34 C
Phnom Penh

លោក ហ៊ុន សែន៖ យុទ្ធនាការ​ចាក់​វ៉ាក់សាំង Covid-19 ជុំ​ទី​១ អាច​នឹង​បញ្ចប់​មុន​ផែនការ​ដែល​បាន​គ្រោង​ទុក

ដោយ ឌឹ ខេមបូឌា ដេលី

បទវិភាគ

លោក ហ៊ុន សែន អះអាង​ថា យុទ្ធនាការ​ចាក់​វ៉ាក់សាំង Covid-19 ជុំ​ទី​មួយ​អាច​នឹង​បញ្ចប់​មុន​ផែនការ​ដែល​បាន​គ្រោង​ទុក ពោល​គឺ​នៅ​ចុង​ខែ​តុលា ឬ​ដើម​ខែ​វិច្ឆិកា ឆ្នាំ​២០២១ ខាងមុខ​នេះ។

ប្រមុខ​រដ្ឋាភិបាល​កម្ពុជា បាន​ចេញ​សេចក្តី​ណែនាំ​ស្ដីពី​ការ​ពង្រឹង​អនុវត្ត​យុទ្ធនាការ​ជាតិ​ចាក់​វ៉ាក់សាំង Covid-19 ជុំ​ទី​មួយ​កាលពី​ថ្ងៃ​ទី​២៩ ខែ​សីហា ឆ្នាំ​២០២១ ថា គិត​មក​ទល់នឹង​ពេលនេះ កម្ពុជា​បាន​ចាក់​វ៉ាក់សាំង​ជូន​ពលរដ្ឋ​ចាប់ពី​អាយុ ១២​ឆ្នាំ​ឡើង​ទៅ​បាន ៨៩% ហើយ បើ​ធៀប​នឹង​ប្រជាជន​គោលដៅ​ចំនួន ១២​លាន​នាក់។

លោក ហ៊ុន សែន បញ្ជា​ឲ្យ​អាជ្ញាធរ​ខេត្ត​ទាំងអស់​ត្រូវ​ប្រមូល​ផ្តុំ​យកចិត្ត​ទុកដាក់​ខ្ពស់ ដោយ​ចាត់ទុក​ការ​ប្រយុទ្ធ​នឹង​ការ​ឆ្លង​រាលដាល​ជំងឺ Covid-19 ជា​ការងារ​ស្នូល​ខ្ពស់​បំផុត​របស់​ខ្លួន ជាពិសេស​ត្រូវ​សម្រេច​ឱ្យ​បាន​ឆាប់​រហ័ស​ការ​ចាក់​វ៉ាក់សាំង​ជូន​ប្រជាជន​នៅ​ក្នុង​មូលដ្ឋាន​ក្រោម​សមត្ថកិច្ច​របស់​ខ្លួន​ដែល​ជា​យុទ្ធសាស្ត្រ​គន្លឹះ​របស់​រដ្ឋាភិបាល។

ប្រមុខ​រដ្ឋាភិបាល​កម្ពុជា បាន​បញ្ជាក់​ថា គណៈកម្មការ​ចំពោះ​កិច្ច​ចាក់​វ៉ាក់សាំង Covid-19 ទូទាំង​ប្រទេស ត្រូវតែ​សហការ​ជាមួយ​អាជ្ញាធរ​ខេត្ត​បន្ត​រៀបចំ​ឱ្យ​មាន​ទីតាំង​សម្រាប់​ចាក់​វ៉ាក់សាំង​ជូន​ពលរដ្ឋ​ដោយ​ឥត​គិតថ្លៃ​នៅ​តាម​មន្ទីរពេទ្យ​បង្អែក​ក្រុង ស្រុក ខណ្ឌ និង​តាម​មណ្ឌល​សុខភាព​នានា ដើម្បី​ចាក់​ជូន​ពលរដ្ឋ​ដែល​មិនទាន់​បាន​ចាក់​វ៉ាក់សាំង​ដោយ​មូលហេតុ​ផ្សេងៗ ឲ្យ​គាត់​អាច​ទទួល​បាន​វ៉ាក់សាំង​ប្រឆាំង​វីរុស Covid-19 ទាំងនោះ​បាន​ដូច​ធម្មតា។

សេចក្តី​ណែនាំ​នេះ ធ្វើឡើង​ដើម្បី​ជំរុញ​ឲ្យ​អាជ្ញាធរ​មូលដ្ឋាន​បង្កើន​ល្បឿន​នៃ​ការ​ចាក់​វ៉ាក់សាំង​ជូន​ពលរដ្ឋ​ទូទាំង​ប្រទេស​ឲ្យ​បាន​ឆាប់ ក្រោយ​រដ្ឋាភិបាល​បាន​បើក​យុទ្ធនាការ​ជាតិ​ចាក់​វ៉ាក់សាំង Covid-19 តាំងពី​ដើម​ខែ​កុម្ភៈ ឆ្នាំ​២០២១ កន្លងទៅ។

គ្រូពេទ្យ​ចាក់​វ៉ាក់សាំង​បង្ការ​ជំងឺ​កូវីដ-១៩ ជូន​ពលរដ្ឋ​នៅ​ខេត្ត​កំពង់ឆ្នាំង កាល​ពី​ថ្ងៃ​ទី​២៧ ខែ​សីហា ឆ្នាំ​២០២១។ (រូបថត​ពី​ក្រសួង​មហាផ្ទៃ)

កាលពី​ថ្ងៃ​ទី​១០ ខែ​កុម្ភៈ ឆ្នាំ​២០២១ រដ្ឋាភិបាល​កម្ពុជា បាន​ប្រកាស​បើក​យុទ្ធនាការ​ជាតិ​ចាក់​វ៉ាក់សាំង​ប្រឆាំង​ជំងឺ Covid-19 ទូទាំង​ប្រទេស​ជូន​ពលរដ្ឋ​ចំនួន ១០​លាន​នាក់ ដើម្បី​ទប់ស្កាត់​ការ​ឆ្លង​រាលដាល​នៃ​វីរុស Covid-19 ផង និង​ដើម្បី​ធានា​បាន​ភាព​ស៊ាំ​ទូទាំង​ប្រទេស​ឲ្យ​បាន​ឆាប់​ក្នុង​ការ​ឈាន​ទៅ​បើក​ប្រទេស​ជា​ប្រក្រតី​ឡើងវិញ​ផង​ដែរ។

ទាក់ទិន​នឹង​ការ​ចាក់​វ៉ាក់សាំង​ប្រឆាំង​វីរុស Covid-19 នេះ ក្រសួង​សុខាភិបាល បាន​អះអាង​កាលពី​ថ្ងៃ​ទី​២៩ ខែ​សីហា ឆ្នាំ​២០២១ ថា ខ្លួន​បាន​បង្កើន​ល្បឿន​ចាក់​វ៉ាក់សាំង​ប្រឆាំង​វីរុស Covid-19 ជូន​ពលរដ្ឋ​ដូស​ទី​១ បាន​ចំនួន​ជាង ១០​លាន ៥​សែន​នាក់​ហើយ រីឯ​ដូស​ទី​២ មាន​ចំនួន​ជាង ៨​លាន ៣​សែន​នាក់ ដោយឡែក​អ្នក​ចាក់​ដូស​ទី​៣ មាន​ចំនួន​ជាង ៥​សែន ៩​ម៉ឺន​នាក់ ខណៈ​ការ​ចាក់​វ៉ាក់សាំង​ដល់​កុមារ​បាន​ចំនួន ៧៤,៧៨% ផង​ដែរ។

ជុំវិញ​ការ​ទប់ស្កាត់​ការ​ឆ្លង​វីរុស Covid-19 នេះ ក្រសួង​សុខាភិបាល ក៏​បាន​បង្ហាញ​របាយការណ៍​អំពី​អ្នក​ឆ្លង​វីរុស Covid-19 នៅ​ថ្ងៃ​ទី​៣០ ខែ​សីហា ឆ្នាំ​២០២១ ដែរ​ថា ក្រសួង​បាន​រក​ឃើញ​អ្នក​ឆ្លង​វីរុស Covid-19 ថ្មី​ចំនួន ៤០៨​នាក់ និង​អ្នក​ជាសះស្បើយ​ថ្មី​ចំនួន ៣២៤​នាក់ ខណៈ​អ្នក​ស្លាប់​ថ្មី​មាន​ចំនួន ១១​នាក់។

ក្រសួង​បញ្ជាក់​ថា មក​ទល់នឹង​ពេលនេះ អ្នក​ឆ្លង​វីរុស Covid-19 សរុប​បាន​កើន​ឡើង​ដល់​ជាង ៩​ម៉ឺន ២​ពាន់​នាក់​ហើយ និង​អ្នក​ដែល​ជាសះស្បើយ​សរុប​មាន​ចំនួន​ជាង ៨​ម៉ឺន ៨​ពាន់​នាក់ ដោយឡែក​អ្នក​ស្លាប់​សរុប​បាន​កើន​ឡើង​ជាង ១៨៩២​នាក់​ហើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស