26 C
Phnom Penh

ពលរដ្ឋ​ទាមទារ​ផ្តល់​អំណាច​ដល់​ព្រះមហាក្សត្រ​អាច​បំពេញ​ព្រះរាជ​តួនាទី​មាន​ចែង​ក្នុង​រដ្ឋធម្មនុញ្ញ

ដោយ ឌឹ ខេមបូឌា ដេលី

បទវិភាគ

លោក ហ៊ុន សែន បង្ហាញ​ពី​ការ​គោរព និង​ថ្វាយព្រះពរ​ដល់​ព្រះមហាក្សត្រ​ខ្មែរ​ព្រះបាទ​នរោត្តម សីហមុនី មុន​ថ្ងៃ​ខួប​លើក​ទី​១៧ នៃ​ការ​ឡើង​គ្រងរាជសម្បត្តិ​របស់​ព្រះអង្គ ដើម្បី​អាច​បំពេញ​ព្រះរាជ​តួនាទី​សម្រាប់​ជាតិ​កម្ពុជា ប៉ុន្តែ​ពលរដ្ឋ​ខ្មែរ​ជំរុញ​ឱ្យ​មេ​បក្ស​កាន់​អំណាច​រូប​នេះ​ផ្តល់​ព្រះ​តួនាទី​ដល់​ព្រះអង្គ​ឱ្យ​បាន​ពេញលេញ​ដូច​ដែល​មាន​ចែង​ក្នុង​រដ្ឋធម្មនុញ្ញ។

ប្រមុខ​រដ្ឋាភិបាល​កម្ពុជា បាន​ចេញ​លិខិត​ថ្វាយព្រះពរ​ដល់​ព្រះមហាក្សត្រ​ខ្មែរ​ដែល​ត្រូវ​បាន​ផ្សព្វផ្សាយ​នៅ​ថ្ងៃ​ទី​២៨ ខែ​តុលា នេះ​ថា រដ្ឋាភិបាល​កម្ពុជា និង​មន្ត្រី​រាជការ​ទាំងអស់ សូម​ថ្វាយព្រះពរ​ឱ្យ​ព្រះអង្គ​មាន​ព្រះរាជ​សុខភាព​បរិបូរណ៍ ព្រះជន្មាយុ​យឺនយូរ ដើម្បី​គង់​ប្រថាប់​បំពេញ​ព្រះរាជ​តួនាទី​សម្រាប់​ទឹកដី និង​ដើម្បី​ប្រជារាស្ត្រ​របស់​ព្រះអង្គ​បន្ត​ទៀត។

មេដឹកនាំ​ដែល​ឧស្សាហ៍​រំលោភ​ព្រះមហាក្សត្រ​ខ្មែរ​រូប​នេះ​បាន​បួងសួង​ដល់​បុណ្យ​បារមី​នៃ​វិញ្ញាណក្ខន្ធ​អតីត​ព្រះមហាក្សត្រ​ខ្មែរ​គ្រប់​ព្រះអង្គ ជាពិសេស​ដួង​ព្រះ​វិញ្ញាណក្ខន្ធ​សម្តេច​ព្រះ​នរោត្តម សីហនុ ដែល​ជា​ព្រះ​បិតា​ឯករាជ្យ បូរណភាព​ទឹកដី និង​ឯកភាព​ជាតិ​ខ្មែរ សូម​ជួយ​ថែរក្សា​សម្តេច​ព្រះបាទ នរោត្តម សីហមុនី ឱ្យ​ព្រះអង្គ​មាន​ព្រះ​កាយពល​មាំមួន និង​ព្រះរាជ​សុខភាព​ល្អ​ជា​និរន្ត។

លោក ហ៊ុន សែន អះអាង​ថា ព្រះមហាក្សត្រ​ខ្មែរ​ព្រះបាទ​នរោត្តម សីហមុនី គឺជា​ព្រះមហាក្សត្រ​ដែល​ប្រកប​ដោយ​ទសពិធរាជធម៌​ចំពោះ​ជាតិ​មាតុភូមិ និង​ប្រជានុរាស្ត្រ​យ៉ាង​ខ្លាំង ក្នុង​នោះ​ព្រះអង្គ​បាន​ប្រោស​ប្រទាន​នូវ​សកម្មភាព​មនុស្សធម៌​ជាច្រើន​ក្នុង​ការ​ជួយ​សង្គ្រោះ​អាយុជីវិត​ប្រជានុរាស្ត្រ​ខ្មែរ​ពី​គ្រោះ​មហន្តរាយ​នានា ជាពិសេស​ក្នុង​វិបត្តិ​នៃ​ជំងឺ Covid-19 នេះ​ជាដើម។

ពិធី​ខួប​លើក​ទី​១៧ ព្រះវស្សា​នៃ​ការ​ឡើង​គ្រងរាជសម្បត្តិ​របស់​ព្រះមហាក្សត្រ​ខ្មែរ​សម្តេច​ព្រះ​នរោត្តម សីហមុនី ប្រព្រឹត្ត​ទៅ​នៅ​ថ្ងៃ​ទី​២៩ ខែ​តុលា ឆ្នាំ​២០២១ ដែល​ត្រូវ​បាន​ក្រុមប្រឹក្សា​រាជសម្បត្តិ​ជ្រើស​តាំង​ជា​ឯកច្ឆន្ទ​ក្នុង​សំឡេង ៩​លើ​៩ ដើម្បី​ឱ្យ​ព្រះអង្គ​ឡើង​សោយរាជ្យ​ជា​ព្រះមហាក្សត្រ​ខ្មែរ​បន្ត​ពី​ព្រះ​បិតា ព្រះបាទ​នរោត្តម សីហនុ កាលពី​ថ្ងៃ​ទី​១៤ ខែ​តុលា ឆ្នាំ​២០០៤ កន្លងទៅ។

បើ​ទោះបីជា​មេដឹកនាំ​បក្ស​កាន់​អំណាច​សម្ដែង​ការ​គោរព​ដល់​ព្រះមហាក្សត្រ​ក្នុង​ថ្ងៃ​ខួប​នេះ​ក៏ដោយ ក៏​នៅតែ​មាន​ការ​រិះគន់​ពី​ទង្វើ​របស់​លោក ហ៊ុន សែន កន្លងមក ដែល​តែង​រំលោភ​លើ​ព្រះរាជ​តួនាទី​របស់​ព្រះមហាក្សត្រ​ជា​ញឹកញាប់ ដោយ​ការ​កែប្រែ​រដ្ឋធម្មនុញ្ញ​របស់​កម្ពុជា ដែល​បាន​កម្រិត​ព្រះរាជ​តួនាទី​របស់​ព្រះអង្គ​ឱ្យ​ស្ថិត​នៅ​ក្រោម​ឥទ្ធិពល​អំណាច​របស់​ខ្លួន​រហូត​មក។

ក្រុម​អ្នក​សង្កេតការណ៍​រិះគន់​ថា ស្ថាប័ន​ព្រះមហាក្សត្រ​ខ្មែរ​ពិត​មែន​តែ​ត្រូវ​បាន​ការពារ​ដោយ​រដ្ឋធម្មនុញ្ញ ប៉ុន្តែ​ច្បាប់​កំពូល​នេះ​ត្រូវ​បាន​រំលោភ​ជា​ញឹកញាប់​ដោយ​មេ​បក្ស​កាន់​អំណាច​ដែល​លើក​បន្តុប​ដោយ​វៀតណាម រហូត​ឈ្លានពាន​ដល់​ស្ថាប័ន​ព្រះមហាក្សត្រ​ថែម​ទៀត ក្នុង​នោះ​លោក ហ៊ុន សែន តែង​បង្ខំ​ឱ្យ​ព្រះអង្គ​ចេញ​ព្រះរាជក្រឹត្យ​តែងតាំង​ដំឡើង​ឋានៈ​ដល់​បក្ខពួក​ខ្លួនឯង និង​បង្ខំ​ឱ្យ​ទ្រង់​ឡាយ​ព្រះហស្តលេខា​លើ​ច្បាប់​ដែល​បង្កើត​ឡើង​ដើម្បី​ការពារ​អំណាច​ខ្លួនឯង​ជាបន្តបន្ទាប់។

កាលពី​ឆ្នាំ​២០០៥ លោក ហ៊ុន សែន ក៏​ធ្លាប់​បាន​គំរាម​រំលាយ​របប​រាជា​និយម ហើយ​ដាក់​ជំនួស​មក​វិញ​នូវ​របប​សាធារណរដ្ឋ​ផង​ដែរ ប្រសិនបើ​សម្ដេច​ព្រះ​នរោត្តម សីហនុ មិន​ព្រម​ឡាយ​ព្រះហស្តលេខា​លើ​សន្ធិសញ្ញា​បំពេញ​បន្ថែម​ឆ្នាំ​២០០៥ ស្ដីពី​ព្រំដែន​កម្ពុជា-វៀតណាម ដើម្បី​ឱ្យ​បក្ស​កាន់​អំណាច​អាច​ចុះ​កិច្ចព្រមព្រៀង​ខុស​ច្បាប់​នានា​ជាមួយ​រដ្ឋាភិបាល​វៀតណាម បាន​បន្ត​ទៀត​ទេ​នោះ។

ជុំវិញ​ការ​ប្រើ​អំណាច​រំលោភ​លើ​ព្រះមហាក្សត្រ​ខ្មែរ​នេះ អតីត​មេ​បក្ស​ប្រឆាំង លោក សម រង្ស៊ី កាលពី​ថ្ងៃ​ទី​២៥ ខែ​ធ្នូ ឆ្នាំ​២០២០ ក៏​ធ្លាប់​ប្រមាថ​ព្រះមហាក្សត្រ​សព្វថ្ងៃ​នេះ​យ៉ាង​ធ្ងន់ៗ​ដែរ​ថា ព្រះអង្គ​គ្រាន់តែ​ជា​ស្តេច​ទីងមោង​តែប៉ុណ្ណោះ ពីព្រោះ​ព្រះអង្គ​ធ្វើ​អ្វីៗ​តាម​តែ​បញ្ជា​លោក ហ៊ុន សែន ទាំងអស់ ដើម្បី​សម្ងំ​យក​សុខ​សម្រាប់​តែ​អង្គ​ឯង​ដូចជា​សត្វ​សេក​ក្នុង​ទ្រុង​មាស​របស់​លោក ហ៊ុន សែន។

ទោះជាយ៉ាងណាក៏ដោយ អ្នកវិភាគ​នយោបាយ​និង​សង្គម បណ្ឌិត ឡៅ ម៉ុងហៃ កាលពី​ចុង​ខែ​ធ្នូ ឆ្នាំ​២០២០ ធ្លាប់​បាន​លើកឡើង​ថា ប្រជារាស្ត្រ​ខ្មែរ​ទាំងអស់​គ្នា​មិន​ត្រូវ​ទិតៀន​ប្រមាថ​ព្រះមហាក្សត្រ​ទេ ប៉ុន្តែ​ត្រូវ​ជួយ​ទាមទារ​មធ្យោបាយ​ផ្សេងៗ​ដើម្បី​ឲ្យ​ព្រះអង្គ​អាច​បំពេញ​ព្រះ​រាជកិច្ច​ជូន​ជាតិ​ឲ្យ​បាន​ពេញលេញ ដូច​ដែល​មាន​ចែង​ក្នុង​រដ្ឋធម្មនុញ្ញ​វិញ នោះ​ទើប​ជា​ការ​ប្រសើរ។

អ្នកវិភាគ​រូប​នេះ​ព្រមាន​ថា ការ​ប្រមាថ​ព្រះមហាក្សត្រ ឬ​បង្ខំ​ឱ្យ​ព្រះអង្គ​ធ្វើ​អ្វីៗ​តាម​អំណាច​របស់​ខ្លួន​នោះ មិន​ត្រឹមតែ​ប៉ះពាល់​ធ្ងន់ធ្ងរ​ដល់​កិត្តិយស​របស់​ព្រះមហាក្សត្រ​ដែល​ការពារ​ដោយ​រដ្ឋធម្មនុញ្ញ​ប៉ុណ្ណោះ​ទេ តែ​ផ្ទុយទៅវិញ បែរជា​បង្ហាញ​ពី​ទង្វើ​របស់​អ្នក​ទាំងនោះ​ឱ្យ​កាន់តែ​ច្បាស់​ថា ពួក​គេ​កំពុង​រំលោភ​រដ្ឋធម្មនុញ្ញ​កម្ពុជា​យ៉ាង​ធ្ងន់ធ្ងរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស