្ថភាពដល់កងទ័ពជើងទឹកវៀតណាមតាមគ្រប់ស្ថានការណ៍ទាំងអស់។ អ្នកស្រី Kamala Harris ក៏បានផ្ដោតការយកចិត្តទុកដាក់លើបញ្ហាសុខភាពនៅក្នុងតំបន់ផងដែរ។
អ្នកស្រីបានសម្រេចបើកការិយាល័យថ្មីប្រចាំតំបន់អាស៊ីអាគ្នេយ៍នៃទីភ្នាក់ងារគ្រប់គ្រង និងបង្ការជំងឺក្នុងតំបន់។ ក្នុងពិធីបើកការិយាល័យនេះ រួមមានវត្តមានរដ្ឋមន្ត្រីក្រសួងសុខាភិបាល និងសុខុមាលភាពពលរដ្ឋអាមេរិក នាយកទីភ្នាក់ងារគ្រប់គ្រង និងបង្ការជំងឺ និងឧបនាយករដ្ឋមន្ត្រី និងរដ្ឋមន្ត្រីសុខាភិបាលវៀតណាម។
ការិយាល័យប្រចាំតំបន់ថ្មីនេះ សំដៅពង្រឹងសមត្ថភាពទីភ្នាក់ងារគ្រប់គ្រង និងបង្ការជំងឺក្នុងការបំពេញបេសកកម្មការពារជនជាតិអាមេរិក និងប្រជាជនក្នុងតំបន់ តាមរយៈការឆ្លើយតបឆាប់រហ័សទៅនឹងការគំរាមកំហែងផ្នែកសុខភាព។
អ្នកស្រីអនុប្រធានាធិបតី ក៏បានបង្ហាញការប្ដេជ្ញាចិត្តរបស់សហរដ្ឋអាមេរិកចំពោះកិច្ចសហប្រតិបត្តិការសន្តិសុខសុខាភិបាលក្នុងតំបន់ ដោយបានអំពាវនាវឲ្យមានសកម្មភាពត្រៀមបង្ការ និងឆ្លើយតបជំងឺរាតត្បាតគ្រប់ប្រភេទទាំងអស់។
លោក Xavier Becerra ដែលជារដ្ឋមន្ត្រីក្រសួងសុខាភិបាល និងសុខុមាលភាពពលរដ្ឋអាមេរិក បានថ្លែងថា តាមរយៈការិយាល័យនេះ មន្ត្រីជំនាញរបស់អាមេរិកនឹងធ្វើការយ៉ាងជិតស្និទ្ធជាមួយដៃគូក្នុងតំបន់ ដើម្បីចែករំលែកយុទ្ធសាស្ត្រ និងពង្រឹងសមត្ថភាពគ្នាក្នុងការការពារ ស្វែងរក និងឆ្លើយតបការគំរាមកំហែងនៃជំងឺឆ្លងនាពេលបច្ចុប្បន្ន និងទៅអនាគត។
ដោយឆ្លើយតបនឹងអាមេរិកដូចនេះ ប្រធានាធិបតីវៀតណាម Nguyen Xuan Phuc បានសម្ដែងការសាទរ ការគាំទ្រ និងការប្ដេជ្ញាចិត្តរបស់អាមេរិកដែលបង្កើនកញ្ចប់ថវិកាដើម្បីជួយវិស័យសុខភាពសាធារណៈសម្រាប់តំបន់អាស៊ាន។ លោក Nguyen Xuan Phuc បានហៅកិច្ចសហការ និងជំនួយរបស់អាមេរិកសម្រាប់វៀតណាម និងសមាគមអាស៊ាន គឺជាការលើកកម្ពស់នៃការរឹតចំណងសាមគ្គីភាព មិត្តភាពទ្វេភាគីផង និងពហុភាគីផង។
សម្រាប់ប្រធានាធិបតីវៀតណាម ការបង្កើនសហប្រតិបត្តិការរវាងអាមេរិក និងអាស៊ាន គឺជាយុទ្ធសាស្ត្រដ៏គន្លឹះដើម្បីសន្តិសុខតំបន់ និងសន្តិសុខដងទន្លេមេគង្គ។
តាមរយៈទស្សនកិច្ចរបស់អ្នកស្រីអនុប្រធានាធិបតី មេដឹកនាំប្រទេសទាំងពីរបានស្វាគមន៍ការចុះហត្ថលេខាលើកិច្ចសន្យាជួលដីមួយកន្លែងនៅទីក្រុងហាណូយ ដើម្បីសាងសង់ស្ថានទូតថ្មីរបស់អាមេរិក។
ក្នុងរយៈពេលមួយខែមកនេះ សហរដ្ឋអាមេរិក បានផ្ដល់ជំនួយវ៉ាក់សាំងរបស់អាមេរិក ដែលជាវ៉ាក់សាំងប្រឆាំងកូវីដមានចំនួន ៥លានដូសទៅឱ្យប្រទេសវៀតណាម។ តាមរយៈទស្សនកិច្ចរបស់អ្នកស្រីអនុប្រធានាធិបតី ត្រូវគេរំពឹងថា វៀតណាមនឹងទទួលបានជំនួយវ៉ាក់សាំងពីសហរដ្ឋអាមេរិកច្រើនលានដូសទៀត៕