តំណាងកម្ពុជាក្នុងវេទិការំឭកខួបលើកទី៦០ នៃសន្និសីទបណ្តាប្រទេសមិនចូលបក្សសម្ព័ន្ធ អះអាងថា បញ្ហាប្រឈមដែលប្រទេសមិនចូលបក្សសម្ព័ន្ធបានជួបប្រទះកាលពី ៦០ឆ្នាំមុន នៅតែបន្តមកដល់បច្ចុប្បន្ន គឺដោយសារតែការប្រកួតប្រជែងរបស់មហាអំណាច។
រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ លោក អ៊ុច បូររិទ្ធ បានលើកឡើងនៅក្នុងកិច្ចប្រជុំរបស់ប្រទេសមិនចូលបក្សសម្ព័ន្ធកាលពីថ្ងៃអង្គារ ដោយជំរុញឱ្យចលនាមិនចូលបក្សសម្ព័ន្ធទាំងអស់ ត្រូវតែប្ដេជ្ញាចិត្តក្នុងការបរិហារនយោបាយរើសអើង និងការបែងចែកជាតិសាសន៍ដែលប្រឆាំងនឹងគោលការណ៍ និងគោលបំណងរបស់ចលនាមិនចូលបក្សសម្ព័ន្ធដូចមានចែងក្នុងធម្មនុញ្ញនៃអង្គការសហប្រជាជាតិ។
មន្ត្រីរដ្ឋាភិបាលកម្ពុជារូបនេះអះអាងពីការកត់សម្គាល់របស់កម្ពុជាថា ប្រទេសសមាជិកទាំងអស់បានឈរយ៉ាងរឹងមាំរួមគ្នាប្រឆាំងនឹងការដាក់ទណ្ឌកម្មលើរដ្ឋសមាជិកចលនាមិនចូលបក្សសម្ព័ន្ធដោយខុសច្បាប់ជាឯកតោភាគីក្រៅប្រព័ន្ធតុលាការ និងការដាក់ទណ្ឌកម្មក្រៅប្រព័ន្ធសមត្ថកិច្ចរបស់មហាអំណាច ដែលជាការជំរុញឱ្យបែកខ្ញែកសណ្ដាប់ធ្នាប់ពិភពលោក។
ការអះអាងរបស់មន្ត្រីរដ្ឋាភិបាលកម្ពុជាក្នុងវេទិកាអន្តរជាតិនេះ ធ្វើឡើងដើម្បីបង្ហាញជំហររបស់ខ្លួនពីការមិនចូលបក្សសម្ព័ន្ធ ស្របពេលមហាអំណាចកុម្មុយនីស្ត និងមហាអំណាចសេរី កំពុងប្រជែងគ្នាលើភូមិសាស្ត្រនយោបាយដើម្បីផលប្រយោជន៍នៃប្រទេសជាតិរបស់ពួកគេរៀងៗខ្លួនក្នុងពេលបច្ចុប្បន្ននេះ។
មន្ត្រីជាន់ខ្ពស់តំណាងឱ្យរដ្ឋាភិបាលកម្ពុជា បានចូលរួមក្នុងកិច្ចប្រជុំរំឭកខួបអនុស្សាវរីយ៍លើកទី៦០ នៃសន្និសីទលើកដំបូងរបស់បណ្តាប្រទេសមិនចូលបក្សសម្ព័ន្ធ ដែលរៀបចំឡើងនៅទីក្រុងប៊ែលក្រាត ប្រទេសស៊ែប៊ី ដែលមានរយៈពេលពីរថ្ងៃ គឺចាប់ពីថ្ងៃទី១១ ដល់ថ្ងៃទី១២ ខែតុលា ឆ្នាំ២០២១។
ប៉ុន្តែមន្ត្រីជាន់ខ្ពស់អតីតគណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី១៣ តុលា នេះថា កម្ពុជាមានលក្ខខណ្ឌគ្រប់គ្រាន់ដែលបញ្ជាក់ថា ខ្លួនជាប្រទេសមិនចូលបក្សសម្ព័ន្ធ ប្រសិនបើរដ្ឋាភិបាលអនុវត្តឱ្យបានល្អតាមខ្លឹមសារកិច្ចព្រមព្រៀងសន្តិភាពទីក្រុងប៉ារីស ត្បិតទាំងមហាអំណាចលោកសេរី និងកុម្មុយនីស្ត សុទ្ធសឹងតែជាម្ចាស់ហត្ថលេខីនៃកិច្ចព្រមព្រៀងនេះក្នុងការធានាឯកភាពឱ្យកម្ពុជា។
លោករិះគន់ថា ការអនុវត្តនយោបាយមិនចូលបក្សសម្ព័ន្ធ មិនមែនត្រឹមតែការនិយាយរបស់ខ្លួននោះទេ ប៉ុន្តែការអនុវត្តជាក់ស្តែង គឺរឿងសំខាន់ណាស់ ខណៈរដ្ឋាភិបាលឯកបក្សសព្វថ្ងៃនេះត្រូវបានគេមើលឃើញថា កំពុងដឹកនាំកម្ពុជាទៅរកមហាអំណាចកុម្មុយនីស្តចិន ជាជាងការប្រកាន់ជំហរអព្យាក្រឹត្យដូចមានចែងក្នុងរដ្ឋធម្មនុញ្ញរបស់កម្ពុជា ដែលកំពុងតែធរមានសព្វថ្ងៃនេះ។
លោក មាជ សុវណ្ណារ៉ា បញ្ជាក់ថា ក្រោយកិច្ចព្រមព្រៀងសន្តិភាពទីក្រុងប៉ារីស រដ្ឋាភិបាលកម្ពុជាហាក់មិនបានធានាឯករាជ្យរបស់កម្ពុជាក្នុងនាមជាប្រទេសមិនចូលបក្សសម្ព័ន្ធនោះទេ ព្រោះថាមេដឹកនាំកម្ពុជានៅតែបន្តអនុវត្តកិច្ចព្រមព្រៀងខុសច្បាប់ជាមួយមេដឹកនាំវៀតណាមដដែល បើទោះបីជាកិច្ចព្រមព្រៀងទាំងនោះត្រូវអស់សុពលភាពក្រោយវត្តមានកិច្ចព្រមព្រៀងសន្តិភាពទីក្រុងប៉ារីស ទៅហើយក្តី។ ជាងនេះទៀត រដ្ឋាភិបាលខ្មែរក៏ត្រូវគេសង្ស័យ និងរងការរិះគន់ពីមជ្ឈដ្ឋានអន្តរជាតិផងដែរចំពោះការផ្តល់ទីតាំងមូលដ្ឋានយោធាតំបន់ឆ្នេររាម ដល់មហាអំណាចចិន លើទឹកដីកម្ពុជា។
ទាក់ទិននឹងបញ្ហានេះ កាលពីដើមខែកក្កដា ឆ្នាំ២០២១ លោក ហ៊ុន សែន បានអះអាងក្នុងលិខិតមួយចំពោះប្រធានាធិបតីសាធារណរដ្ឋប្រជាមានិតចិន លោក ស៊ី ជិនពីង ថា សមិទ្ធផលរយៈពេល ៧០ឆ្នាំរបស់គណបក្សកាន់អំណាចក្នុងការកសាងសន្តិភាព ស្ថិរភាព និងការអភិវឌ្ឍលើគ្រប់វិស័យនៅកម្ពុជា អាចកើតឡើងបានដោយអាស្រ័យលើការគាំទ្រឥតឈប់ឈររបស់ចិន ហើយលោកបានចាត់ទុកចិនជាមិត្តតែមួយ យ៉ាងជិតស្និទ្ធបំផុតរបស់កម្ពុជាផងដែរ។
ជាងនេះទៀត លោកនាយករដ្ឋមន្ត្រី ហ៊ុន សែន បានបញ្ជាក់ជំហររបស់ខ្លួនទៅកាន់ប្រទេសក្នុងតំបន់អាស៊ី និងមហាអំណាចពិភពលោកដទៃទៀត ដូចជាអាមេរិក ជាដើម កាលពីចុងខែឧសភា ឆ្នាំ២០២១ ថា បើកម្ពុជាមិនបានពឹងមហាអំណាចកុម្មុយនីស្តចិនទេ កម្ពុជាក៏មិនមានការរីកចម្រើនដូចសព្វថ្ងៃនេះដែរ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានសរសេរលើទំព័រ Facebook របស់លោកកាលពីថ្ងៃទី១២ ខែតុលា ថា មេដឹកនាំដែលកើតចេញពីការជ្រើសរើសរបស់ពលរដ្ឋតាមប្រព័ន្ធបោះឆ្នោតដោយសេរី ត្រឹមត្រូវ និងយុត្តិធម៌ មិនងាយរណបបរទេសណាទេ ប៉ុន្តែមេដឹកនាំដែលបរទេសលើកបន្តុប ឬកើតចេញពីការបោះឆ្នោតដោយបន្លំ ងាយនឹងរណបបរទេស និងក្បត់ឆន្ទៈពលរដ្ឋខ្លាំងណាស់៕