29 C
Phnom Penh

មន្ត្រី​នគរបាល​ជាច្រើន​នាក់​ចោទ​អធិការ​ស្រុក​ប្រាសាទបាគង​ថា​បាន​ប្រព្រឹត្ត​អំពើពុករលួយ​ធ្ងន់ធ្ងរ

បទវិភាគ

មន្ត្រី​នគរបាល​ជាច្រើន​នាក់ ចោទ​ថា អធិការ​នគរបាល​ស្រុក​ប្រាសាទបាគង ខេត្ត​សៀមរាប លោក លឹម សម្បត្តិ ថា​បាន​ប្រព្រឹត្ត​អំពើពុករលួយ និង​បង្ក​បាតុភាព​គ្មាន​សណ្ដាប់ធ្នាប់​នៅ​ក្នុង​ទីតាំង​មូលដ្ឋាន​ក្នុង​ដែន​សមត្ថកិច្ច​របស់​ខ្លួន​យ៉ាង​អនាធិបតេយ្យ។

មន្ត្រី​នគរបាល​ប្រចាំ​ស្រុក​ប្រាសាទបាគង ជាច្រើន​រូប បាន​ផ្សព្វផ្សាយ​ពាក្យ​បណ្តឹង​របស់​ខ្លួន​នៅ​ថ្ងៃ​ពុធ ទី​២០ តុលា នេះ ក្នុង​លក្ខខណ្ឌ​មិន​បញ្ចេញ​ឈ្មោះ​ថា អធិការ​ស្រុក​ប្រាសាទបាគង លោក លឹម សម្បត្តិ បាន​ប្រព្រឹត្ត​អំពើពុករលួយ​ជាច្រើន​លើក​ច្រើនសា​ដែល​ខុស​ទៅ​នឹង​តួនាទី​ភារកិច្ច​របស់​ខ្លួន​យ៉ាង​ធ្ងន់ធ្ងរ។

ប្រភព​ដដែល​អះអាង​ថា សព្វថ្ងៃ​នេះ អធិការ​ស្រុក​រូប​នេះ​មិន​ខ្វល់​នឹង​ការ​បង្ក្រាប​បទល្មើស​ដែល​បាន​កើតឡើង​នៅ​ក្នុង​ស្រុក​ដែល​ខ្លួន​បំពេញ​តួនាទី​នោះ​ទេ ប៉ុន្តែ​បែរជា​ចូល​ដៃ​ជាមួយ​ជនល្មើស ដោយ​ការ​ទទួល​ប្រាក់​សំណូក​ជា​ថ្នូរ​នឹង​ការ​បើក​ឱ្យ​មាន​ល្បែងស៊ីសង​គ្រប់​ប្រភេទ​កើតមាន​នៅ​ក្នុង​ស្រុក​យ៉ាង​អនាធិបតេយ្យ​ទៅវិញ។

មន្ត្រី​នគរបាល​ទាំងនោះ​បញ្ជាក់​ថា ដើម្បី​អនុវត្ត​អំពើពុករលួយ​របស់​ខ្លួន លោក លឹម សម្បត្តិ បាន​រៀបចំ​ខ្សែ​បណ្ដាញ​បក្ខពួក​របស់​គាត់​ឱ្យ​ទៅ​ជំរិត​ទារ​ប្រាក់​ពី​មេ​បនល្បែង​តាម​ទីតាំង​នីមួយៗ​ជា​ប្រចាំ ក្នុង​ទំហំ​ទឹកប្រាក់​ខុសៗ​គ្នា ប៉ុន្តែ​ទឹកប្រាក់​ដែល​ទទួល​បាន​ពី​ការ​ជំរិត​នោះ មិន​តិច​ជាង ១​លាន​រៀល​នោះ​ឡើយ​ក្នុង​មួយ​ទីតាំង។ លើស​ពី​នេះ មន្ត្រី​ក្រោម​ឱវាទ​ដែល​ចង់​ឡើង​ឋានៈ ត្រូវតែ​សូក​លុយ​ឱ្យ​អធិការ​រូប​នេះ​ផង​ដែរ ដោយឡែក​មន្ត្រី​នគរបាល​ដែល​មាន​សមត្ថភាព និង​មាន​ស្នាដៃ​មិន​អាច​ឡើង​ឋានៈ​បាន​ទេ បើ​គ្មាន​លុយ​សូក​លោក លឹម សម្បត្តិ។

នៅ​ថ្ងៃ​ទី​២០ ខែ​តុលា ឆ្នាំ​២០២១ នេះ មន្ត្រី​នគរបាល​ប្រចាំ​ស្រុក​ប្រាសាទបាគង​ជាច្រើន​នាក់ បាន​សម្រេច​ចិត្ត​ដាក់​ពាក្យ​បណ្តឹង​ទៅកាន់​រដ្ឋមន្ត្រី​ក្រសួង​មហាផ្ទៃ លោក ស ខេង អគ្គស្នងការ​នគរបាល​ជាតិ លោក នេត សាវឿន និង​ស្នងការ​នគរបាល​ខេត្ត​សៀមរាប លោក តេង ចាន់ណាត ឱ្យ​បើក​ការ​ស៊ើបអង្កេត និង​ចាត់​វិធានការ​ច្បាប់​លើ​អធិការ​ស្រុក​ប្រាសាទបាគង លោក លឹម សម្បត្តិ ដែល​បាន​សម្ងំ​ប្រព្រឹត្ត​អំពើពុករលួយ​ក្នុង​ស្ថាប័ន​រដ្ឋ​យ៉ាង​គឃ្លើន​ក្នុង​ពេល​បច្ចុប្បន្ន​នេះ។

