ពលរដ្ឋខេត្តកោះកុង បង្ហាញការព្រួយបារម្ភអំពីបទល្មើសនាំចូលគ្រឿងញៀនជិត ៣០០គីឡូក្រាម ដែលជនល្មើសបន្តលួចនាំចូលតាមច្រកលំហសមុទ្រចូលមកក្នុងភូមិសាស្ត្រស្រុកស្រែអំបិល ខេត្តកោះកុង ខណៈសមត្ថកិច្ចជំនាញពាក់ព័ន្ធប្រចាំច្រកលំហសមុទ្រហាក់មិនសូវរវល់អើពើពីការនាំចូលគ្រឿងញៀនឆ្លងដែននេះទេ។
ពលរដ្ឋបានដាក់ការសង្ស័យទៅលើសមត្ថកិច្ចជំនាញប្រចាំការនៅលើលំហសមុទ្រថា ទំនងជាអាចមានជាប់ពាក់ព័ន្ធសំណូកពុករលួយពីក្រុមជនល្មើស ជាថ្នូរអនុញ្ញាតឲ្យនាំចូលគ្រឿងញៀនជាបន្តបន្ទាប់ មុនត្រូវបានកម្លាំងនគរបាលស្រុកស្រែអំបិល ចុះបង្ក្រាបប៉ុន្មានថ្ងៃមុននេះ។
ការព្រួយបារម្ភជាថ្មីរបស់ក្រុមអ្នកឃ្លាំមើលសង្គម និងអាណាព្យាបាលខាងលើនេះ បានកើតមានជាថ្មីទៀតក្រោយពេលសមត្ថកិច្ចនគរបាលស្រុកស្រែអំបិល បានចុះបង្ក្រាបបទល្មើសគ្រឿងញៀន និងរឹបអូសបានជិត ៣០០គីឡូក្រាម ដែលជនល្មើសដឹកតាមទូកចូលមកដល់ឃុំជ្រោយស្វាយ ស្រុកស្រែអំបិល កាលពីថ្ងៃទី២២ ខែតុលា ឆ្នាំ២០២១។
យុទ្ធនាការនេះ សមត្ថកិច្ចក៏បានឃាត់ខ្លួនជនសង្ស័យចំនួន ០៦នាក់នៅលើទូកខ្នាតធំមួយគ្រឿងរបស់ជនជាតិថៃ ដែលចូលចតក្នុងផែជលផលនៅចំណុចមាត់ពាមស្រែអំបិល។
ក្រុមប្រជាពលរដ្ឋបានស្នើដល់លោក ស ខេង រដ្ឋមន្ត្រីក្រសួងមហាផ្ទៃ ត្រូវបើកការស៊ើបអង្កេតលើករណីជនល្មើសលួចនាំចូលគ្រឿងញៀនជិត ៣០០គីឡូក្រាមចូលតាមច្រកលំហសមុទ្រ ស្ថិតក្នុងភូមិសាស្ត្រស្រុកស្រែអំបិល ខេត្តកោះកុង ថាតើមានមន្ត្រីស្ថាប័នណាខ្លះបានជាប់ពាក់ព័ន្ធបទល្មើសគ្រឿងញៀនលួចឆ្លងដែនជាបន្តបន្ទាប់មកនេះ។
ទាក់ទិនបញ្ហានេះ លោក ហួន នុន អធិការនគរបាលស្រុកស្រែអំបិល បានឲ្យដឹងថា ប្រតិបត្តិការចុះបង្ក្រាបក្រុមជួញដូរគ្រឿងញៀនទ្រង់ទ្រាយធំលួចឆ្លងដែនពីប្រទេសថៃ កាលពីព្រឹកថ្ងៃទី២២ ខែតុលា របស់កម្លាំងជំនាញ បានធ្វើឡើងនៅពីរទីតាំងផ្សេងគ្នា ស្ថិតក្នុងឃុំស្រែអំបិល និងឃុំជ្រោយស្វាយ។
យុទ្ធនាការនេះ សមត្ថកិច្ចបានឃាត់ខ្លួនជនសង្ស័យ ៦នាក់ និងរឹបអូសគ្រឿងញៀនចំនួន ៩កញ្ចប់ធំមានទម្ងន់ជិត ៣០០គីឡូក្រាម នៅលើទូកកាណូតខ្នាតធំរបស់ជនជាតិថៃ ដែលចូលចតក្នុងផែជលផលត្រង់ចំណុចមាត់ពាមស្រែអំបិល។
បច្ចុប្បន្ន ទាំងជនសង្ស័យ និងភស្តុតាង ត្រូវនគរបាលស្រុកស្រែអំបិល បញ្ជូនបន្តទៅកាន់ស្នងការដ្ឋាននគរបាលខេត្តកោះកុង ដើម្បីសាកសួរ និងឈានទៅកសាងសំណុំរឿងបញ្ជូនទៅកាន់សាលាដំបូងខេត្តកោះកុង បន្តនីតិវិធីតាមច្បាប់៕