ក្រុមបុគ្គលិក ២២នាក់បម្រើការងារនៅស្ថានីយទូរទស្សន៍ CNC នៃក្រុមហ៊ុន CBS ដែលត្រូវក្រុមហ៊ុននេះបណ្តេញចេញពីការងារ បានចោទអ្នកគ្រប់គ្រងក្រុមហ៊ុននេះថាមិនបានផ្តល់ប្រាក់អត្ថប្រយោជន៍ការងារឲ្យស្របតាមច្បាប់នោះទេ។
ក្រុមបុគ្គលិកទាំងនោះកំពុងស្វះស្វែងរកកិច្ចអន្តរាគមន៍ពីអ្នកច្បាប់ ជាពិសេសលោកនាយករដ្ឋមន្ត្រី ហ៊ុន សែន ឱ្យជួយអន្តរាគមន៍ចំពោះករណីរំលោភច្បាប់ការងារនេះ។
បុគ្គលិកស្នើមិនបញ្ចេញឈ្មោះ បានប្រាប់សារព័ត៌មាន The Cambodia Daily តាម Messenger Facebook នៅរសៀលថ្ងៃទី២៧ ខែតុលា ឆ្នាំ២០២១ នេះថា បុគ្គលិកក្រុមហ៊ុន CBS ចំនួន ២២នាក់ត្រូវបានបណ្ដេញពីការងារ គឺត្រូវភាគីក្រុមហ៊ុនលើកហេតុផលកាត់បន្ថយការចំណាយ ដោយសារតែជួបវិបត្តិហិរញ្ញវត្ថុធ្ងន់ធ្ងរដែលទាមទារត្រូវកាត់បន្ថយបុគ្គលិកតាមផ្នែកខ្លះនៃក្រុមហ៊ុន CBS។
ប្រភពដដែលបានបញ្ជាក់ថា ការបណ្ដេញបុគ្គលិកដោយមិនមានកំហុសទាំងនេះ ស្នើឲ្យអ្នកគ្រប់គ្រងក្រុមហ៊ុន CBS ត្រូវផ្តល់ប្រាក់សំណងជូនបុគ្គលិកដែលត្រូវបណ្តេញចេញទាំងនោះឲ្យស្របតាមច្បាប់ការងារ ឬកិច្ចសន្យាការងារមិនកំណត់ថេរវេលារវាងបុគ្គលិកជាមួយក្រុមហ៊ុនឲ្យបានត្រឹមត្រូវ។
ចំណែកឯភាគីក្រុមហ៊ុន CBS ផ្ដល់ត្រឹមតែប្រាក់អតីតភាព ៣ឆ្នាំចុងក្រោយ ប្រាក់ឈប់សម្រាកប្រចាំឆ្នាំ (គិតតែមួយឆ្នាំចុងក្រោយ) ប្រាក់បំណាច់ជួសការជូនដំណឹង និងប្រាក់ខែចុងក្រោយតែប៉ុណ្ណោះ។
ក្រុមបុគ្គលិកនៃក្រុមហ៊ុន CBS ទទូចដល់អ្នកគ្រប់គ្រងក្រុមហ៊ុននេះផ្តល់ប្រាក់អត្ថប្រយោជន៍ការងារជូនពួកគាត់ឲ្យបានត្រឹមត្រូវស្របតាមច្បាប់ការងារចំនួន ៤ចំណុច រួមមាន ប្រាក់ជំនួសការឈប់សម្រាកប្រចាំឆ្នាំតាមអតីតភាពការងារ ចាប់តាំងពីធ្វើការបាន ១ឆ្នាំដំបូង។
ពួកគេក៏បានទាមទារឱ្យក្រុមហ៊ុនផ្តល់ប្រាក់អតីតភាព ១៥ថ្ងៃក្នុង១ឆ្នាំ ទៅតាមអតីតភាពការងារ និងទាមទារឱ្យផ្តល់ប្រាក់សំណងជំងឺចិត្តតាមមាត្រា៩១ នៃច្បាប់ការងារ ហើយទាមទារឱ្យក្រុមហ៊ុនផ្តល់ប្រាក់បន្ទាប់បន្សំសម្រាប់បុគ្គលិកផងដែរ។
ក្រុមអតីតបុគ្គលិកបម្រើការងារនៅទូរទស្សន៍ CNC នៃក្រុមហ៊ុន CBS បានសំណូមពរដល់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោកនាយករដ្ឋមន្ត្រី ហ៊ុន សែន ជួយអន្តរាគមន៍ទៅអ្នកគ្រប់គ្រងក្រុមហ៊ុន CBS ចំពោះករណីបញ្ឈប់បុគ្គលិកដោយមិនទូទាត់ប្រាក់អត្ថប្រយោជន៍នានាតាមច្បាប់កំណត់នេះ។
បុគ្គលិកចំនួន ២២នាក់ដែលត្រូវក្រុមហ៊ុន CBS បណ្តេញចេញពីការងារ មានបុគ្គលិកខ្លះមានអតីតភាពការងារចន្លោះពី ១០ខែរហូតដល់ជាង ១៩ឆ្នាំ។
ទោះជាបែបនេះក្តី សារព័ត៌មាន The Cambodia Daily នៅមិនទាន់អាចមានប្រភពទាក់ទងអ្នកគ្រប់គ្រងក្រុមហ៊ុន CBS ដើម្បីបំភ្លឺជុំវិញការបណ្តេញបុគ្គលិកចេញពីការងារបានទេ នៅរសៀលថ្ងៃទី២៧ ខែតុលា ឆ្នាំ២០២១៕