29 C
Phnom Penh

លោក ហ៊ុន សែន បញ្ជា​ឱ្យ​ដោះលែង​យានយន្ត​ខុស​ច្បាប់​ជាង ២០០​គ្រឿង​ក្នុង​ឱកាស​បុណ្យ​ភ្ជុំបិណ្ឌ​ខាងមុខ

ដោយ ឌឹ ខេមបូឌា ដេលី

បទវិភាគ

លោក​នាយករដ្ឋមន្ត្រី ហ៊ុន សែន បញ្ជា​ឱ្យ​ក្រសួង​សាធារណការ និង​ដឹកជញ្ជូន ដោះលែង​យានយន្ត​ជាង ២០០​គ្រឿង​ក្នុង​ឱកាស​បុណ្យ​ភ្ជុំបិណ្ឌ​ឱ្យ​ម្ចាស់​យានយន្ត ដើម្បី​ប្រកប​អាជីវកម្ម​ឡើងវិញ ប៉ុន្តែ​តម្រូវ​ឱ្យ​ម្ចាស់​យានយន្ត​ទាំងអស់​បង់​ប្រាក់​ពិន័យ​តាម​ច្បាប់​កំណត់​ជា​មុន។

បទបញ្ជា​នេះ ធ្វើឡើង​ក្រោយ​ក្រសួង​សាធារណការ និង​ដឹកជញ្ជូន បាន​ឃាត់​ទុក​យានយន្ត​ពី​ឈ្មួញ​ជាច្រើន​រយ​គ្រឿង​តាំងពី​ចុង​ឆ្នាំ​២០២០ មក ដែល​ត្រូវ​បាន​ប្រើប្រាស់​ល្មើស​ទៅ​នឹង​ច្បាប់​ស្ដីពី​ផ្លូវថ្នល់។

ប្រមុខ​រដ្ឋាភិបាល​កម្ពុជា​បាន​សរសេរ​លើ​ទំព័រ Facebook របស់​លោក​នៅ​ថ្ងៃ​ទី​៣០ ខែ​កញ្ញា ឆ្នាំ​២០២១ នេះ​ថា ដើម្បី​ស្ដារ​សេដ្ឋកិច្ច​ជាតិ​ឡើងវិញ ជាពិសេស​ការ​គាំទ្រ​ដល់​ការ​រស់​ឡើងវិញ​នៃ​វិស័យ​ឯកជន និង​ដើម្បី​លើកលែង​បន្ធូរបន្ថយ ផ្ដល់​ឱកាស​សាជាថ្មី​ដល់​ម្ចាស់​ក្រុមហ៊ុន​នានា រដ្ឋាភិបាល​កម្ពុជា​សម្រេច​ឱ្យ​ក្រសួង​សាធារណការ និង​ដឹកជញ្ជូន ដោះលែង​យានយន្ត​ចំនួន ២២៩​គ្រឿង​ទៅ​ម្ចាស់​ដើម​វិញ ដើម្បី​ឱ្យ​ពួកគេ​អាច​ប្រកប​អាជីវកម្ម​បាន​ដូច​ធម្មតា។

បុរស​ខ្លាំង​នៅ​កម្ពុជា ព្រមាន​ថា ថ្វីត្បិតតែ​រដ្ឋាភិបាល​កម្ពុជា​អនុញ្ញាត​ឱ្យ​មាន​ការ​ដោះលែង និង​បន្ធូរបន្ថយ​លើ​ករណី​ខុស​ច្បាប់​នៃ​ម្ចាស់​យានយន្ត​ទាំងនោះ​ក៏​ពិត​មែន ប៉ុន្តែ​ម្ចាស់​យានយន្ត និង​ម្ចាស់​អាជីវកម្ម​ដឹកជញ្ជូន​ទាំងអស់ ត្រូវ​គោរព និង​អនុវត្ត​តាម​ច្បាប់​ស្ដីពី​ផ្លូវថ្នល់​ឱ្យ​បាន​ត្រឹមត្រូវ​ជាទីបំផុត ចៀសវាង​កើតមាន​បញ្ហា​ដដែល​នេះ​ម្តង​ទៀត។

លោក ហ៊ុន សែន បញ្ជា​ឱ្យ​ក្រសួង​សាធារណការ និង​ដឹកជញ្ជូន ត្រូវតែ​បន្ត​អនុវត្ត​យ៉ាង​តឹងរ៉ឹង​ចំពោះ​យានយន្ត​ដឹកជញ្ជូន​លើស​ទម្ងន់​កំណត់​ដោយ​ច្បាប់ ដោយ​មិន​មាន​ការ​លើកលែង​ជា​លើក​ទី​២ ជាដាច់ខាត។ ជាង​នេះ​ទៀត ក្រសួង​ត្រូវតែ​ផ្សព្វផ្សាយ​ឱ្យ​បាន​ទូលំទូលាយ​បន្ថែម​ទៀត​អំពី​ច្បាប់ និង​លិខិត​បទដ្ឋាន​គតិយុត្តិ​នានា​ដល់​សាធារណជន​ទូទៅ ឱ្យ​បាន​យល់ដឹង​កាន់តែ​ច្បាស់​ផង​ដែរ។

កាលពី​ថ្ងៃ​ទី​២៨ ខែ​វិច្ឆិកា ឆ្នាំ​២០២០ ក្រសួង​សាធារណការ និង​ដឹកជញ្ជូន បាន​ចេញ​សេចក្តី​ជូនដំណឹង​ដល់​ម្ចាស់​ក្រុមហ៊ុន​ដឹកជញ្ជូន ម្ចាស់​រថយន្ត​ធុន​ធ្ងន់ និង​អ្នក​បើកបរ​​​រថយន្ត​ធុន​ធ្ងន់​ទាំងអស់​ថា ចាប់ពី​ថ្ងៃ​ទី​១៦ ខែ​វិច្ឆិកា ឆ្នាំ​២០២០ ក្រសួង​នឹង​អនុវត្ត​ច្បាប់​ស្ដីពី​ការ​ពង្រឹង​វិធានការ​យ៉ាង​តឹងរ៉ឹង​បន្ថែម​ចំពោះ​យានយន្ត​ដឹកជញ្ជូន​ធុន​ធ្ងន់​ដែល​បើកបរ​លើ​បណ្ដាញ​ផ្លូវថ្នល់​ទាំងអស់។

ក្រសួង​បញ្ជាក់​ថា ក្នុង​ករណី​ម្ចាស់​ក្រុមហ៊ុន​ដឹកជញ្ជូន ម្ចាស់​រថយន្ត​ធុន​ធ្ងន់ និង​អ្នក​បើកបរ​យានយន្ត​ធុន​ធ្ងន់​ណា​មួយ​នៅតែ​ដឹកជញ្ជូន ឬ​ផ្ទុក​ទម្ងន់​លើស​ពី ២០% នៃ​ច្បាប់​កំណត់ គឺ​ត្រូវ​ដក​ហូត​ប័ណ្ណ​បើកបរ​ព្យួរ​ទុក​រយៈពេល ២​ឆ្នាំ និង​ឃាត់​យានជំនិះ​ទុក​រយៈពេល ១​ឆ្នាំ​ផង​ដែរ។

មាត្រា​៦០ នៃ​ច្បាប់​ស្ដីពី​ផ្លូវថ្នល់ ចែង​ថា ក្នុង​ករណី​ម្ចាស់​យានយន្ត​ត្រូវ​ពិន័យ​ម្តង​រួច​ហើយ ប៉ុន្តែ​នៅតែ​បន្ត​ប្រព្រឹត្ត​ល្មើស​ទៀត​នោះ នឹង​ត្រូវ​ផាក​ពិន័យ​អន្តរកាល​ជា​ប្រាក់​ទ្វេដង ព្រមទាំង​បញ្ឈប់​អាជីវកម្ម​របស់​ក្រុមហ៊ុន​ទាំងនោះ​ចំនួន ១​ឆ្នាំ​ថែម​ទៀត។