ក្នុង​ពាក្យ​បណ្តឹង​ខាងលើ បាន​រៀបរាប់​ថា អធិការ​ស្រុក​រូប​នេះ​មិន​ដែល​បំពេញ​តួនាទី​ក្នុង​នាម​ជា​មន្ត្រី​រក្សា​សន្តិសុខ​ជូន​ពលរដ្ឋ​នោះ​ឡើយ ប៉ុន្តែ​បែរជា​ប្រព្រឹត្ត​ផ្ទុយពី​ភារកិច្ច​របស់​ខ្លួន​ទៅវិញ ដូចជា​ការ​ដើរ​ផឹកស៊ី​ក្នុង​អំឡុង​នៃ​ការ​ហាមប្រាម​ការ​ជួបជុំ​ក្នុង​វិបត្តិ​ជំងឺ Covid-19 របស់​ប្រមុខ​រដ្ឋាភិបាល​កម្ពុជា​យ៉ាង​អនាធិបតេយ្យ​ជា​ប្រចាំ។

ប្រភព​ដដែល​ឱ្យ​ដឹង​ថា អធិការ​ស្រុក​ប្រាសាទបាគង​រូប​នេះ​បាន​ឃុបឃិត​គ្នា​ជាមួយ​ជនល្មើស​តាម​វង់​ល្បែងស៊ីសង​ជាច្រើន ដូចជា​ករណី​នៅ​ភូមិ​ព្រៃគុយ ឃុំ​អំពិល ស្រុក​ប្រាសាទបាគង ជាដើម ដែល​បាន​ទទួល​ប្រាក់​សំណូក​ពី​មេ​បនល្បែង​ឈ្មោះ សៀង ចំនួន​ទឹកប្រាក់​ប្រមាណ​ជា ៥​លាន​រៀល។ បន្ថែម​ពី​នេះ ក៏​មាន​ករណី​ដូច​គ្នា​នេះ​ដែរ​នៅ​ភូមិ​ជាច្រើន​ទៀត ដូចជា​ភូមិ​ស្នាសង្គ្រាម ភូមិ​ព្រៃគុយ ភូមិ​សូភី និង​ភូមិ​កូនសត្វ ជាដើម ដែល​វង់​ល្បែង​ទាំងនោះ​ត្រូវ​សូក​លុយ​ឱ្យ​អធិការ​ស្រុក​រូប​នេះ​មិន​តិច​ជាង ១​លាន​រៀល​នោះ​ទេ​ក្នុង​មួយ​កន្លែងៗ។ ដោយឡែក​តាម​ប៉ុស្តិ៍​នគរបាល​ទាំង​៩ នៅ​ក្នុង​ស្រុក​ប្រាសាទបាគង ប្រសិនបើ​ចង់​ប្រើ​វិទ្យុ​ទាក់ទង គឺ​អធិការ​ស្រុក លោក លឹម សម្បត្តិ តម្រូវ​ឱ្យ​ទិញ​ពី​រូប​លោក​ផ្ទាល់​ក្នុង​តម្លៃ​គុណ​នឹង​ពីរ គឺ​ជាង ២០​ដុល្លារ​អាមេរិក​ក្នុង ១​គ្រឿង។ បន្ថែម​ពី​នេះ មេឃុំ​មួយ​ចំនួន​ក្នុង​ស្រុក​នេះ​ក៏​តម្រូវ​ឱ្យ​ទិញ​វិទ្យុ​ទាក់ទង​នេះ​ផង​ដែរ។

លោក លឹម សម្បត្តិ បាន​ទទួល​តំណែង​ជា​អធិការ​ស្រុក​ប្រាសាទបាគង នៃ​ខេត្ត​សៀមរាប អស់​រយៈពេល​ជាង ១០​ឆ្នាំ​មក​ហើយ បើ​គិត​តាំងពី​ឆ្នាំ​២០១៩ មក ប៉ុន្តែ​ដោយសារតែ​គ្មាន​ភាព​ទទួល​ខុសត្រូវ​លើ​តួនាទី​របស់​ខ្លួន អធិការ​រូប​នេះ​បាន​ធ្វើ​ឱ្យ​បែកបាក់​សាមគ្គី​ផ្ទៃក្នុង​របស់​អង្គភាព​យ៉ាង​ធ្ងន់ធ្ងរ រហូត​មាន​មន្ត្រី​ខ្លះ​បង្ខំ​ចិត្ត​ដាក់​ពាក្យ​ចូល​និវត្តន៍​ទាំង​មិនទាន់​ដល់​អាយុ​ចូល​និវត្តន៍​ផង​ដែរ។

មក​ទល់នឹង​ម៉ោង​ផ្សាយ​នេះ សារព័ត៌មាន The Cambodia Daily មិន​ទាន់​អាច​ទាក់ទង​លោក លឹម សម្បត្តិ ដើម្បី​សុំ​ការ​បំភ្លឺ​លើ​ការ​ចោទប្រកាន់​នេះ​បាន​នៅឡើយ​ទេ៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស