លទ្ធផលផ្លូវការនៃការបោះឆ្នោតសភានៃសហព័ន្ធអាល្លឺម៉ង់ បានបង្ហាញឲ្យឃើញថា គណបក្សសង្គមប្រជាធិបតេយ្យ (SPD) គឺជាអ្នកដែលទទួលបានអាសនៈច្រើនជាងគេ។ នេះបើតាមការចេញផ្សាយដោយបណ្ដាញផ្សាយព័ត៌មាន BBC នៅថ្ងៃចន្ទ ទី២៧ ខែកញ្ញា ឆ្នាំ២០២១។
យោងតាមសេចក្តីប្រកាសរបស់ក្រុមប្រឹក្សាបោះឆ្នោតរបស់អាល្លឺម៉ង់ គណបក្សសង្គមប្រជាធិបតេយ្យទទួលបានជ័យជម្នះពិតមែន តែសំឡេងឆ្នោតលើគ្នាតែបន្តិចប៉ុណ្ណោះលើគណបក្សអភិរក្សនិយម (CDU/CSU) របស់អធិការបតី អ្នកស្រី Angela Merkel ក្នុងការបោះឆ្នោតដែលបានប្រព្រឹត្តទៅកាលពីថ្ងៃអាទិត្យ ទី២៦ ខែកញ្ញា ឆ្នាំ២០២១។
តាមលទ្ធផលផ្លូវការ គណបក្ស SPD ឈ្នះបានសំឡេងគាំទ្រ ២៥,៧% បន្ទាប់មកគណបក្ស CDU/CSU ទទួលបាន ២៤,១%។ ចំណែកគណបក្សបៃតង ទទួលបាន ១៤,៨% សម្រាប់រដ្ឋសភាអាល្លឺម៉ង់ ដែលមាន ៧៣៥អាសនៈ។
តាមក្រុមប្រឹក្សាអ្នកបោះឆ្នោតមានគណបក្សនយោបាយចំនួន ៧បក្សដែលបានដណ្ដើមអាសនៈក្នុងការបោះឆ្នោតសភាអាណត្តថ្មីនេះ ក្នុងនោះ៖
- គណបក្ស SPD កាន់កាប់អាសនៈ ២០៦
- គណបក្ស CDU/CSU បាន ១៩៦អាសនៈ
- គណបក្សបៃតង បាន ១១៨អាសនៈ
- គណបក្ស FDP បាន ៩២អាសនៈ
- គណបក្ស AFD បាន ៨៣អាសនៈ
- គណបក្ស Linke បាន ៣៩អាសនៈ
- និងគណបក្ស SSW បានតែមួយអាសនៈប៉ុណ្ណោះ។
មេដឹកនាំគណបក្សសង្គមប្រជាធិបតេយ្យ (SPD) លោក Olaf Scholz ដែលជាបេក្ខជនអធិការបតី ត្រូវគេរំពឹងថានឹងក្លាយជាអធិការបតីអាល្លឺម៉ង់ជំនួសអ្នកស្រី Angela Merkel ដែលសុំមិនឈរឈ្មោះជាបេក្ខជនសម្រាប់អាណត្តថ្មីនេះទៀតឡើយ តែបក្សរបស់អ្នកស្រីជាបក្សធំទី២ នៅក្នុងរដ្ឋសភា។ លោក Olaf Scholz ប្រកាសថា សម្ពន្ធភាពក្នុងរដ្ឋាភិបាលរបស់លោកមានបីគណបក្ស គឺអាចមានបក្សបៃតង និងអ្នកសេរីនិយម liberals និងគណបក្សសង្គមប្រជាធិបតេយ្យរបស់លោក។
ការបោះឆ្នោតនេះ គឺបិទបញ្ចប់សម័យកាលកាន់អំណាច ១៦ឆ្នាំរបស់អ្នកស្រី Angela Merkel ដែលសម្រេចមិនឈរឈ្មោះជាអធិការបតីក្នុងការបោះឆ្នោតលើកនេះ។ អ្នកស្រីត្រូវបានគេចាត់ទុកថាជាមេដឹកនាំកាន់អំណាចបានយូរបំផុតមួយនៅអឺរ៉ុប។
សម្រាប់អ្នកស្រី Merkel មិនឈរឈ្មោះបោះឆ្នោតជាថ្មី គឺជាលើកទីមួយហើយនៃសហព័ន្ធអាល្លឺម៉ង់ ចាប់តាំងពីឆ្នាំ១៩៤៩។ ការបោះឆ្នោតសភាអាល្លឺម៉ង់ តាមទម្លាប់គឺជាការប្រកួតប្រជែងរវាងបក្សធំពីរ គឺបក្សគ្រិស្តសាសនិកប្រជាធិបតេយ្យ CDU-CSU ជាបក្សកំពុងកាន់អំណាច និងគណបក្សសង្គមប្រជាធិបតេយ្យ SPD។
មានការកត់សម្គាល់ថា វិបត្តិអាកាសធាតុជាកង្វល់របស់អាល្លឺម៉ង់ជាងពេលណាទាំងអស់ ដោយបានលើកកម្លាំងឱ្យគណបក្សបៃតងឡើងប្រជាប្រិយភាពក្លាយជាបក្សធំទីបីនៅក្នុងការបោះឆ្នោតនេះ។
រហូតមកទល់ពេលនេះ ពុំទាន់អាចមានការព្យាករថា រដ្ឋាភិបាលចម្រុះក្រោមការដឹកនាំរបស់បក្សឈ្នះដឹកនាំដោយលោក Olaf Scholz នឹងអាចកើតចេញរូបរាងនៅពេលណាច្បាស់លាស់នោះទេ ខណៈការបោះឆ្នោតនៅឆ្នាំ២០១៧ គឺគណបក្ស CDU របស់អ្នកស្រី Angela Merkel បានឈ្នះឆ្នោតពិតមែន តែបានចំណាយពេលដល់ទៅ ១៧១ថ្ងៃទើបអាចរកច្រកចេញរួចក្នុងការបង្កើតរដ្ឋាភិបាលចម្រុះ៕