ក្រុមអ្នកឃ្លាំមើលផែនការអភិវឌ្ឍន៍សង្គម ថ្លែងហួសចិត្តអាជ្ញាធរនៅតាមព្រំដែនដែលបណ្តែតបណ្តោយឲ្យឈ្មួញល្មើសអាចនាំចូលអាល់កុលក្លែងក្លាយរាប់ម៉ឺនលីត្រពីប្រទេសជិតខាង ចូលមកកម្ពុជា នាំឲ្យប៉ះពាល់សុខភាពពលរដ្ឋ អ្នកប្រើប្រាស់ដែលកំពុងមានតម្រូវការចាំបាច់នាពេលបច្ចុប្បន្ននេះ។
អ្នកឃ្លាំមើលសង្គមបានចាត់ទុកការនាំចូលអាល់កុលក្លែងក្លាយចូលមកនេះ គឺលុះណាតែមានការត្រូវរ៉ូវគ្នារវាងសមត្ថកិច្ចជំនាញប្រចាំការនៅតាមច្រកទ្វារព្រំដែនជាមួយឈ្មួញ ទើបអាចដឹកអាល់កុលរាប់ម៉ឺនលីត្រដែលផ្ទុកនៅលើរថយន្តធំៗអាចបើកឆ្លងកាត់ព្រំដែនបានដោយរលូន។
ការលើកឡើងនេះ គឺបន្ទាប់ពីមន្ត្រីជំនាញរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា ក.ប.ប. កាលពីថ្ងៃទី២៥-២៦ ខែតុលា បានចុះបង្ក្រាបឃ្លាំងស្តុកទុកអាល់កុលក្លែងក្លាយ ឬមេតាណុល បានចំនួនជិត ១ម៉ឺន ៦ពាន់លីត្រ (១៥៩៦០លីត្រ) ដែលឈ្មួញនាំចូលមកស្តុកទុកក្នុងភូមិសាស្ត្ររាជធានីភ្នំពេញ ដើម្បីត្រៀមចែកចាយបន្តទៅកាន់ទីផ្សារតាមបណ្តារាជធានី-ខេត្តនានាទូទាំងប្រទេសកម្ពុជា។
ករណីនេះ ក្រុមអ្នកឃ្លាំមើលសង្គមក៏ស្នើដល់លោក ស ខេង រដ្ឋមន្ត្រីក្រសួងមហាផ្ទៃ ក៏ដូចជាលោករដ្ឋមន្ត្រីក្រសួងពាក់ព័ន្ធ ត្រូវពិនិត្យទៅលើការអនុវត្តការងាររបស់មន្ត្រីក្រោមឱវាទរបស់ខ្លួនពង្រឹងការងារឲ្យបានត្រឹមត្រូវ និងជៀសវាងការប្រព្រឹត្តអំពើពុករលួយ។
ទោះយ៉ាងណា មន្ត្រីជំនាញ ក.ប.ប. បានបញ្ជាក់ថា កំពុងបន្តចុះស្រាវជ្រាវរកម្ចាស់អាល់កុលក្លែងក្លាយ ដើម្បីឈានទៅបន្តនីតិវិធីច្បាប់ជាធរមាន៕