របាយការណ៍​របស់​ក្រសួង​សាធារណការ និង​ដឹកជញ្ជូន ចាប់ពី​ថ្ងៃ​ទី​១ ខែ​កញ្ញា រហូត​ដល់​ថ្ងៃ​ទី​៣០ ខែ​កញ្ញា ឆ្នាំ​២០២១ នេះ បាន​បង្ហាញ​ថា យានយន្ត​ដឹកជញ្ជូន​ធុន​ធ្ងន់​ដែល​ល្មើស​ច្បាប់​ដឹក​ទំនិញ​លើស​ទម្ងន់​ចាប់ពី ២០​ភាគរយ​ឡើង​ទៅ មាន​ចំនួន​ប្រមាណ​ជា ៣០​យានយន្ត ដែល​ត្រូវ​ផាក​ពិន័យ និង​ឃាត់​ទុក​រយៈពេល ១​ឆ្នាំ។ ដោយឡែក​យានយន្ត​ផ្សេង​ទៀត​ដែល​ដឹកជញ្ជូន​លើស​ច្បាប់​កំណត់​ក្រោម ២០​ភាគរយ ត្រូវ​ផាក​ពិន័យ និង​តម្រូវ​ឱ្យ​រើ​ទំនិញ​ដែល​លើស​ចំនួន​កំណត់​នោះ​ចេញពី​យានយន្ត​ផង​ដែរ។

ជុំវិញ​បញ្ហា​នេះ ក្រុម​អ្នក​សង្កេតការណ៍​រិះគន់​ថា ច្បាប់​របស់​កម្ពុជា​នៅ​មិនទាន់​មាន​វិសាលភាព​ដូច​អំណាច​របស់​លោក ហ៊ុន សែន នៅឡើយ​ទេ ព្រោះថា​ការ​ប្រព្រឹត្ត​របស់​មនុស្ស​គ្រប់​គ្នា​ទាំងអស់ គឺ​អាស្រ័យ​ទៅ​ច្បាប់​ជា​អ្នក​កំណត់ ទើប​មាន​ភាព​យុត្តិធម៌​នៅ​ក្នុង​សង្គម ដូច្នេះ​ការ​លើកលែង​លើ​បទល្មើស​ទាំងនេះ​បាន​បង្ហាញ​ឱ្យ​ឃើញ​ពី​ការ​រំលោភ​ច្បាប់​យ៉ាង​ធ្ងន់ធ្ងរ ហើយ​ក៏​ជា​ចំណុច​ចាប់ផ្តើម​នៃ​ភាព​អយុត្តិធម៌​ក្នុង​សង្គម​ផង​ដែរ។

ប្រភព​ដដែល​ព្រមាន​ថា នៅ​ពេល​ដែល​លោក ហ៊ុន សែន ធ្វើ​បែប​នេះ គឺជា​គំរូ​អាក្រក់​របស់​អ្នក​ដឹកនាំ​ខ្មែរ​ដែល​ធ្វើ​ឱ្យ​ពលរដ្ឋ​លែង​គោរព​ច្បាប់ ប៉ុន្តែ​បែរជា​នាំគ្នា​គោរព និង​កោតខ្លាច​អ្នក​មាន​អំណាច​ទៅវិញ ដែល​នឹង​រុញច្រាន​ឱ្យ​កម្ពុជា​ក្លាយ​ជា​ប្រទេស​បាត់បង់​នីតិរដ្ឋ​ទៅ​ថ្ងៃ​អនាគត។

ជុំវិញ​បញ្ហា​នេះ សារព័ត៌មាន The Cambodia Daily មិនទាន់​អាច​ទាក់ទង​រដ្ឋមន្ត្រី​ក្រសួង​សាធារណការ និង​ដឹកជញ្ជូន លោក ស៊ុន ចាន់ថុល ដើម្បី​បំភ្លឺ​ជុំវិញ​ការ​បញ្ជា​ឱ្យ​ដោះលែង​យានយន្ត​ល្មើស​ទាំង ២២៩​គ្រឿង​នេះ​បាន​នៅឡើយ​ទេ​រហូត​មក​ទល់​នឹង​ម៉ោង​ផ្សាយ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស