អាជ្ញាធរបានអំពាវនាវឲ្យពលរដ្ឋរស់នៅសង្កាត់ចំនួន១០ ក្នុងខណ្ឌដង្កោ រាជធានីភ្នំពេញ ប្រុងប្រយ័ត្នដោយសារទឹកស្ទឹងព្រែកត្នោត កំពុងហក់ឡើងខ្លាំង។
សេចក្ដីជូនដំណឹងចុះថ្ងៃទី២៥ ខែតុលា ឆ្នាំ២០២១ អាជ្ញាធរខណ្ឌដង្កោ បានឱ្យដឹងថា ពលរដ្ឋដែលកំពុងរស់នៅសង្កាត់ដង្កោ សង្កាត់ព្រៃស សង្កាត់ព្រៃវែង សង្កាត់ក្រាំងពង្រ សង្កាត់ស្ពានថ្ម សង្កាត់ទៀន សង្កាត់សាក់សំពៅ សង្កាត់ជើងឯក សង្កាត់ព្រែកកំពឹស និងសង្កាត់គងនយ ក្នុងខណ្ឌដង្កោ ត្រូវប្រុងប្រយ័ត្ន ខណៈបច្ចុប្បន្នស្ថានភាពទឹកស្ទឹងព្រែកត្នោត បានហក់ឡើងជាបន្តបន្ទាប់។
សេចក្ដីជូនដំណឹងដដែលឱ្យដឹងទៀតថា ដើម្បីជៀសវាងនូវហានិភ័យដែលបង្កឱ្យខូចខាតទ្រព្យសម្បត្តិ និងអាយុជីវិតនោះ ពលរដ្ឋដែលរស់នៅតាមស្ទឹងព្រែកត្នោត ត្រូវត្រៀមសម្ភារៈ និងបន្តតាមដានស្ថានភាពទឹកជាប្រចាំ ជៀសវាងការបាត់បង់សម្ភារៈ និងអាយុជីវិត ខណៈបច្ចុប្បន្ន រដ្ឋបាលខណ្ឌដង្កោ សហការជាមួយក្រសួងធនធានទឹក ដើម្បីបន្តតាមដានចំពោះស្ថានភាពទឹក។
កាលពីឆ្នាំ២០២០ ទឹកស្ទឹងព្រែកត្នោត នៅក្នុងភូមិសាស្ត្រខណ្ឌដង្កោ បានហក់ឡើងលើសកម្រិតប្រកាសអាសន្ន បណ្តាលឱ្យមានការជន់លិចដល់ផ្ទះសម្បែងរបស់ពលរដ្ឋចំនួន ២៣៥ខ្នង ស្មើនឹង ៣២១គ្រួសារ៕