អនុប្រធានទី១ នៃរដ្ឋសភាជាតិ លោក ងួន ញ៉ិល បានទទួលមរណភាពនៅថ្ងៃទី៥ ខែវិច្ឆិកា ឆ្នាំ២០២១ នេះ ក្នុងជន្មាយុ ៧៩ឆ្នាំដោយរោគាពាធ។
រដ្ឋសភាជាតិបានប្រកាសព័ត៌មាននៅថ្ងៃទី៥ វិច្ឆិកា នេះថា សពរបស់លោក ងួន ញ៉ិល ត្រូវបានតម្កល់ធ្វើបុណ្យទក្ខិណានុប្បទានតាមប្រពៃណីពុទ្ធសាសនានៅគេហដ្ឋាននៃសព នៅភូមិអូរអណ្ដូង សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
លោក ងួន ញ៉ិល គឺជាតំណាងរាស្ត្រខេត្តកំពង់ធំ និងជាអនុប្រធានទី១ នៃរដ្ឋសភា។ លោកមានស្រុកកំណើតនៅភូមិត្រពាំងជ្រៃ ឃុំបល្ល័ង្ក ស្រុកបារាយណ៍ ខេត្តកំពង់ធំ ហើយបច្ចុប្បន្នលោកមានទីលំនៅនៅសង្កាត់ព្រែកប្រា ខណ្ឌច្បារអំពៅ។
ក្រៅពីតំណែងជាអនុប្រធានទី១ នៃរដ្ឋសភា លោកក៏ធ្លាប់ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចន្លោះពីឆ្នាំ១៩៨៩ ដល់ឆ្នាំ១៩៩៣ ផងដែរ។
សមាជិករដ្ឋសភាជាតិ និងមន្ត្រីជាន់ខ្ពស់រដ្ឋាភិបាលកម្ពុជា បានបង្ហោះសាររំលែកមរណទុក្ខនេះដល់គ្រួសារលោក ងួន ញ៉ិល ហើយខ្លះទៀតបានលើកពីគុណសម្បត្តិរបស់លោកផងដែរ៕