ក្នុងរយៈពេលប៉ុន្មានថ្ងៃមកនេះ ពិភពលោកមានការចាប់អារម្មណ៍ជាខ្លាំងចំពោះការផ្លាស់ប្ដូរមេដឹកនាំនៅប្រទេសជប៉ុន សម្រាប់តំណែងនាយករដ្ឋមន្ត្រីដែលជាតួនាទីសកម្ម និងទទួលខុសត្រូវខ្ពស់បំផុតចំពោះនយោបាយរបស់រាជាណាចក្រនៅអាស៊ីខាងកើតមួយនេះ។ តែនៅពេលនេះ រកឃើញហើយឥស្សរជននយោបាយម្នាក់ដែលនឹងក្លាយជានាយករដ្ឋមន្ត្រី គឺលោក Fumio Kishida។
អ្នកនយោបាយអាយុ ៦៤ឆ្នាំរូបនេះ គឺជាអតីតរដ្ឋមន្ត្រីការបរទេស។ គណបក្សប្រជាធិបតេយ្យសេរីនិយម LDP បានសម្រេចជ្រើសរើសលោក Kishida ឱ្យឡើងកាន់តំណែងប្រធានគណបក្សកំពុងកាន់អំណាចនេះ ហើយនឹងក្លាយជានាយករដ្ឋមន្ត្រីជំនួសលោក Yoshihide Suga ដែលបានលាលែងពីតំណែង។
តាមបណ្ដាញផ្សាយព័ត៌មាន Channel News Asia ការបោះឆ្នោតប្រព្រឹត្តនៅថ្ងៃទី២៩ កញ្ញា នេះ។
លោក Fumio Kishida នឹងត្រូវរង់ចាំទទួលការអនុម័តពីសមាជិកសភារបស់ប្រទេសជប៉ុន ជាមុនសិន មុននឹងចូលកាន់តំណែងជានាយករដ្ឋមន្ត្រីថ្មីបន្តវេនពីលោក Yoshihide Suga ដែលបានប្រកាសលាលែងពីតំណែងកាលពីប៉ុន្មានសប្តាហ៍មុននេះ។
លោក Fumio Kishida នឹងត្រូវចូលខ្លួនដើម្បីសុំសេចក្ដីអនុម័តពីសភាដែលនឹងត្រូវធ្វើឡើងនៅថ្ងៃចន្ទ ទី៤ ខែតុលា សប្ដាហ៍ក្រោយនេះ។
គណបក្សចម្រុះដឹកនាំដោយ LDP មានសំឡេងភាគច្រើនស្រាប់ហើយនៅក្នុងសភាទាំងពីរជាន់ គឺសភាជាន់ទាប និងសភាជាន់ខ្ពស់។
មានការរំពឹងថា ការគាំទ្រចំពោះលោក Fumio Kishida ឲ្យឡើងកាន់តំណែងជានាយករដ្ឋមន្ត្រីថ្មី ត្រូវគេមើលឃើញថានឹងពុំមានអ្វីជាការរាំងស្ទះនោះទេ។
មុនការប្រកួតគ្នានេះ គឺមានបេក្ខជនចំនួន ៤រូប ក្នុងនោះលោក Taro Kono រដ្ឋមន្ត្រីកែទម្រង់ប្រឆាំងជំងឺកូវីដ លោក Fumio Kishida អតីតរដ្ឋមន្ត្រីការបរទេស អ្នកស្រី Sanae Takaichi អតីតរដ្ឋមន្ត្រីទូរគមនាគមន៍ និងអ្នកស្រី Seiko Noda អគ្គលេខាធិការស្ដីទីនៃគណបក្សប្រជាធិបតេយ្យសេរី LDP។
តាមការស្ទង់ដំបូងៗ គឺលោក Taro Kono មានភាពលេចធ្លោជាងគេដែលរំពឹងថានឹងឈ្នះការបោះឆ្នោត។ តែបើតាមលទ្ធផលជុំផ្ដាច់ព្រ័ត្រ គឺលោក Kono ទទួលបាន ១៧០សំឡេង ចំណែកលោក Kishida ទទួលបានសំឡេងគាំទ្រ ២៥៧សំឡេង។
លោក Kishida ក្លាយជាប្រធានគណបក្សប្រជាធិបតេយ្យសេរីនិយម លើកទី២៧។ លោកត្រូវដឹកនាំបក្សទៅប្រកួតបោះឆ្នោតសកលនៅខែវិច្ឆិកា ឆ្នាំ២០២១ នេះ។
នៅជប៉ុន ការលាលែងពីតំណែងរបស់អ្នកនយោបាយ ក្នុងនោះមានទាំងនាយករដ្ឋមន្ត្រី គឺជារឿងធម្មតា។ ការដែលលោកនាយករដ្ឋមន្ត្រី Yoshihide Suga លាលែងពីតំណែងបន្ទាប់ពីដឹកនាំរដ្ឋាភិបាលបានត្រឹមតែ ១ឆ្នាំប៉ុណ្ណោះ ក៏មិនមែនជាកង្វល់ថាប្រទេសនេះមានវិបត្តិនយោបាយអ្វីដែរ។ លោក ស៊ីនហ្សូ អាបេ បានលាលែងពីតំណែងដោយសារបញ្ហាសុខភាពក៏ជារឿងធម្មតាដែរ។
ជាការកត់សម្គាល់ គឺក្នុងរវាងឆ្នាំ២០០៦ ដល់ឆ្នាំ២០១២ មានអ្នកនយោបាយរហូតដល់ ៦រូបបានឡើងកាន់តំណែងជានាយករដ្ឋមន្ត្រីបន្តបន្ទាប់គ្នា គឺមានអ្នកលាលែង និងមានអ្នកឡើងកាន់តំណែង។ ក្នុងនោះមានអ្នកនយោបាយម្នាក់ដែលទើបតែចូលកាន់តំណែងនាយករដ្ឋមន្ត្រីបានជាង ២ខែប៉ុណ្ណោះ ក៏បានលាលែង គឺ Hata Tsutomu។ លោកឡើងកាន់តំណែងនេះចាប់ពីខែមេសា ឆ្នាំ១៩៩៤ ដល់ខែមិថុនា ឆ្នាំ១៩៩៤។ តែនៅអាស៊ីមានតែប្រទេសជប៉ុនមួយគត់ ដែលដោះដូរនាយករដ្ឋមន្ត្រី គឺដូចជារបស់មិនសំខាន់ឡើយ។
នៅបណ្ដាប្រទេសខ្លះ ទោះជាមេដឹកនាំនោះមានសុខភាពទ្រុឌទ្រោមដើរសឹងមិនរួច ក៏នៅមិនព្រមលាលែងដែរ គឺមានតែខិតខំរកមធ្យោបាយដើម្បីបន្តកាន់អំណាច។ មេដឹកនាំខ្លះត្រូវបានប្រជាជនធ្វើបាតុកម្មរាប់ម៉ឺនសែននាក់ដេញចេញពីតំណែង ក៏មិនខ្ចីចុះដែរ គឺផ្ទុយទៅវិញព្យាយាមក្រាញអំណាច ហើយបញ្ជាឱ្យកងទ័ពបាញ់បង្ក្រាបបាតុកររាបដល់ដីស្លាប់រាប់សិបនាក់។ ប្រទេសខ្លះប្លន់អំណាចឆៅៗតែម្ដង៕